1 Fai pɛ ma yeeɠɛɠala ɠa ná,

fai kpein ná-yeeɠɛɠala ɠa ná geeɠɔlɔgi wu.

2 Yeeɠɛɠala ɠa ná nu zɔlɔɔ,

yeeɠɛɠala ɠɛ ná nu za.

Yeeɠɛɠala ɠa ná nu anii zin,

yeeɠɛɠala ɠɛ ná nii siingai, nu naa ɠula.

3 Yeeɠɛɠala ɠa ná nu paai wo,

yeeɠɛɠala ɠɛ ná è kɛdɛgi wo.

Yeeɠɛɠala ɠa ná nu pɛlɛi ɠolo,

yeeɠɛɠala ɠɛ ná è pɛlɛi lo.

4 Yeeɠɛɠala ɠa ná nu ɲɛ,

yeeɠɛɠala ɠɛ ná è wɔlɔ.

Yeeɠɛɠala ɠa ná nu saa wɔlɔi wo,

yeeɠɛɠala ɠɛ ná è kuai wo.

5 Yeeɠɛɠala ɠa ná nu kɔtuiti pili ya,

yeeɠɛɠala ɠɛ ná è ti yɛʋɛ.

Yeeɠɛɠala ɠa ná nu nɛɛnɛi wo,

yeeɠɛɠala ɠɛ ná è ɠɛlɛ nɛɛnɛi ʋa.

6 Yeeɠɛɠala ɠa ná nu anii ɠaiziɛ,

yeeɠɛɠala ɠɛ ná è too ya.

Yeeɠɛɠala ɠa ná nu anii makɛ,

yeeɠɛɠala ɠɛ ná è pili ya.

7 Yeeɠɛɠala ɠa ná nu anii ʋali ga,

yeeɠɛɠala ɠɛ ná è daɠa.

Yeeɠɛɠala ɠa ná nu maaɠɛ kpɔ,

yeeɠɛɠala ɠɛ ná è ɓɔɛ.

8 Yeeɠɛɠala ɠa ná nu nɛɛbɛi ɠɛ,

yeeɠɛɠala ɠɛ ná è wɔinzeɠemai ɠɛ.

Yeeɠɛɠala ɠa ná kɔɔi ɠɔ,

yeeɠɛɠala ɠɛ ná kɔɔi ɓe.

9 Kulanumai ɓɛgele ɠa botiɠɛ nui sɔlɔɔsu ná-kpɔlɔi zu? 10 Gè botiiti kaa, niiti GALA ge ti laai nuɓusɛiti unma. 11 GALA ge anii kpein kpɛtɛʋɛ ga pagɔ, é zoloo ná-yeeɠɛɠalai ma. É ɠɔoɠɔ fai ɠwɛɛ kisiɛi lɔɔʋɛ vɔlɔ nuɓusɛiti ziimaʋɛ. Tama ti la zoosu ti ʋa GALA ná-kɛɛwotii pɛ gaaɠa.

12 Gè kwɛɛgɛ naazu ga nii ɠila kpegi fizɔgai nuɓusɛi ma, naa ɠa ga, é ziimaɠɛɛi ta ɠɛ, ta é koozunɛ yeeɠɛɠalai ve ɓɔɠɔ ya sii ma voloi pɛ su. 13 Nu-o-nu é laamiizu, é ɓɔɔle, é ɠoozunɛ ná-botiiti su, GALA ka é naa vea bɛ.

14 Gè kwɛni ga nii kpein GALA ge kɛɛzu, ta yɛsu ná ɠɔ, nu la ta ʋɛa ba, nu ma ge la ta zeɠea ba. GALA ge naa ɠɛɛʋɛ, nii a kɛ nuɓusɛiti ti lɛbiyai ve bɛ. 15 Fai nii é ɠɛɛzu niizu, ta nii é ʋaazu ɠɛɛzu ʋelela ʋelei, naati kpein kɛɛʋɛ na wɔlɔwɔlɔi zu. GALA faaʋɛ bu ga faiti ti ɗa ɠale ma, ti ɠɛ ʋolu.

16 Gè niima vai ɓalaa kaaʋɛ zooi ɠa: Ʋɛ tukpɔi maanɛai ga é leʋe ná, ta telebodai zei ná, miná ɠa suɲɔulai zeini ná. 17 Gè ɠɛni ɓɔɠɔ ma naazu: «GALA ka ʋaazu nu ɲɔi ta telebo nui lukpɔɠaaleʋezu, mazɔlɔɔ fai pɛ ta kɛɛwotii pɛ ka ɠɛɛzu ná-yeeɠɛɠalai ma.»

18 Gè boni ɠisu ga GALA ka nuɓusɛiti poluɠulazu, é dɛɛ ga tiye ga ti la vizɔni suaiti ba. 19 Mazɔlɔɔ nu vului ta suai ti-ɠaaɓelazuʋɛ ɠa ga faa ɠila nɔ. Zɛnvu viilɛ ɠilagi nɔ ɠa é nuiti ta suaiti su, ti zeizu felegɔ pɛ ta zaazu. Tosu wola ɠili tɛi é ʋa ɠɛ nui ʋɛ, é ʋa leʋe suai ʋa, mazɔlɔɔ ti kpein ka ga wafuun faa nɔ. 20 Nii kpein é vulua, ti-liizuʋɛ ɠa ga ada ɠila nɔ, ti pɛ ta ɠalesu ma fufiligi zu, ʋɛ ti ɠulaai ná. 21 Ɓɛ ɠa é kwɛɛ, ni nuɓusɛi yɛnvui ɠa lɛɛzu geezuʋɛ, suai yɛnvui ɗa yei zooi wu?

22 Gè pɛtɛgɛ ga faa ɠili ge la vizɔni nuɓusɛi ma, kɛni é ɠoozunɛ ná-botii ma, naa ɠa é ga nɔnɔi. Mazɔlɔɔ ɓɛ ɠa a lo tuɠɔ, é ʋa naa ɠa, nii é ʋaazu ɠɛɛzu ga poluʋelei?