1 Naa ɠa é ba, à keleɠele ɲɔi ma zii pɛ too ya, ta yaava vai ma zii pɛ, ta wooveledai, ta tolo ɲɔi, ta tɔɠɔ ɠoloɠolo faiti pɛ. 2 À ɠɛ eɠɛ doun zɔlɔɔga niinɛiti, zɛnvu zu ɲiimiɗɛ ɠitei wɔin wo zo, naa ɠa a kɛ, wo wɔɔlɔ kizogi vaa zu ga tɔun maaʋele, 3 tɔɔzei wo pɛtɛga ʋelei Maliɠii ʋagai la.

4 À maaɓuɠa Maliɠii ʋa, kɔtui é vulua, nuiti ti ɠɛlɛni ba, kɛlɛ GALA ge yiimazeɠeni la, é deve ga fizɔgɛ gola gaazu. 5 À maaɓuɠa ba, wa ɓalaa, eɠɛ kɔtuiti ti vulua, é wo lo ga zɛnvu zu ʋɛlɛi, wo lo zalaɠa ɠulazu losu ɲadegai, ga wo ɗa zɛnvu zu zalaɠaiti kula, ti nɛai GALA bɛ, Yesu Kilista maaʋele ma. 6 Mazɔlɔɔ bogɛ GALA Sɛʋɛi zu ga:

«Wɛlɛ, nà kɔtu laazu Siyɔn,

sɔɓelama ɠɔtu wolai ɠɛ de,

ziimazeɠegi wogɛ da, fizɔgɛ gola,

zɔi a ɠidaaleʋe ma, é la unfega.»* bogɛ é zoloo Gɛlɛke woo zɛʋɛ wɔlɔmai ma.

7 Kɔtui tɛi tosuʋɛ wɔɔlɔʋɛ wo ʋɛ, wɔi wo ɠidaaleʋea, kɛlɛ kidaaleʋelala nuiti tetema:

«Kɔtui nii pɛlɛ lo nuiti ti ɠɛlɛni ba,

naa ɠa kɛai ga sɔɓelama ɠɔtu wolai,»*.

8 ta:

«kɔtui nii nu ɠɔɠɔ ɠa ziɠa ba,

fasai nu ɠa ɓunɛ ma.»*.

Ta ɠɔɠɔi ziɠazu ba, tɔɔzei ta ɠɛlɛzu ga ti mina ɠolo wooi ʋɛ, naa ma ka é leveni ti ma.

9 Kɛlɛ wɔun, wa ga zii ziimazeɠegi wogai da, Masagi ná-zalaɠa ɠula nuiti, zii ɲadegai, GALA ná-nuɓusɛiti. Wa ɠa GALA ge yiimazeɠeai ga woye, naa ɠa a kɛ wo ɗa ná-faa ʋagɔiti bo, nii é wo lolini, wo zeɠe kpidii zu, wo ʋa ná-wozakala pagɔi ɠa. 10 Mɔungi zu, wo la ɠɛni ga GALA ná-nuɓusɛa, kɛlɛ niizu wa niina ga ná-nuɓusɛiti. Mɔungi zu, wo la ɠɛni GALA ná-maawɔinɠai zɔlɔɔni, kɛlɛ niizu wo maawɔinɠai zɔlɔɔga.

11 Nɛ̀ɛɲɔɠɔiti, nà wo lɛnɛsu, tɔɔzei wa ga teʋekɔɠɔzu wɛɛinti eteai zu, à ɓeteʋe ɓɔɠɔyiimaiti ba ti ɲɛpii ɠɔɔzu wo-yɛnvui laalɔɠɔma. 12 À wo-ziɛ ʋelei ɓɛtɛ kidaaleʋelala nuiti saama, anɛɛ ni ta wo levezu ga faa ɲɔu ɠɛ nu, kɛɛɠeleɠele ge la ná, ta wa-ɠɛɛwoti ʋagɔiti ka, ta lɛbiyai ve GALA bɛ, voloi é ʋaazu la.

13 Maliɠii maaʋele ma, à ɓɔɠɔmaayei nuɓusɛiti ta-zobogi pɛ bɛ. À kɛ masagi ʋɛ, tɔ ɠa é devei unda, 14 wo kɛ zou zɛʋɛ ɠundiɠiiti bɛ, tiya ɠa ti leʋegai ga ti faa ɲɔu ɠɛ nuiti maaɠolo, ti faa ʋagɔ ɠɛ nuiti maamusɛ. 15 Mazɔlɔɔ GALA ziimai ɠa ga wo ɠimalala nuiti ta faaɠwɛtala nuiti daaɠulu ga faa ʋagɔi wo kɛɛzu. 16 À ziɛ é zoloo wɔɔlɔ ziɛi ma. Kɛlɛ à mina wa-wɔɔlɔyai ɠɛ ga faa ɲɔi maalɔɔɠu zeɠei. À ziɛ eɠɛ GALA ná-botiɠɛ nuiti. 17 À unfe nui pɛ ma. À wo-ɠɛɛleaiti nɛɛ ʋɛ. À lua GALA ba. À unfe masagi ma.

18 Botiɠɛ nuiti, à ɓɔɠɔmaayei wo-maliɠiiti bɛ ga unfemai pɛ, é la nɔ ga niiti ta-vai ɠaanɛai, ti-zɔgi ʋagai, kɛlɛ anɛɛ niiti ta-vai ɓaai, naati ɓalaa. 19 Mazɔlɔɔ toɠa ga faa ʋagɔi, ni kpɔlɔi a zeina nu ma kazemazu, nu ɠolo vai zu GALA bɛ. 20 Naama lɔnɔgi ɠa ga leeni, wo yiilɔɔ, ti wo zopele ɲɔu, tɔɔzei wa-ɠotoi ʋa? Kɛlɛ ni wa yiilɔɔ, wo kpɔlɔi zɔlɔɔ, wo faa ʋagɔi ɠɛa ʋoluma, naa ɠa ga faa ʋagɔi GALA gaazu. 21 Tama naa ɠa wo loligai ma, tɔɔzei Kilista ɓɔɠɔi ɓalaa ɓɔlɔni wo ʋɛ, é poo pagɔi yɛ wo ya, ga wo ʋilɛ kɔɠɔ ʋogiti ba. 22 É la ɠɛni koto nɔpɛ kɛɛni, nu nɔpɛ ge la ɠɛni zɛɛ ɓɔɛ mɛnini, é ʋa ɠula daaʋɛ. 23 É la ɠɛni poomu salani ga poomugi. Siɛgi zu ti ɠɛni maanɔɠɔzu la, é la ɠɛni kpaazaɠa nɔpɛ bosu, kɛlɛ é ɠɛni ná-fai pɛ zɛsu GALA zeezu, nii é tukpɔi ɠaaleʋezu ga telebodai. 24 Kilista ɓɔɠɔi da-ɠotoiti seɠeni kpusɛi zu saa wului ma, naa ɠa a kɛ, de zaa da-ɠotoiti ma, de zɛnvui wo telebodai ʋɛ. Tɔun ka ná-maawana ʋala ʋiliiti ti wo ɠɛdɛni. 25 Mazɔlɔɔ wo ɠɛni eɠɛ baalagiti ti loai ya, kɛlɛ niizu wo ɠalega ma baala makɛ nui ʋɔ bɛ, é ga wo-yɛnvuiti makɛ nui.