1 Moize nɛkoi Zetelo, Madiyan zalaɠa ɠula nui, naa kpein mɛnini, nii GALA ge kɛɛni Moize ʋɛ ta ná-nuɓusɛi Izilayɛle nuiti, naa ɠa é ɠɛni ga Ɠɔoɠɔ GALAGI Izilayɛle nuiti kula vai Ezipete ʋa. 2 Moize nɛkoi Zetelo Moize anzai Sefola zeɠeni, nii Moize yeeɓeni ba, é li kɛɛɠɛ ʋɔ bɛ ʋolu, 3 ta ná-doun zunu felegɔiti ɓalaa, gilagi laaseigi ɠɛni ga Gɛɛlɛsome (nii poluʋɛ ga «seikɔɠɔmai»), mazɔlɔɔ Moize ɠɛni ma: «Nà ga seikɔɠɔma nui, gè zeini zou ɠili su.» 4 Zɔi laaseigi ɠɛni ga Eliyezɛɛl (nii poluʋɛ ga «nà-GALAGI ɓɔgɛ bà»), mazɔlɔɔ é ɠɛni ma: «Kɛ̀ɛ ná-GALAGI ɓɔgɛ bà, é ùnmɔɔ, é kùla Falaɠɔn ná-boɠa zɔkpɔi ya.»

5 Moize nɛkoi Zetelo liini teʋebai zu ga Moize ná-doun zunuiti ta anzai, ʋɛ é ɠɛni ʋuuni ná, GALA ná-gizei ɠoba. 6 É wooleʋeni Moize ma, é ɠɛ ma: «Nɔ̀un nà, è-nɛkoi Zetelo, pàaʋɛ è ʋɔ bɛ, ga è-anzai, é ʋɛɛ ná-doun zunu felegɔiti ba.» 7 Moize ɠulani é nɛkoi laaɠomi, é nɔkɔ bu, é nɛɛnɛ ga daaʋɛ komagai. Ti ɓɔɠɔ ɠaazaɠani ta-ɠɛdɛyaiti ma vaa ma, naa ʋolu ti lɛɛni Moize ná-seɠe ɠotai wu. 8 Moize naa kpein suɠulani nɛkoi ma, nii Ɠɔoɠɔ GALAGI kɛɛni ga Falaɠɔn ta Ezipete yooi Izilayɛle ná-faa zu, kpɔlɔiti kpein ti zeelini ti ma pelei zu, ta ʋelei Ɠɔoɠɔ GALAGI ti ɠulani la ti zu. 9 Zetelo ɠoozunɛɛni faa ʋagɔi kpein ma vaa zu Ɠɔoɠɔ GALAGI kɛɛni Izilayɛle nuiti bɛ, ta eɠɛʋelei é ti unmɔɔni la, é ti ɠula Ezipete nuiti zea. 10 Zetelo ɠɛni ma: «Mamagi ɠa Ɠɔoɠɔ GALAGI ʋɛ, nii é wo ɠula Ezipete nuiti zea, ta Falaɠɔn ya, nii é nuɓusɛiti kula Ezipete nuiti ta-zobogi ya! 11 Gè kwɛɛga niizu ga Ɠɔoɠɔ GALAGI wɔɔlɔʋɛ, é leʋe galagiti kpein ba, é naa ɠulani kɛlɛma, siɛgi zu Ezipete nuiti ti ɠɛni gaazumaavɔɔ vaiti kɛɛzu la ga Izilayɛle nuiti.» 12 Moize nɛkoi Zetelo gala zalaɠai ta zalaɠaiti kulani GALA bɛ. Aalɔn ta Izilayɛle ɠɛwolaiti kpein ti naama laamii woni ʋɔɔma ta Moize nɛkoi, GALA gaazu.

13 Poluma zobui, Moize zeini ga é nuɓusɛiti ta-lukpɔiti gaaleʋe. Nuɓusɛiti ti loni Moize ɠakala, é zo sobui ma, eyɛsu kpɔkɔi zeeli. 14 Nii kpein Moize kɛɛni nuɓusɛiti bɛ, nɛkoi naa ɠaani, é ɠɛ ma: «Lee ɠa è kɛɛzu niima nuɓusɛiti bɛ? Lee vaa zu è zeizu ɗa ɠila, nuɓusɛiti kpein ti loni è ɠakala, é zo sobui ma, eyɛsu kpɔkɔi zeeli?» 15 Moize nɛkoi wooɠaaʋoteni, é ɠɛ ma: «Toɠa ga nuɓusɛiti ka ti ʋaazu pɔ̀ ga ti GALA gaazaɠa. 16 Siɛgi zu fai ta ɠɛɛzu la ti ya, ta ʋaazu pɔ̀, gè tukpɔi ɠaaleʋe ti yɔɠɔzu, gè GALA ná-deveiti ta ná-tɔgiti dɛɛ.»

17 Moize nɛkoi ɠɛni ma: «Nii è kɛɛzu, naa la ʋani. 18 Ɗa ɓɔɠɔ suvikɛi ɓesu fala, ta niima nuɓusɛi ɓalaa é è ʋa, mazɔlɔɔ fai nii wuiʋɛ è-zɛbɛi ma. Ɗa ɠila è la zooga è ʋa kɛ. 19 Niizu, woilona gòoi ma, nà è lɛnɛsu, GALA ge ɠɛ è ʋa! Ɠɛ ga nuɓusɛiti gaazuʋɛ GALA koba, ɗa ɓɔɠɔi è li ga nuɓusɛiti ta-vaiti GALA pɔ. 20 Deveiti ta tɔgiti gaalɛ ga tiye, pelei lɛ ga tiye, nii maanɛai ti ʋilɛ ba, ta kɛɛwotii nii maanɛai ti kɛ. 21 Yiimazeɠe ga sɔɓelama zunuiti nuɓusɛiti kpein saama, ti luazu GALA ba, zunuiti ti ɠiliai gaamai ʋa, ti lobɛanii wɔinzeɠezu, è ti zeɠe, è ti zei nuɓusɛiti unda ga nu waagilagila kundiɠiiti, nu ungilagila kundiɠiiti, nu ʋuulɔɔludɔɔlu kundiɠiiti, ta nu ʋuupuu kundiɠiiti. 22 Ti ɗa nuɓusɛiti ta-lukpɔi ɠaaleʋe siɛnɔpɛ, ti ʋa ga faa ɓiigiti è ʋɔ, tiya ɓɔɠɔiti ti faa goiti ma lukpɔi ɠaaleʋe. Ta ɠula ɗa-ɠasɔi ma, wo seɠe ʋɔɔma. 23 Ni ɗa naa ɠɛɛna, GALA ge deveiti fe è ya, ɗa zoo è ziɛ bu ga pagɔ, niima nuɓusɛiti kpein ta zeeli ziilɛigi zu ti ʋɔ bɛ.»

24 Moize woiloni nɛkoi wooi ma, é naa kpein kɛɛni, nii naa boni ma. 25 Moize yiimazeɠe ga sɔɓelama zunuiti, Izilayɛle nuiti kpein saama, é ti zei nuɓusɛiti unda ga nu waagilagila kundiɠiiti, nu ungilagila kundiɠiiti, nu ʋuulɔɔludɔɔlu kundiɠiiti, ta nu ʋuupuu kundiɠiiti. 26 Ti ɠɛni nuɓusɛiti ta-lukpɔiti gaaleʋezu siɛnɔpɛ, ti ɠɛni ʋaazu ga faa ɓii golaiti Moize ʋɔ bɛ, tiya ɓɔɠɔi ti ɓena fai mɔtaiti ma lukpɔi ɠaaleʋe.

27 Moize ɓeni nɛkoi ʋa, é li, naa liini ná-zooi zu.