1 Mina ɓɔɛ ga suvilɛ, ta mina minazeɠe kɛ ga gaazuvilɛ GALA bɛ. Mazɔlɔɔ GALA ka geeɠɔlɔgi zu, ɗa ma, ɗa zooi ma, naa maaʋele ma, kɛni è ɓɔɛ wooi mina mɔin. 2 Mazɔlɔɔ kpɔɛzuɠula mɔinmɔingi ɠa ɠimalala ɓɔɛiti ta ɗa ɠula su, ʋelei nɔ se ɲɔuɲɔugi ɠa ɗa ɠula la ziizoolɛ mɔinmɔingi zu.

3 Ni ɗa minazeɠena GALA bɛ, daazeeli fala, mazɔlɔɔ GALA ge la wɔinni ga ɠimalala nuiti. Minazeɠegi nii è kɛa, naa laazeeli. 4 Fizɔgɛ ga è mina minazeɠe kɛ, è ʋa li ta ɠɛɛzu, ni è la daazeelini. 5 Mina va bu, è-laaʋɛ ʋa koto ɠasɔ wola la è unma. Mina ɠɛ zalaɠa ɠula nui ma: «Nà-minazeɠegi nii ɠa ga kaka faa.» GALA ka yiiɠaawana naazu è ɓɔɛ ʋelei vaa zu, é ɗa-ɠɛɛwotiiti pɛ suɠoloɠolo. 6 Mazɔlɔɔ kigaanɛ ɠisiɛ mɔinmɔingi ɠa ɗa ʋa ga kpɔɛzuɠula wolai é wosu nɔ fuun. Naa ɠa é ba, zuɓa, è lɛbiyai ve GALA bɛ.

7 É mina ɠɛ è ʋɛ ga kulafiliba, ni ɗa bala nui ɠaana, ti ɗa maanɔɠɔ, ta telebodai ʋɛɛ sɔledai ʋa, naati gaa ɗa ʋala ba zooi zu. Mazɔlɔɔ ɗa nu wolai ta ɠaazu, nii taɠili ge ɓaazu maazu, ta ti nu zeizu felegɔ pɛ nu ɠiligaa ɠa ti ɓaazu ti maazu. 8 Kɛlɛ ɛsɛ pɛ ná-kulanuma ɠa tiiɠɛɛi ʋa, masagi ɓɔɠɔgoi ná-fai pɛ ka naa nɔ zu.

9 Zɔi walii nɛai bɛ, walii la kula ɠɛa la pɛ,

niima kpɛtɛi wɔin ma, ma ɠulanumai la kula ɠɛa la pɛ.

Naa ɓalaa ka ga wafuun faa nɔ.

10 Anii ɠa mɔinna, mii nui ɠa ɗa mɔin,

kulanumai ɓɛgele ɠa é ani kɛɛ nui ʋɛ,

é ɠula gwɛlɛi ʋolu, é bosu ná-kpɛtɛi ʋa?

11 Botiɠɛ nui laamiini ga gola ɓaa tago nɔ,

toɠa ɗa ɲi ga pagɔ,

kɛlɛ naavolo nui ɠɔligi mɔin ʋelei maaʋele ma,

é la ɗa ga zoo é ʋa ɲi.

12 Gè faa ɲɔi ta ʋɛtɛgɛ mɔnɔ zooi ɠa: Naa ɠa ga nui ta ɠa naavoloi ɠaalɛɛzu ba, é ɠɛ ga ná-maanɔɠɔi. 13 A ʋalana naavoloi naa ma kpalai ta zu, doun zunui é sɔlɔɔsu, ani la mɔ ná, nii a makɛ naa ʋɛ. 14 Ʋelei kulaai la dee ɠoozu ga ɠabei, toɠa ɠale ma ɠana nɔ, ʋelei sɔlɔɔgai la, é la lia ga ná-botii zu ɠulanumai gila kpalaa. 15 Maanɔɠɔ vaa wola ʋe ga, é ɠale ma ga ɠabei, ʋelei nɔ paai la eteai zu. Kulanuma ɓɛgele ɠa é sɔlɔɔgai ná-botii zu? É botii ɠɛa nɔ fiilɛi ʋɛ. 16 Toɠa sii voloi pɛ kɛɛzu faa zuɓidiai zu, ziizoolɛ wolaiti ta ziiɠaawanaiti su, naa ʋɛɛ soolɛiti ba.

17 Nii gè kaai ga soloogɛ nuɓusɛi ma, naa ɠa ga: É laami, é ɓɔɔle, ta é ɠoozunɛ ná-botiiti ma, sii ma voloiti pɛ daawu, niiti GALA ge ti vea zea. Naa nɔ ɠa é ga nɔnɔi. 18 Tɔ vɔlɔ ka, ni GALA ka naavoloi ta kpɛtɛi veena nui ta ʋɛ, é zɛba é va bu, naa kulanuma zɔlɔɔ ba, nii maanɛai ga é sɔlɔɔ, é naa zɔlɔɔ ná-botii zu. GALA ka é naa vea bɛ. 19 Mazɔlɔɔ koozunɛɛi nii GALA ge puuzu ziimaʋɛ, naa ɠa kɛɛzu, é yeema ga sii ma voloiti suɓuɠaʋɛ.