1 Madv Yasu ǝn sǝgawal ǝn Fǝta Yazhigǝla, ka nǝv fang ǝn tǝb kǝ furakh sar tsin, "Malǝm, vaza dǝ ɗigan kurakhana zǝ khwara khǝgakhan."

2 Ka ngawar khai Yasu kwarne, "Nǝgha tsǝkha adina kǝ khǝgakhana? Na bai da ɗuɗud ǝn tǝ vavak sar bi. Itsera tara da ndaza ndazud."

3 Madv Yasu ǝn giɗǝn tǝ ghuɓa Oliv, ger dǝ Fǝta Yazhigǝl, ka sa Bitrus, zǝ Yakubu, zǝ Yukhan zǝ Ndros da vak Yasu ɓǝghanyan. 4 Ka nǝv itar, kwara kǝnda kwar, da dzoghǝr yawa ina kǝ digitakhi? Tsugun da zǝk ndǝk uɗa dǝge da nǝghud da da dzoghǝr dǝgakhana daghani?"

5 Ka ngawa tǝrkhai Yasu kwarne, "Ɗem nikur khayamanǝf ba valkurdu udan bi. 6 Da saks udakh zikǝn ǝn ɗakhar ǝn kwarne ka Yasu. Tsuguna, da valdu vala itar udakh zikǝn. 7 Da tsǝna kur lav ǝn tǝghǝr kǝ pǝga zǝ wilenga sar kǝ pǝg, gǝdzam bi. Wirva barari dzoghǝr dzǝg kǝ yakhen kǝ digitakh. Ai mbasa sara a sa ba ndan bi. 8 Kǝsa da tsiyara tsiya kǝ tlǝrna kǝs. Tlǝksa da kǝl ghum itar ǝn tǝghǝr kǝ tlǝrna tlǝks. Da man mbǝɗa pǝgdǝmud ǝn vakakh sikh sikh sikh. Da nǝg way tsugun. Daghan yakhana kǝ digitakha, ndazhazha sar bi, farsafǝg sar kǝ dlaɗ.

9 Ka tsukwana kur ghǝr. Da ɓǝkur ɓa itar da vak takalav, zǝ kǝɗ kur kǝɗǝn ǝn vak dzakhava Yakhudakh. Da ɓǝkur ɓud da tǝvuk kǝ maludakh zǝ shikakh wirva ɗakhar, ki kwaratra lav zǝɗan tsukur ǝn tǝvuk tar. 10 Ai kǝda saks kǝ mbasa sara, barari kwardu lav zǝɗan na tsud chak kǝ daghan udakh. 11 Itsa yau ǝn vai kur khai itar zǝ ɓǝkur ɓa da vak taka lav, dzamam ba dǝge da kwara kur bi. Kwaram kwara ba kur dǝge a sakura da mǝkǝnur ǝn tǝ sarten. Wirva kur bǝn kwar lava bi, Sǝɗikw Yazhigǝl ǝn kwaran.

12 "Ən tǝ yanen kǝ sarta, da bǝdu zǝrbab ad zǝrbab sar kǝ mǝts, dad tsugunsa da bǝdu bǝg ad zǝr sar. Zara tsugun da tsiyara tsiya tar kǝ yakh tar, zǝva kǝɗtǝr kǝɗa tsitar kǝmts. 13 Da nagh kur ba itsawar wirva ka bi. Ai ɗaga ude a bǝgan ad rǝv da tǝ mbasa, da mbǝladu mbǝla dǝ kat.

14 "Da nǝgha nǝgha kur dǝg dzadlakhe, ǝn bazdu Fǝta Yazhigǝl, zǝ udakhe ǝn nenanen, ǝn ghitsǝn tǝ vakvake tsa kalkal ba ghitsa tsin bi, (dakake ǝn tugwado lavana katlga katlin dǝge tukuwin). Ka liye ǝn ǝntla khay ya Yakhudi, barari khwaya tsitar dǝgo da ghuɓakh. 15 Ude ǝn ndzǝgan ǝn tǝ ghǝr gud tsuguna, ya so ɓin sǝgadagh da zǝɓ itsauɗ dǝgal ǝn khud mǝgh bi. 16 Ude ǝn gukh tsuguna, ya guyo bin saks da zǝɓ nura sar bi. 17 Da nǝg dlaɗ kǝ nǝghwase dǝ khuɗ, zǝ liye dǝ zǝr ǝn tǝ tukw dǝv, ǝn tǝ yanen kǝ sart. 18 Kwam ɗǝgau, dzoghǝr ba khwayana ǝn sarta fagh bi. 19 Yǝn tǝ yanen kǝ sarta, da nǝg dlaɗ char, khulfe kwal taɓa tsuɗ manaman. Gwil farsa vǝrɗ lard, tangw da tǝ ina kǝ sart. Aghbud da gwidǝn man khulf sar kǝ yanen bi.

20 "Da tsa khǝtsana bud ad khǝnakhen bi, tsa na ud dǝg sige da tǝma dǝ safa bi. Ai wirva li dzǝran na kǝ udakh Yazhigǝl, da khǝtsa khǝtsa Yazhigǝl ad khǝnakhen. 21 Ən tǝ yanen kǝ sarta, da ka nǝv udan tsukur, ‘Vaza, auna Kristu ǝn van’ awana, ‘A niya ǝn vin’ ya khayamanǝf bi. 22 Wirva Kristu filfilakh zǝ tlayang filfilakh da sakhgawal itar. Da manakh zik zikan na kǝ jakvakh, zǝ zik zikan na kǝ dǝg ndawakakh itar kǝ valdu udakh. Da tsa tǝkhin kǝ manawan, da valdu vala itar zǝva liye a dzǝrtǝkhai Yazhigǝl. 23 Wirva yana, ɗem nikur, a kwara kur khai ka itsauɗǝn sart.

24 Ən tǝ yanen kǝ khǝnakha, ǝn tǝkhal kǝ dzoghǝr dzǝg kǝ dlaɗakhen,

" ‘Ka da nǝga fatsi kǝ gurtl.

Tǝl tsuguna naba da kheɗaɗ bi.

25 Kwadladlakh tsuguna ka da ɓaloɓalǝn

Sǝgadagh ǝn tǝ fef gharazhigǝl.

Da gǝdiya gǝdyud ad ndzǝɗakhe

Ən fǝf gharazhigǝl.’ "

26 "Da mǝdlo ǝn tǝ yanen kǝ sart jakva Zǝr Ud ǝn tǝ fef gharazhigǝl, ǝn sǝgadagh ǝn ghwik, dǝ ndzǝɗa zǝ ndanga char. 27 Da bǝlondagh ɓǝla dǝ zarɓǝlakh sar, kǝ dzakha dzǝran na kǝ udakh sar, ǝn tǝ kalam lard daghan. Tsiyif ǝn tǝ yan kǝ kalam lard, da tǝ yan kǝ kalamakh.

28 "Tsagam tsaga digit dǝ ufa ghǝdiv. Da farsin ɗidu tlim kǝ ɗado wilwa tlim, ǝn tsatsǝg kur kwarne a khǝrzǝga vi. 29 Ndǝk yan tsugun, da nǝgha tsukur dǝgakhan ǝn dzoghǝr dzǝg. Tsa tsukur kwarne, a khǝrzǝgan, ǝn tǝ ghay gud. 30 Ən tǝkha kura tǝkha kǝ, udakh kwargǝn, da ruga ba itar bi, khekwa dzoghǝr dǝgakhana daghan. 31 Gharazhigǝl zǝ khaya da nige tar. Ai lave ǝn sǝgawal ǝn ghayara na bai kwal da righa bi."

32 "Na ude ǝn tsa khǝna zǝ sart bi, itsa zarɓǝlakhe ǝn gharazhigǝl, itsa Zǝren, uk Dad kitakul ǝn tsan. 33 Ɗem nikur, ɗikfǝkhe kur, wirvǝn tsa bakur sarte da sǝgadaghin bi. 34 Ndǝk ude da dǝgal da tlǝrna kǝs. Madvin ǝn ɗuwada mǝgha, batrǝm ad tlǝr ǝn dǝv kǝ li man tlǝr sar. Ka kwarar khai ak itsera kǝ zǝr tlǝr ad tlǝre da manin, ka kwarar khai kǝ dadake ǝn uf mǝgh ad giɗa ɗem. 35 Wirva yan, ɗem nikur, wirvǝn tsa bakur sarte da guyo dad mǝgh bi. Itsa kǝ khakhuga awana ǝn tǝb viɗ, itsa tǝkǝdla pǝrt awana kǝ fatsi tǝghǝr. 36 Da soghǝrin dzagwdlam, tlakurghǝr bin ǝn khǝnkhar bi. 37 Dǝge ǝn kwara kura ka, ǝn kwarara kǝ itsawar kǝ. Ɗem nikur.