João 13

Yesu ná-kaladopoiti kɔɠɔiti maagba vai

1 Pake fɛtii maaɓuɠani niina. Yesu ɠɛni kwɛɛni ga yeeɠɛɠalai zeelia ga é ɠula eteai zu, é li Kɛɛɠɛ ʋɔ bɛ. Naa ɠa é kɛɛni, é poo gila feeni nɔnɔiti zea, niiti ti nɛai bɛ, tama ti eteai zu, é dɛɛ ga tiye ga ti nɛɛʋɛ bɛ eyɛsu gaaɓela foloi.

2 Pake daamii wo siɛgi zu, Inɛgi ɠɛni niina Yesu yaava vai lɔɔni Simon ná-doun zunui Zudase Isekaliyɔte ɠigi zu. 3 Yesu ɠɛni kwɛɛni ga Kɛɛɠɛ fai pɛ zɛgɛ tɔun zeezu, é ɠɛni kwɛɛni ɓalaa ga seɠeʋɛ GALA pɔ bɛ, é ʋa, tama toɠa na ɠale ma GALA pɔ bɛ. 4 É wuzeɠeni daami laɓalii ɠakala, é ná-seɠe maazu zeɠei ɠula ɠɔba, é zaamaɠili ga seɠe zakpai. 5 Naa ʋoluma, é ziɛi ʋuuni aniɲakai gila su, é tɔɔzei ga ná-kaladopoiti kɔɠɔiti maagbaa, é ɗa ti maaɓale ga seɠe zakpai, nii é gilini zaama.

6 Siɛgi zu é zeelini la Simon Piyɛlɛ ma, naa ɠɛni ma: «Màliɠii, ɗa pɔ è kɔ̀ɠɔiti maagba ɓaa?» 7 Yesu ɠɛni ma: «Nii gè kɛɛzu, è la dɛ gaaɠa niizu, kɛlɛ ɗa ʋaazu gaaɠaazu ʋelela ʋelei.»

8 Piyɛlɛ ɠɛni ma: «Gè la va bu, è ʋa kɔ̀ɠɔiti maagba pɛ!» Yesu ɠɛ ma: «Ni gè la è-ɠɔɠɔiti maagbani, ɗa-vaa la nà-faa zu.» 9 Simon Piyɛlɛ ɠɛni ma: «Màliɠii, ni naa ʋe, mina kɔ̀ɠɔiti nɔ maagba, kɛlɛ zèeiti ta nɔ̀ungi ʋɛɛ ba.»

10 Yesu gooɠaaʋoteni, é ɠɛ ma: «Zɔi kpegai na ga maagba, naa ɓɛdɛ la mɔ maagba vaa ɠili ba, kɛni nɔ é ɠɔɠɔiti maagba, mazɔlɔɔ ɲadegɛ niina fofo. Wo ɲadegɛ na, kɛlɛ wo pɛ taade.» 11 Tɔɔzei Yesu ɠɛni kwɛɛni nui nii é ʋaazu dɔɔzu sili nuiti zeezu, naa ɠa é kɛɛni é ɠɛni ɠɛɛzu ma: «Wo pɛ wo la ɲadeni.»

12 Kpegai ma ga ti-ɠɔɠɔiti maagba, é ná-seɠei loo ɠɔba, é zeini ʋolu taɓalii ɠakala, é ɠɛ ti ma: «Nii gè kɛai ga woye, wo gaaɠaaʋɛ nɛi? 13 Wa ɠɛɛzu nɔ̀un ma: ‹Kalamɔn› ta ‹Maliɠii,› tama wa naa wosu ga pagɔ, tɔɔzei nà ɓɔɠɔɓɔɠɔ ka gè ga naa. 14 Ni nɛ̀igi gè ga wa-ɠalamɔin, ta wo-Maliɠii, gè wo-ɠɔɠɔiti maagba, wa ɓalaagi à ɗa ɓɔɠɔ ɠɔɠɔiti maagba, wo ɠilagilagiti pɛ. 15 Mazɔlɔɔ poo ka gè fea wo ya, kɛni wa ɓalaa wo kɛ eɠɛʋelei gè kɛa la wo ʋɛ. 16 Gè bo wo ma ga gaamai, botiɠɛ nui la leʋeni maliɠii ʋa, ɓaa keelai ʋa leʋe naama nui ʋa, nii é teʋegai. 17 Ni wo naa ɠwɛni, wo undaanɛɛʋɛ ni wa kɛɛna.