1 Kɛ̀ɛleaiti, nii é ga Zɛnvu Ɲadegai ná-vebɛaniiti ma vai, wɔin ɠa mà, ga wo gaamai ɠwɛɛ, é lo vebɛanii naati ba. 2 Wo kwɛɛ, siɛgi zu wo ɠɛni la dɛ ga GALA kwɛɛtala nuiti, ti wo zoni, ti wo lɔ kɔɔɠɔ ganigiti kɔɔ vai zu, niiti daa la ti ʋa. 3 Naa ɠa é ba, nà bosu wo ma ga: Nu nɔpɛ é ɓɔɛzu GALA Zɛnvui zɛbɛi zu, é la zooga é ʋa ɠɛ ma: «Yesu ɠoto faan!» Ta nu nɔpɛ ge la zooga é ʋa ɠɛ ma: «Yesu ɠa ga Maliɠii,» kɛni Zɛnvu Ɲadegai lo tuɠɔ.

4 Vebɛanii ma zii mɔinʋɛ, kɛlɛ Zɛnvu Ɲadega ɠilagi nɔ ɠa, é ti veezu. 5 Botii ɠɛʋelei mɔinʋɛ, kɛlɛ Maliɠi ɠilagi nɔ ɠa, ti ɠɛɛzu bɛ. 6 Faa ɠɛɛ ʋelei ma zii mɔinʋɛ, kɛlɛ GALA gilagi nɔ ɠa, é naati pɛ kɛɛzu ɛsɛ pɛ tetemazu.

7 Zɛnvu Ɲadegai ɠa ɠulazu kɛlɛma ɛsɛ gilagilagi ʋɛ ga vebɛanii maaʋele, ɛsɛ pɛ ná-kulanumai ma vaa ma. 8 Zɛnvu Ɲadegai ɠima ɓɔɛi wo fai veeʋɛ ta ya, Zɛnvu Ɲadega ɠila kpegi nɔ faaɠwɛ kpɔɛi ve taɠili zea. 9 Zɛnvu Ɲadega ɠilagi naa nɔ ɠa, é kidaaleʋei veai taɠili zea, Zɛnvu Ɲadega ɠilagi naa nɔ nu ɠɛdɛ vebɛanii ve taɠili zea. 10 Zɛnvu Ɲadegai ma zobogi veeʋɛ taɠili zea, é ɗa laavɔɔ vaiti kɛ, é vebɛanii ve taɠili zea, naa ɗa GALA gooi wo. É zɛnvuiti ta-vaiti zeeɠaaɠwɛ zobogi veeʋɛ taɠili zea. É ma zobogi veeʋɛ taɠili zea, é ɗa ɓɔɛ zii woo ɠiligiti su, é ma zobogi ve taɠili zea, é ɗa daawooleʋegi wo. 11 Zɛnvu Ɲadega ɠila kpegi ɓɔɠɔi nɔ ɠa, é niima vaiti kɛɛzu, é ɗa ti pɛ gaaɠwɛ nu ɠilagilagi ʋa, eɠɛʋelei é pɔ la.

12 Mazɔlɔɔ eɠɛʋelei kpusɛi la ɠila kpe nɔ, kɛlɛ baalobazuʋɛ mɔinɗai, tama kpusɛi ʋaalobazuʋɛ kpein, anɛɛ ni ti mɔinʋɛ, ta nɔ ga kpusɛ ɠilagi, zekana Kilista la. 13 Mazɔlɔɔ ade pɛ de ɓatizegɛ Zɛnvu Ɲadega ɠilagi zaalai zu, ga de ɠɛ ga kpusɛ ɠila, é ɠɛni ga Zuifuiti, é ɠɛni ga niiti ti la ga Zuifua, é ɠɛni ga duɔiti, é ɠɛni ga wɔɔlɔiti, de pɛ de ɓɔɔlea Zɛnvu Ɲadega ɠilagi naa ná-ziɛungi zu.

14 Zekana é la, kpusɛi ʋaalobazuʋɛ la ɠila nɔ, kɛlɛ mɔinʋɛ. 15 Ni nu ɠɔɠɔi a ɠɛna ma: «Gè la ga nu yeei, naa ma, gè la kpusɛi ʋa,» naa la ʋaazu kpeteʋezu kpusɛi ʋa. 16 Ni nu woii a ɠɛna ma: «Gè la ga nu ɠaazuɠɛzɛi, naa ma, gè la kpusɛi ʋa,» naa la ʋaazu kpeteʋezu kpusɛi ʋa. 17 Ni kpusɛi pɛ ge ɠɛni ga nu ɠaazuɠɛzɛi nɔ, nu a la ɗa faa mɛni ɠale? Ti pɛ ma ta la ɠɛna ga nu woii nɔ, nu a la ɗa aniiti makugi mɛni ɠale? 18 Gaamazu, GALA ge kpusɛi ʋaalobazuʋɛ ɠilagilagi pɛ togɛ ba, eɠɛʋelei é ɠɛni pɔ la. 19 Ni ti pɛ ti ɠɛni ga baalobazu ɠila kpe nɔ, mini ɠa kpusɛi a la ɠɛ ná? 20 Naa ɠa é ba, baalobazuʋɛ mɔinʋɛ, kɛlɛ kpusɛ ɠila kpe nɔ ʋe.

21 Nu ɠaazuɠɛzɛi la zooga é ʋa ɠɛ nu yeei ma: «Màavaa la è ʋa!» Nu ungi ɓalaa la zooga é ʋa ɠɛ nu ɠɔɠɔiti ma: «Màavaa la wo ʋa!» 22 Kɛlɛ tɔun, kpusɛi ʋaalobazuʋɛti zɛbɛ la ti zu, naati ka nu ɓɛdɛi ti ʋa. 23 Zɔiti de ti ʋɛtɛsu ga unfema wola la ti ʋɛ, naati ka da ɗa unfemai ve ti ʋɛ, é leʋe zɔiti ba. Zɔiti é la zolooni ga nu ti laaseigi wo, da ɗa naati so ga pagɔ, 24 kɛlɛ tɔun zɔiti maavaa la naa ʋa. GALA ge kpusɛi ɓɛtɛʋɛ ga kɛʋelei ta, nii a kɛ lɛbiyai ve naati bɛ, niiti ti ʋalagai ma, 25 naa ɠa a kɛ, zeeɠaaɠwɛɛzu mina ɠɛ kpusɛi ʋa, kɛlɛ kpusɛi ʋaalobazuʋɛti pɛ ti yiizoolɛ ga ɓɔɠɔ, ti ɠilagilagi pɛ. 26 Ni kpusɛi ʋaalobazuʋɛ ta ɠa taɓai zu, zɔiti pɛ ta zoolɛzu ga ɓɔɠɔ ga tɔun maaʋele. Ni kpusɛi ʋaalobazuʋɛ gila ga lɛbiya zɔlɔɔna, zɔiti pɛ ta ɠoozunɛ ga tɔun maaʋele.

27 Wa ga Kilista ɓusɛi, wa ga baalobazuʋɛti, ɛsɛ pɛ ta tosu. 28 Niiti GALA ge ti zeiɗai Egilisii zu, mɔunpa keelaiti, ná velesiɛi GALA goo wo nuiti, ná zaʋasiɛi kalamɔinti, naa ʋolu, niiti ti laavɔɔ vaiti kɛɛzu, naa ʋolu, niiti seeɓɛ nu ɠɛdɛ fai ma zobogi ti ya, ta kpɔba wo nuiti, ta niiti ti losu zɔiti tuɠɔ, ta niiti ti ɓɔɛzu zii woo ɠiligiti su. 29 Ɛsɛ pɛ ka nɛi é ga keelai ɓaa? Ɛsɛ pɛ ka nɛi é ga GALA goo wo nui ɓaa? Ɛsɛ pɛ ka nɛi é ga kalamɔin ɓaa? Ɛsɛ pɛ ka nɛi a ɗa laavɔɔ vai ɠɛ ɓaa? 30 Ɛsɛ pɛ ka nɛi nu ɠɛdɛ vebɛanii zea ɓaa? Ɛsɛ pɛ ka nɛi a zoo zii woo ɠiligiti bosu ɓaa? Ɛsɛ pɛ ka nɛi a zoo daawooleʋegi wosu ɓaa? 31 Naa ɠa é ba, à vebɛani ɓii golaiti wɔin ɠɛ.

Nà ʋaazu pele ʋagɔi lɛɛzu ga woye naazu, nii fizɔgai gola.