1 Samiyɛle 24

Davide ɠɛlɛ vai Sayile ʋaa vai ʋa

1 Davide zeɠeni miná, é li, é zei En-Gedi, adaʋɛti náti maazɔlɔɔsu ɓaai. 2 Sayile ɠalegai ma ma, é zeɠe Filisiti nuiti polu, é mɛnini ga Davide ɠa En-Gedi yooi ma leʋebai zu. 3 É yeeloni nu waasaʋagɔ (3.000) ʋa, niiti ti ga salaʋusu ɠɛzɛɠɛzɛgiti Izilayɛle yooi ná pɛ su. Tɔ-o, naati-yo, ti li Davide ta ná-kɔɔɠɔ nuiti gaiziɛzu, eyɛsu ti zeeli Dɔɓɔ Woliiti Ta-Vasaiti ma.

4 É zeelini baala sasai ma, nii é ɠɛni pele ɠobaʋɛ, pugi ta ɠɛni miná. Sayile lɔɔni pugi naa zu, ga é lɔ dɔɓɔ zu. Davide ta ná-nuiti ti ɠɛni pugi naa ɓomaʋɛ.

5 Davide ná-kɔɔɠɔ nuiti ti ɠɛni ma: «Pɛtɛ yeeɠɛɠalai ɠa nii Ɠɔoɠɔ GALAGI ma minazeɠe boni, ga é è zili nui lɔ è yeezu, nii a kɛ nii nɛai è ʋɛ, è naa ɠɛ la.» Davide wuzeɠeni, é li, é Sayile ná-seɠei laaʋɛ ta leʋe ba, Sayile la looni ga naa. 6 Davide naa ɠɛai ma, zii doɠani, tɔɔzei é Sayile ná-seɠe wolai ta leʋeni ba. 7 É ɠɛ ná-kɔɔɠɔ nuiti ma: «Ɠɔoɠɔ GALAGI màkɛ, ga gè mina nii ɠɛɠala vai ta ɠɛ eyɛsu pɛ, gè ʋa yeeloo màliɠii ma, nii Ɠɔoɠɔ GALAGI gulɔi ziaai ma, mazɔlɔɔ Ɠɔoɠɔ GALAGI ɠa é gulɔi ziaa ma.»

8 Davide ná-kɔɔɠɔ nuiti suzoni ga naama wooi, é la kɛɛni, naati ti ʋa vala Sayile ʋa. Sayile wuzeɠeni, é ɠula pugi zu, é ɗa li.

9 Naa ʋoluma, Davide wuzeɠeni, é ɠula pugi zu, é ʋilɛ Sayile ʋolu, é ɗa toli, é ɠɛ ma: «Ee, masagi! Màliɠii!» Sayile wɛlɛni ʋolu, Davide ʋilɛni ɲiibiɠa, é unpilɛ zooi ma, é nɔkɔ. 10 Davide ɠɛni Sayile ma: «Lee vaa zu è woilosu naati goo ma, niiti ti ɠɛɛzu è ma: ‹Davide ɠa pɔ é faa ɲɔu ɠɛ ga ɗe›? 11 Ɗa ɓɔɠɔi è naa ɠaa za ga è-ɠaazuɠɛzɛiti, ga Ɠɔoɠɔ GALAGI ɠɛa za è lɔɔni zèezu, pugi zu. Ti ɠɛa ɠɛni mà, gè è ʋaa, kɛlɛ gè è yɛgɛ ná, gè ɠɛ ma: ‹Gè la yeeloozu màliɠii ma, mazɔlɔɔ toɠa Ɠɔoɠɔ GALAGI yiimazeɠeai la, nii é gulɔi ziaai ma.› 12 Ee, kɛ̀ɛ, wɛlɛna ɗa-zeɠe wolai lakɔlɔgi ʋa, é zèa. Ni gè ɗa-zeɠe wolai lakɔlɔgi ta leʋea ba, kɛlɛ gè la è ʋaani, gaaɠa ga naa ga sili vaa la kìsu, ɓaa buzeɠe daalɔɠɔma vaa, gè la ɓalaa koto ɠɛɛni è laalɔɠɔma. Ɗɔun ka è gàiziɛzu ga è pàa. 13 Ɠɔoɠɔ GALAGI ɠa é ɠɛɛzu ga tukpɔɠaaleʋe nui de yɔɠɔzu, ɗa-o, nà-o. Ɠɔoɠɔ GALAGI ɠa nɔ̀nɔi ʋotokula è ma, kɛlɛ nɔ̀un gè la yeevɔɔɠuzu è ʋa. 14 Eɠɛʋelei faalaalii wɔlɔmai bosu la ga: ‹Suɲɔu nuiti nɔ ɠa suɲɔi ɠa ɗa ɠula ti zu.› Kɛlɛ, nɔ̀un, zèei la ɠɛa è laalɔɠɔma. 15 Ɓɛ ɠa mu Izilayɛle masagi liizu daalɔɠɔma ga kɔɔi? Ɓɛ ɠa è ʋilɛsu polu? Gilɛ ʋoomai, koe fɔfɔ goi nɔ. 16 Ɠɔoɠɔ GALAGI ɠa telebodai ɠɛ, tɔ ɠa é ɠɛɛzu ga tukpɔɠaaleʋe nui de yɔɠɔzu, ɗa-o, nà-o, toɠa màalobo, toɠa tukpɔi lo bɛ̀, é kùla è ya.»

17 Davide ɓegai ma ga naama ɓɔɛiti bo Sayile ma, Sayile gaazaɠani, é ɠɛ ma: «Dòun zunu Davide, ɗa ɓɔɠɔɓɔɠɔ ka gè è woomɛnisu nɛi ɓaa?» Sayile tɔɔzeini ga é ɗa wɔlɔ gola. 18 Naa ʋoluma, é ɠɛni Davide ma: «È lelebogɛ, é leʋe nɔ̀un ba, mazɔlɔɔ è nuɓɔɠɔlai ɠɛa bɛ̀, nɔ̀un gè faa ɲɔi ɠɛ ga ɗe. 19 È nuɓɔɠɔlai ɠula kɛlɛma za, nii è kɛɛzu bɛ̀, tɔɔzei Ɠɔoɠɔ GALAGI ɠɛa fèeni è ya, kɛlɛ è la pàani. 20 Ni nui ta a ɠulana sili nui viliba, toɠa ɗa zɛ ná, é li ɓɔɠɔ yeema ɓaa? Nii è kɛa bɛ̀ za, Ɠɔoɠɔ GALAGI ɓɔɠɔi naama ɠulanumai ve è ya. 21 Gè kwɛɛga niina ga, ɗa ɠɛɛzu ga masagi, Izilayɛle masadai ɠa zei ga pagɔ è yeezu. 22 Ɠonana bɛ̀, Ɠɔoɠɔ GALAGI laaseigi zu, ga è la màvofodai ɠaaleʋea, naa ʋoluma, è la kɛ̀ɛ ʋɛlɛi laaseigi ɓalega.»

23 Davide ɠonani Sayile ʋɛ. Sayile ɠaleni ma ná-taazu, Davide ɓalaa ta ná-kɔɔɠɔ nuiti ti ɠale ma ti-lɔɔɠuzuʋɛ.