1 Mina zelilo zunu ɓakologi ma, kɛlɛ iɲɔdɔ eɠɛ è-ɠɛɛ. Zinipoiti so eɠɛ è-ɠɛɛleaiti, 2 anzanu ɓakologiti eɠɛ è-leeni, anzalopoiti eɠɛ è-ʋaazeelaiti, naa ɠɛ ɲadedai pɛ su.

3 Unfe poanzaiti ma, niiti ti ga poanza ɠiteɠitegiti. 4 Kɛlɛ ni dounɠa ta poanzai ya, ɓaa dounlointi, naati maanɛɛʋɛ ti ta-ɠidaaleʋei lɛ mɔunpa ta-ʋɛlɛyeɠei letemazu. Kuyei ti zɔlɔɔ nuiti ti pɛa ti ma, ti naa zala, mazɔlɔɔ naa ɠa soloogai GALA gaazu. 5 Anzanui é ga poanza ɠiteɠitegi, nu nɔpɛ ge la bɛ, a naa maavai ɠɛ, kitogɛ GALA ba, é la ɗa ga ɓe GALA falii ʋa, é ɗa ná-kpɔbai ɠaiziɛ zea, folo ʋɛɛ kpidi ʋa. 6 Kɛlɛ poanza nii é ɓɔɠɔyiimai ɠɛɛzu, naa zaaʋɛ, anɛɛ ni toɠa dɛ vulua. 7 Naama vaiti ka ɗa ti lɛ ga tiye, naa ɠa a kɛ, peelalazu nɔpɛ ge mina ɠɛ ti ʋa. 8 Ni nui la ɠaaɓaani ná-nuiti ma, ma un ge daa ma mɛɛ ga ná-pɛlɛyeɠei wu nuiti, naa ɠɛlɛa kidaaleʋei ʋa, é ɲɔuɗa, é leʋe kidaaleʋelala nui ʋa.

9 Nii a kɛ poanzai laaseigi zɛʋɛ poanza zɛʋɛi zu, kɛni ná-konagi mina ɠɛ kona ʋuulɔzita (60) ɠɔɠɔwu, sinigi ɠɛai ga zunu ɠila kpe nɔ, 10 lɔɠɔ ʋagɔi ba ná-kɛɛwoti ʋagɔiti su, é ná-dointi kulaai su ga pagɔ. É ɠɛ ga nui nii é ɠɛni wɛɛinti sɛsɛbosu ga pagɔ, é ɗa GALA ná-nuiti kɔɠɔiti maagba, é ɗa ɓɔ maanɔɠɔ nuiti ba, ta é ɠɛ ga nui nii é ɠaaɓaani é kɛɛwoti ʋagɔi ma zii pɛ kɛ.

11 Kɛlɛ mina va bu, è ʋa poanzaiti sɛʋɛ gaalu sɛʋɛi zu, niiti ti ga nu niinɛiti, mazɔlɔɔ siɛgi zu ta-ɓɔɠɔyiimai sei zini bɛ wɔin ʋilisu la ti ma, ta ɓeteʋe Kilista ʋa, 12 ɛsɛ pɛ ka ɠɛ ti ʋeelalazu, tɔɔzei ti ta-minazeɠe mɔungi ɠoloɠologa, nii ti kɛɛni ga ta botii ɠɛ Kilista ʋɛ ti-zii ma voloi pɛ su. 13 Naa ʋoluma, tɛi faa la ti ma, ta ɗa leʋeteʋe niina pɛlɛiti bu, é la nɔ ga tɛi faa la ti ma, kɛlɛ ta ɠɛ niina ga zɔɠɔzuziɛ nuiti, ti-laaʋɛ ɠɛ faiti su, niiti ti la loni ti ʋa. 14 Naa ɠa é ba, nà pɔ ga poanzaiti ti ga nu niinɛiti, ti zei zini bɛ, ti dointi sɔlɔɔ, ti ɠaaɓa ta-ʋɛlɛyeɠeiti ma, ti mina yeeɠɛɠala ve ade zili nuiti zea, ti ʋa woo ɲɔu nɔpɛ bo ade ma. 15 Mazɔlɔɔ poanzai tanigaani ta niina ná, ti latiga, ti zeɠe pele zɔlegi ʋa, ti ʋilɛ Setana ʋolu. 16 Ni kidaaleʋe anzanui ta ɠa ná, poanzaiti ti zea, é ɠaaɓa, é ɗa ɓɔ ti ʋa, é mina ta-ɠasɔi la Egilisii unma, naa ɠa a kɛ, Egilisii zoo é ɓɔ poanzaiti ba, niiti zobo ge la ti ʋɛ.

17 Totuɠɔiti ti losu Egilisii luɠɔ ga pagɔ, naati maanɛɛʋɛ ti lɛbiya zeizu felegɔ zɔlɔɔ, ma un ge daa ma ga naati, niiti ti tɛnɛgi wosu ta kalagi. 18 Mazɔlɔɔ GALA Sɛʋɛi ɠa bosu, é ɠɛ ma: «Mina nikɛi laaʋɛ ɠili, a ɠɛna moloi ɠaalia ga.»*5:18 TSV 25:4. É bogɛ mɔnɔ, é ɠɛ: «Botiɠɛ nui maanɛɛʋɛ é zalai zɔlɔɔ.»*5:18 Luk 10:7. 19 Mina yeezei maalɔɔ vaa wu totuɠɔ laalɔɠɔma, kɛni zeele felegɔ ɓaa saʋagɔ ná-zeele wooi maaʋele ma. 20 Niiti ti ɠilizu kotoi ɠɛɛ vai ʋa, zelii lo ti ma ɛsɛ pɛ gaazu, naa ɠa a kɛ, zɔiti ɓalaa ti lua. 21 Nà niima ɠasɔi laazu è unma, GALA gaazu, Yesu Kilista ɠaazu, ta ná-geezuɠeelaiti gaazu, é yiimazeɠeai ga tiye, kɛni è niima levei tɛiti so, zeelɔzɔɠɔzu la ba, topolu vaa la su, naa pɛ su nii è kɛɛzu.

22 Mina zuvilɛ ga yeela nu nɔpɛ ma. Mina ʋɔɔpɛɛ è-wɔɔla ná-koto ʋa. Ɗa ɓɔɠɔi, ɓɔɠɔ makɛ ɲadedai zu.

23 Mina ɗa ziɛi letelegi nɔ ɓɔle, kɛlɛ è ɗa dɔɔi tago ɓɔle fɔɛn, tɔɔzei ɗa-ɠoozu zeeɓɛi ma vaa zu, é zeizeizu ma valafala.

24 Nui tanigaani ta-ɠotoiti ta laani kɛlɛi zu, aisa nu ʋa ti lukpɔɠaaleʋe, tanigaani ma ta-ɠotoiti ta ɗa ɠula kɛlɛma ná ʋoluʋelei nɔ. 25 Zenɔ ɠana é la, kɛɛwoti ʋagɔiti ta ɠaazu kɛlɛi zu, anɛɛ niiti nu la ti ɠaazu gaamago nɔ, naati ti la yɛga dɔɔɠuzu.