5 Kpidii, Ɠɔoɠɔ GALAGI ɠulani bɛ kɛlɛma segi zu Gaɓaɠɔn, é ɠɛ ma: «Nii wɔin è ma, dɛɛ, gè kɛ è ʋɛ.» 6 Salomɔn gooɠaaʋoteni, é ɠɛ ma: «È ɗa-wooɠɛɠilada wolai ɠulaʋɛ kɛlɛma ɗa-wotiɠɛ nui kɛ̀ɛ Davide ʋɛ, tɔ ɓalaa é ziɛ gaamai ta telebodai zu, naa ʋɛɛ sɔledai ʋa è ʋɛ. È naama wooɠɛɠiladai makɛga bɛ ga è doun zunu ve bɛ, nii é zeini za ná-masa kpɔkpɔgi ɠa. 7 Niizu niina, Ɠɔoɠɔ GALAGI nà-GALAGI, ɗa ɠa è kɛ̀a ga masagi, nɛ̀i gè ga ɗa-wotiɠɛ nui, kɛ̀ɛ Davide ʋotogi zu, nà ma, nà ga zunu loungo nɔ, nii é la zooni deve wosu. 8 Nɔ̀un nɛ̀i gè ga ɗa-wotiɠɛ nui, gè wɛlɛa nɔ, gè ɓɔɠɔ ɠa ɗa-nuɓusɛiti untuɠɔ, niiti è yiimazeɠeai ga tiye, ti mɔinɗai, nu la zooga ti ɠaalusu, è ʋa ti-lie kwɛɛ. 9 Naa ɠa é ba, ɠigi ve zèa, nɛ̀i gè ga ɗa-wotiɠɛ nui, nii nà lo da ɗa-nuɓusɛiti tuɠɔ, gè kwɛɛ nii pagai ta nii ɲɔuɗai. Mazɔlɔɔ ni naa laade, ɓɛ ɠa a zoo losu ɗa-nuɓusɛ mɔinmɔingi niiti tuɠɔ?»

10 Naama ƓALA falii Salomɔn kɛɛni, é nɛɛni Maliɠii ʋɛ. 11 GALA ge wooɠaaʋoteni, é ɠɛ ma: «Tɛi naa ɠa è falizu, è la sii zuɠooza valini ɓɔɠɔ ʋɛ, è la naavolo valini ɓɔɠɔ ʋɛ, è la ɓalaa è zili nuiti saa vai valini, kɛlɛ ɠigi ɠa è falizu, nii a kɛ è masadai ɠɛ ga telebodai, 12 nà è yiima vai laazeelizu, nii a kɛ ɠigi ɠɛ è ma, ta è ɠeleɠele, é leʋe naati ba, ti ɠɛa è luɠɔ, ta niiti ti ʋaazu è ʋoluʋele.