1 Naama vaiti poluma, Maliɠii yeeloni kaladopo ʋuulɔfela maazu felegɔ (72) ɠiligaa ʋa, é ti leʋe luɠɔ ga nu velefele taaiti pɛ su, ta adɛti pɛ, ʋɛti tɔ ɓɔɠɔi ɠɛni ʋaazu liizu náti. 2 É ɠɛni ɠɛɛzu ti ma: «Molo mɔɔi wola zuwɔɔlɔʋɛ, kɛlɛ botiɠɛ nuiti ti la mɔinni. À kpala kɛɛ nui maanɛɛnɛ mu, é botiɠɛ nuiti teʋe ná-molo leʋezuʋɛ. 3 À li! Nà wo leʋesu eɠɛ baala ziʋoiti, zuluɓuiti saama. 4 À mina wali ʋuu ɓɔlɔ zeɠe ya, ɓaa ɓɔlɔ, ɓaa saʋala. À mina nɛkɛ pelei ma ga daalima vaa.

5 «Wa lɛɛna pɛlɛ nɔpɛ bu, à ɠɛ ma dɛ: ‹Ziilɛigi ɠɛ pɛlɛi nii ʋɛ!› 6 Ni ziilɛi nu ɠa pɛlɛi naa wu, wa-yiilɛigi ɠa yɛ ba. Ni naa laade, tɔun toɠa ɠaaɠale ma wo ʋɔ. 7 À yɛ pɛlɛi naa wu, ɠɔnɔ nɔpɛ ta fe wo ya, à mi, kpɔɔle ani nɔpɛ ta fe wo ya, wo naa ɓɔle, mazɔlɔɔ botiɠɛ nui maanɛɛʋɛ é zalai zɔlɔɔ. À mina ɗa ga wo laa ʋɛlɛi maavalibofalibo.

8 «Taai nɔpɛ wa lɛ su, ti yeezei wo wu, nii ta fe wo ya, à mi, 9 wo seeɓɛ nuiti balo, niiti ta ɠɛ ná, wo ɠɛ ti ma: ‹GALA ná-masadai maaɓuɠaa wo ʋa.› 10 Kɛlɛ taai nɔpɛ wo lɛɛzu su, ti la yeezeini wo wu, à li koi zaamaʋɛ, wo ɠɛ ma: 11 ‹Anɛɛ wa-laazuʋɛ vufiligi nii pɛai gi-ɠɔɠɔiti ma, gá kpukpunɛsu wo laalɔɠɔma. Naa pɛ poluma, à kwɛɛ ga GALA ná-masadai maaɓuɠaa.› 12 Gè bo wo ma, tukpɔɠaaleʋe voloi, taai naa ná-tukpɔi ɠa ɓaa, é leʋe Sɔdɔme nɔnɔi ʋa.

13 «Maanɔɠɔi ɠa è ʋɛ, Kolazɛn, maanɔɠɔi ɠɛ è ʋɛ, Ɓɛtesayida! Mazɔlɔɔ laavɔɔ vai niiti ti ɠɛai wo ʋɔ bɛ, ni naa ɠɛɠalai ɠɛɛni Tiil ta Sidɔn laaiti su, eɠɛ kaite ti zu nuɓusɛiti ti ti-ziɛ ʋelei maavaliboga, ti saa wɔlɔ wo seɠeiti too ɠɔba, ti zuʋui ʋu tɔungiti su. 14 Naa ɠa é ba, tukpɔɠaaleʋe voloi, wa-lukpɔi ɠa ɓaa, é leʋe Tiil ta Sidɔn laaiti tɔnɔi ʋa. 15 Ɗɔun, Kapɛɛlɛnawume, ɗa kaazu ga è-lɔɠɔi ɠa wɔɔlɔzu, è zeeli geeɠɔlɔgi zu ɓaa? Naa li poun! Ta è yei gɔvɛalaazu.»

16 Yesu ɠɛni kaladopoiti ma ʋolu: «Zɔi é woilosu wo-woo ma, naama nui woiloga gòo ma. Zɔi é ɠɛlɛzu wo ʋa, naama nui ɠɛlɛa bà. Zɔi é ɠɛlɛzu bà, naama nui ɠɛlɛa tèʋe nui ʋa.»

17 Kaladopo ʋuulɔfela maazu felegɔiti (72) ti ɠaleni ma ga koozunɛɛi, ti ɗa ɠɛ ma: «Màliɠii, inɛgiti ɓalaa ti ɠoloʋɛ gi ʋɛ è-laaseigi zu!» 18 Yesu ti wooɠaaʋoteni, é ɠɛ ti ma: «Gè Setana ɠaani, é ɗa ɠula geezuʋɛ, é ɗa loo bu eɠɛ mainmain. 19 Wɛlɛ, gè zobogi veeʋɛ wo ya ga wo ziɛ kaaliiti ta akuɠɔtɔkaaliiti ma, naa ʋɛɛ sili nui ná-zɛbɛiti pɛ ba. Ani nɔpɛ ge la faa ɲɔu ɠɛa ga woye. 20 Anɛɛ naa ʋe, à mina ɠoozunɛ tɔɔzei zɛnvuiti ti ɠoloni wo ʋɛ, kɛlɛ à ɠoozunɛ mazɔlɔɔ wo-laaseigiti ti zɛʋɛa geeɠɔlɔgi zu.»

21 Naama yeeɠɛɠalai nɔ, Zɛnvu Ɲadegai Yesu laaveni ga koozunɛɛi, é zɛba é ɠɛ ma: «Ee, Kɛ̀ɛ, geeɠɔlɔgi ta zooi Maliɠii, nà è mamasu, tɔɔzei è niima vaiti dɔɔɠua ɠima nuiti ta keleɠele nuiti ba, è ti lɛ ga naati, niiti ti yeemalɔigai. Gaamazu, Kɛ̀ɛ, ʋele ɠana nɛai la è ʋɛ. 22 Kɛ̀ɛ fai pɛ puuʋɛ zèezu. Nu nɔpɛ ge la Doun Zunui ɠwɛɛ, é ɠula Ɠɛɛɠɛi ʋolu, tama nu nɔpɛ ge la ɓalaa Ɠɛɛɠɛi ɠwɛɛ, é ɠula Doun Zunui ʋolu, ta naama nui nii Doun Zunui a ɠɛna pɔ é dɛɛ la.»

23 Naa ʋoluma Yesu latini ná-kaladopoiti ma yɛ, é ɠɛ ti ma: «Undaanɛ nu ɠa ga naama nuiti, niiti ti niima vaiti kaazu, niiti wo ti ɠaazu. 24 Mazɔlɔɔ gè bo wo ma, GALA goo wo nu mɔinmɔin, ta masa mɔinmɔingaa ti ɠɛni pɔ ga ti naa ɠa, nii wo kaazu, kɛlɛ ti la kaani, ti naa mɛni, nii wo mɛnisu, kɛlɛ ti la mɛnini.»

25 Tɔ kalamɔin gila ge wuzeɠeni Yesu zuɠɔɠɔ faa ma, é ɠɛ ma: «Kalamɔn, nà kɛ ɠale, gè ʋa ɠɔoɠɔ zɛnvui zɔlɔɔ ga nɔ̀nɔ?» 26 Naa gooɠaaʋoteni, é ɠɛ ma: «Leeni ɠa sɛʋɛai GALA ná-tɔgi zu? Ɗa gaaɠaazu ɠale?» 27 É Yesu wooɠaaʋoteni, é ɠɛ ma: «Ɗa Maliɠii ɗa-ƓALAGI nɛɛ ʋɛ, ga è-yii pɛ, ta è-yɛnvui pɛ, naa ʋɛɛ è-zuvikɛi ta ɗa-ɠisiɛi pɛ ba.*. Naa ʋoluma, ɗa è-zeiɲɔɠɔi nɛɛ ʋɛ, eɠɛ ɗa ɓɔɠɔi.»*. 28 Yesu ɠɛ ma: «È gaaʋotega ga pagɔ. Naa ɠɛ, ɗa zɛnvui wo.»

29 Kɛlɛ tɔ kalamɔin ɠɛni pɔ gaamai yɛ zea, é ɠɛni Yesu ma: «Ɓɛ ɠa mu é ga sèiɲɔɠɔi?» 30 Yesu gooɠaaʋoteni, é ɠɛ ma: «Zunui ɠila ge ɠɛni zeɠezu Zeluzalɛme, é ɗa yei Zeliko. Diai ma, toosu nuiti ti valani ba pelei zu, ti maavo, ti doɠa, ti li, ti zɛnvu go nɔ yɛ su. 31 É zoloo nɔ kpein, zalaɠa ɠula nui ta ɗa leʋe ga ná ʋelei, é zunui naa ɠaani, é leʋe koba. 32 Levi nui gila ɓalaa ge ʋaani adaʋɛ miná, é zunui naa ɠa, é leʋe koba. 33 Kɛlɛ Samali zunu ɠila ge ɠɛni liizu siɛi ma, é zeeli zunui ma. É kaai ma, naa maawɔin soni. 34 É maaɓuɠani naa ʋa, é gulɔi ta dɔɔi ʋu ná-palaiti ga, é ti ɠaaɠili. Naa ʋoluma, é tɛ tɔ ɓɔɠɔi ná-soovalegi ɠɔma, é lii la wɛɛn laazuʋɛ ʋɛlɛi wu, é ɠaaɓa ma. 35 Poluma zobui, é wali ɠae felegɔ ɠulani, é fe wɛɛn laazuʋɛ ʋɛlɛi wu wotiɠɛ nui ya, é ɠɛ ma: ‹Ɠaaɓa zunui nii ma, wali nii ɗa kwɛɛ, é la nii maazu, nà ɠalena ma, nà ɗɔnɔi ve.›

36 «Nu saʋagɔi niiti saama, è ɠaazu ɓɛ ɠa é ɠɛni ga zunui nii zeiɲɔɠɔi, nii toosu nuiti ti valani ba?» 37 Tɔ kalamɔin ɠɛni ma: «Zɔi é gaazumaawɔinɠaani.» Yesu ɠɛni ma: «Li, ɗa ɓalaa, è naa ɠɛɠalai ɠɛ.»

38 Ti ɠɛai ma pelei zu ta ná-kaladopoiti, Yesu lɛɛni taai ta zu. Anzanu ɠila ge ɠɛni miná, daa ga Maate, naa yeezeini bu ná-pɛlɛi wu. 39 Deɠei laaseigi ɠɛni ga Mali. Naa ʋaani, é zei Maliɠii ɠɔɠɔi wu, é ɗa woilo goo ma. 40 Maate ɠaazuvilɛni ga sɛsɛbo woti mɔinmɔin. É ʋaani Yesu ʋɔ bɛ, é ɠɛ ma: «Màliɠii, é la è ɠaazu ga faaɓaa, ga dèɠei nà ɠila zɛ botiiti ga? Bo ma mu, é ɓɔ bà.» 41 Gooɠaaʋotesuʋɛ, Maliɠii ɠɛni ma: «Maate, Maate, ɗa yiizoolɛzu, è ɗa ɓɔɠɔ ɓɔlɔ ga faa mɔinmɔin, 42 tama faa gila kpe nɔ ɠa é ga ma ɓiigi. Mali yiimazeɠea ga ma ʋagɔi, nii é la ɠulaa zea pɛ.»