રોમનોને પત્ર 13

ઓદિકાર્યાહા આધીન રોઅના

1 દરેક માઅહું સરકારી ઓદિકારી લોકહા આધીન રોય, કાહાકા પોરમેહેરા પોરવાનગી કોય ચ્ચાહાન ઓદિકાર દેવાયેહે, એને જ્યા ઓદિકારી હેય ચ્યા પોરમેહેરાપાઅને ઠોરાવલા ગીઅલા હેય. 2 યાહાટી જીં કાદાં ઓહડા ઓદિકારી માઅહા વિરોદ કોઅહે, તી પોરમેહેરા નિયમાહા વિરુદ કોઅહે, એને વિરુદ કોઅનારાહાન ડૉડ મિળી.

3 જો કાદાં હારાં કામ કોઅહે, ચ્યાલ ઓદિકાર્યાલ બીઅના ગોરાજ નાંય હેય, બાકી જો ખારાબ કામ કોએ, ચ્યાલ ઓદિકાર્યા બિક હેય, જો તું ઓદિકાર્યા પાઅને બિકવોગર રા માગતોહો, તે હારાં કામ કોઅતો રો, એહેકેન તો તુમહે વાહવા કોઅરી. 4 કાહાકા ઓદિકારી તો મોદાત કોઅરાહાટી પોરમેહેરાપાઅને સેવક નેમલો હેય, બાકી તું ખારાબ કામ કોએ, તે તું બિક રાખ, કાહાકા ઓદિકાર્યાપાય ડૉડ દેઅના ઓદિકાર હેય. 5 તું પોરમેહેરા ડૉડાપાઅને બોચાંહાટી આધીન નાંય રોઅના બાકી અંતકરણ થી બી તુમહાય ઓદિકાર્યાહા આધીન રોઅના હેય.

6 યાહાટી કર બી દા, કાહાકા શાસન કોઅનારા પોરમેહેરા સેવક હેય, એને ચ્યા સદા યાજ કામામાંય લાગલા રોતહા. 7 ચ્યાહાટી બોદહા હક્ક ચુકવી દા, જ્યા પાય કર લેયના હક્ક હેય ચ્ચાલ કર બોઅય દા, જ્યાલ જકાત જોજહે ચ્યાલ જકાત દા, એને જ્યાહાલ આદર દેઅના હેય, ચ્યાહાન આદર દા, એને જ્યાહાન માન દેઅના હેય, ચ્યાહાન માન દા.