1 Saudagh kǝ Yasu ǝn tǝ bǝɗar, ka gatars udakh zikǝn. 2 Ka sa dadak madagwilf da tǝvuk sar, kǝlgan ad juguv ka ni, "Dadzikan, da khayanǝfkh tǝkhaha kǝ mbaku fidigiɗ."

3 Ka talal Yasu ad dǝv sar ka gǝman ad uden, ka ni, "A khayanǝf kǝ, mbumbǝg fidigiɗ." Ən tǝvin tǝvin ka mbu ǝn tuk fich. 4 Ka nǝv Yasu tsin, "Tsǝna, kwarara ba kǝ itsawar ad dǝge dzaughǝr bi, dǝg da mǝdlara ghǝragh kǝ zil kǝs, bǝdu kha dǝg zaɓa tlatlǝɓ ndǝk vai kwarga ndzikha ndzikh Mus niya. Manga mana ndǝkyan, ki da mǝdla kwarne a mbukha kǝ dlam."

5 Da kǝ Yasu da Kafarnakhum, ka sasǝg kǝ mal ya tlujiyakh da waksar kǝ takaɗa kwarne, 6 "Dadzikan, zǝr tlǝrar ǝn khǝngan ǝn mǝgh, ǝmtsan tlapǝl vǝgh tsin, ǝn khǝɓ dlaɗ char."

7 Ka nǝv Yasu tsin, "Da dǝgal ka da mbambǝg."

8 Ka ngawar khai mal ya tlujiyakh kwarne, "Dadzikan, ǝn tlala ba ka kǝ saks tsǝkha da fǝtara bi. Uk lava da kwarga kha, da mbǝga dad tlǝrar. 9 Wirva ka dǝ ghǝrara ǝn kuskǝ ud kǝ, tsuguna nǝg tlujiyakh ǝn kustsǝk, tǝkhaka kǝ kwarar khai kin, ‘Dǝg dǝgal,’ ka dǝgal, da ka nika kǝ tlǝrna tsugun, ‘Saw,’ ka saks, da ka nika kǝ zǝr tlǝrar, ‘Mana dǝ yan kǝ digit,’ ka mana man."

10 Tsǝna kǝ Yasu ndǝk yan ka ndawak ni, ka niya kǝ liye gatars gat, "Jir ǝn kwara kura kǝ, ǝn khuɗ kǝ ya Izrail a nǝgha ba ka dadak fadǝghǝro fǝg dǝ ndzǝɗa ndǝk ina bi. 11 Ən kwara kura kwara kǝ, zikǝn li kwal Izrailakh da sǝgo ǝn mbǝrt kǝs zǝ ǝn tǝvak ghǝr, ki da ndzakhgan tsitar zǝ Brakhim zǝ Ishaku zǝ Yakub ǝn tǝ vak khwaɗga ǝn tlǝksa gharazhigǝl. 12 Liye tsa itar ǝn khaitǝra giɗǝn tlǝksa Yazhigǝl, itar udakhe da tlǝv tǝr dagh ud da nikan na kǝ gurtl, vake da tuwa itar da kǝrɗ tliɗ."

13 Ka nǝv Yasu kǝ mal ya tlujiyakh, "Dǝg dǝgal, wirva fadǝghǝro fǝgagh da mana kha manud." Ən dǝvǝn dǝva ka mbu zǝr man tlǝr saren.

14 Da kǝ Yasu da fǝta Bitrus, ka nǝghan ad bab nus Bitrus magulaɓ ǝn ndzikǝn ǝn khǝngan. 15 Ka gǝman ad dǝv sar, ka mbu ǝn tuk magulaɓ. Ka tsifa tarkhe ad dǝgzu.

16 Ɓǝlga kǝ khagwa, Ka ɓardǝghǝr udakh ad liye kǝɗtǝr shatan kǝ Yasu zikǝn, uk lava dǝ ghay kalti a kwarga Yasu, ka dzadal ad sǝɗikw bǝzan ǝn vǝgh tsitar, ka mbakhandu tsugun ad liye kwal yanga daghan. 17 A mangan ad ina kǝ righada dǝge tsa kwarga Ishay tlayang kwarne,

"In dǝ ghǝr sar kǝ ɓǝf ad kuɗ lapi mar.

Ka ɓakiyamghǝr ad kuzakh mar."

18 Vazga kǝ Yasuwa tsarghǝr dzakhava udakh zikǝna, ka kwarar khai kǝ furakh sar kǝ zǝghva dǝgal da tǝ yan kǝ ghǝdzǝva gadzak dǝlva Urdun. 19 Ka saks kǝ dadak tsagdu ndzikha ndzikh Mus da vak sar kǝ kwarara kwara kwarne, "Malǝma, da gatakhs gata ka tsa da makh."

20 Ka nǝv Yasu tsin, "Uvakha nǝg fikakh tar, ɗikakhe pǝdlǝn gharazhigǝl tsuguna nǝg itar dǝ fǝtakha tar. Ai Zǝr Uda, na ba dǝ vake da bǝg din ghǝr sar bi."

21 Ka nǝv tlǝrna fur sar tsin, "Dadzikan, ka daks da khǝɗana dadara ndan."

22 "Gataks gat, khǝɗa khǝɗa tlamtsakh ad tlamtsakh tar." Nǝv Yasu tsin.

23 Da kǝ Yasu zǝ furakh sar da peryuwa ka dǝgal tsitar. 24 Ka sugo kǝ zikan kǝ kalangas ǝn tǝghǝr kǝ dǝlv, ka farsa daks kǝ ghǝɗkuta yu ǝn dǝlv da peryu. Yasu tsuguna ǝn khǝn khar. 25 Ka dǝgal tsitar da tsiya tsiya kǝ kwarara kwara kwarne, "Dadzikan, Katkiyam kat, da ruwa kiyam."

26 Ka niya tsitar, "Uɗa lava tsǝkur ǝn gǝdza ndikini? Kuram li khǝtsa fadǝghǝrofǝg." Ka tsif, tavarghǝr ad di kǝ fuɗǝn zǝ dǝlv, ka ɗiw vake.

27 Ka ndawatrǝf kǝ udakh, avitar, "Khulf ira kǝ ud ini? Zǝva fuɗa zǝ dǝlv ǝn tsǝnaru tsǝni?"

28 Dala kǝ Yasu da tǝ yan kǝ ghǝdzǝva gadzak ǝn tǝ khay kǝs ya Gadarakh, ka sawala ud mits li dǝ sǝɗikw bǝzan ǝn giɗe ngitl, ka gamgitar zin. Na ude dlǝn tǝkha kǝ dal ǝn tǝ yanen kǝ ɗul bi. Wirva nagh bakha jaga tsitar bi. 29 Tǝvin tǝvina ka khula tsitar kwarne, "Zǝr Yazhigǝl uɗa ɗangwa tsǝkha dǝ kǝndǝndi? A sa da bakǝnda dlaɗ nagh kha dla sart kwal sagha?"

30 Ən tǝvuk khǝɗikǝna, nǝg li zighw giɗa dagu. 31 Ka takaɗga sǝɗikw bǝzana khen ad Yasu kwarne, "Da lakundalakh, ka khayakǝndanǝfkh daks da daguwa khan."

32 Ka niya tsitar, "Iyo, damdǝg." Ka dǝgala itar, da itar da daguwen. Ka tsiyif giɗa ya daguwen daghan kujaɗkujaɗ, ka ɗaɗara itar dǝga dagh da dǝlv, ruga itar ǝn yu. 33 Ka khwaya kǝ li zighw daguwen, daks da khuɗkǝs ka kwardu lav itar, ǝnt dǝge dzaughǝr dǝ liye dǝ sǝɗikw bǝzan. 34 Ka sawal udakh ǝn khuɗkǝs daghan kǝ gama zǝ Yasu. Nǝgha tsitara, ka takaɗga itar kǝ ɗuwatǝr da kǝs tar tsin.