1 É zɛba é ɠɛ ti ma: «Gè bo wo ma ga gaamai, tanigaa ta ʋɛ, ti la zaa, eyɛsu ti ɠaazula GALA ná-masadai ma, é ɗa ʋa ga zɛbɛ wolai.»

2 Folo lɔzita leʋegai ma naama vaiti poluma, Yesu Piyɛlɛ ta Zake zeɠeni, é ʋɛɛ Zan ʋa, é li ga tiye yɛ gize ɠaaɠooza golai ta ma. É valiboni ti ɠaazu, 3 kɔba zeɠeiti ti ɠole pepe, ti ɠole ʋelei maa ɗa volo, nu vulu nɔpɛ ge la zooga kɛɠala ani ɠole kulazu eteai nii zu. 4 Eli ta Moize ti ɠulani kɛlɛma kaladopoiti bɛ, ti ɗa yɛpɛ Yesu ʋɔ.

5 Piyɛlɛ ɓɔɛni Yesu ʋɔ, é ɠɛ ma: «Kalamɔn, soloogɛ ga ade yɛ ʋɛ. Gá kota saʋagɔ lo, gilagi ɠɛ ga ɗɔnɔi, gilagi ɠɛ ga Moize nɔnɔi, zɔi ɠɛ ga Eli nɔnɔi.» 6 É la ɠɛni kwɛɛni nii a bo, tɔɔzei dualuagi ti saʋagɔ pɛ daaveni.

7 Tonaɓiingi zeɠe geezuʋɛ, é ti maaɓidi. Wooi ta ɠulani naa zu, é ɗa ɠɛ ma: «Nii ɠa é ga nɛ̀ɛbɛ Loun Zunui. À woilo goo ma ɗɛ!» 8 Gaamago kaladopoiti ti ɠaazuwuzeɠeai ma, ti wɛlɛni, ti la mɔ nu ɠili nɔpɛ kaani ɠoba, kɛni Yesu ɠila nɔ.

9 Ti ɠɛai ma gizei yeizu, Yesu ti laa maaɓakpani ga ti mina naa wo nu nɔpɛ ma, nii ti kaani, aisa Nu ná-Doun Zunui ʋa wuzeɠe, é ɠula saai ya. 10 Ti ɠoloni naama levei ʋɛ, kɛlɛ ti ɠɛni ɓɔɠɔ ɠaazaɠasu naama wooi ʋoluʋɛ ma ga: «É wuzeɠe, é ɠula saai ya», naa ʋolu ɠa ga leeni?

11 Ti niima ɠaazaɠagi woni da, ti ɠɛ ma: «Lee vaa zu mu tɔ kalamɔinti ti ɠɛɛzu ma, kɛni mɔunpa Eli a ʋaana dɛ ʋolu?» 12 É ti wooɠaaʋoteni, é ɠɛ ti ma: «Gaama ʋe, Eli maanɛɛʋɛ ga é ʋa, é fai pɛ sei kpasu ga pagɔ. Kɛlɛ lee vaa zu mu, GALA Sɛʋɛi bosu ga kɛni Nu ná-Doun Zunui kpɔlɔ mɔinmɔin sɔlɔɔ, naa ʋoluma ti ɓaaɠula ma? 13 Kɛlɛ nɔ̀un, nà bosu wo ma ga: Eli mu paaʋɛ niina, kɛlɛ ti naa zoni ga ʋelei ti ɠɛni pɔ la, eɠɛʋelei GALA Sɛʋɛi ɓɔɛai la, é lo ba.»

14 Ti maaɓuɠaai ma kaladopoi zɔiti ba, ti bɛbɛ wolai ɠaani naati maaɠoolii zu, tɔ kalamɔinti ti ɠɛni kpɔɛi zuɠulazu ti ma. 15 Naama nuiti ti Yesu ɠaai ma nɔ feya, ti wola laavɔɔni, ti ɓizɛ ga daaɠomiga, tuʋɔ fai zu.

16 É kaladopoiti gaazaɠani, é ɠɛ ti ma: «Lee ɠa wo suɠulazu, wa nuuti?» 17 Bɛbɛi naa zaama zunui ta gooɠaaʋoteni, é ɠɛ ma: «Kalamɔn, pàaʋɛ è ʋɔ ga dòun zunui, mazɔlɔɔ zɛnvu ɲɔi ɠa ɗa zeɠe la, é kɛ ga ɓoɓoi. 18 Ʋɛ nɔpɛ zɛnvu ɲɔi ɠa seɠena ná, toɠa ɗa foɓe zooi ma, doungoi laaɗɛ ɲagi ɗa ʋu, é ɗa ɲiigaiti siɛ ga, é ɓaa su soolii. Gè ɗa-ɠaladopoiti maanɛɛnɛʋɛ ga ti kpɛ su, kɛlɛ ti la zooni.»

19 Yesu ɠɛni ti ma: «Ee, kidaaleʋelala nuɓusɛiti, nà yɛsu wo ʋa dɛ, eyɛsu yeelɛ? Nà yeezei wo wu, eyɛsu yeelɛ? À ʋa pɔ̀ ga doungoi.» 20 Ti ʋaani ga doungoi pɔ. Tɛi zɛnvu ɲɔi Yesu ɠaani nɔ feya, é doungoi ɓalini ga gola, é foɓe zooi ma, naa ɗa ɠilikili zooi ma, daaɗɛ ɲagi ɗa ʋu.

21 Yesu doun kɛɛɠɛi ɠaazaɠani, é ɠɛ ma: «Nii tɔɔzeiʋɛ siɛ kpɛgele zu?» Doun kɛɛɠɛi ɠɛ ma: «Kaite ma loungo ziɛ su. 22 Yeeɠɛɠalai tanigaa zu vɔlɔ inɛgi ɠa ɗa daaʋili abui zu, ɓaa ziɛi wu, nii a kɛ é naa ʋaa. Ni ɗa zoo faa ɠɛɛzu su, gi ɠaazumaawɔinɠa, è ɓɔ gi ʋa!» 23 Yesu gooɠaaʋoteni, é ɠɛ ma: «Lee vaa zu è ɠɛɛzu ma: ‹Ni ɗa zoo faa ɠɛɛzu su?› Fai pɛ ka ga kɛɛ vaa naama nui ʋɛ, nii ladalai zea.» 24 Gaamago doun kɛɛɠɛi wooɠulani, é ɠɛ ma: «Dàaʋɛ da, kɛlɛ ɓɔ bà kae nà-ladalalai zu!»

25 Yesu bɛbɛi ɠaai ma, é ɗa ɠaalɛ ba ti ɠoba, é devei veeni kɔzɔba yɛnvui ya ga sɛbɛi, é ɠɛ ma: «Ɗa ʋe zɛnvu ɲɔi, ɗɛi è nui woizuɓɔlɔzu, è kɛ ga ɓoɓoi, gè devei vea è ya ga è ɠula doungoi nii zu, è mina mɔ ɠale ma ʋolu, è ʋa lɔ su pɛ-o!» 26 Inɛgi kpee wolai looni, é doungoi ɓali ga zeeɠaaɓaai, é ɠula naa zu. Doungoi yɛni laani eɠɛ a za. Zɔiti vɔlɔ ti ná ɠaani, naati ti ɗa ɠɛ ma: «É zaa.» 27 Kɛlɛ Yesu doungoi zoni zeei ʋa, é buzeɠe, naama ge wuzeɠe, é lo ɠɔɠɔiti ga.

28 Yesu lɛai ma pɛlɛi wu, tɛi ti maaɠelesa ge leʋeni ta ná-kaladopoiti, naati ti gaazaɠani, ti ɠɛ ma: «Lee vaa zu gi la zooni gi ʋa niima inɛgi ɓɛ?» 29 É ti wooɠaaʋoteni, é ɠɛ ma: «Nu la ɗa ga zoo nii ɠɛɠala inɛgi ɓɛɛzu kɛni GALA falii.»

30 Ti zeɠeai ma miná, ti Galilé yooi maaɓudɛni, kɛlɛ Yesu la ɠɛni pɔ ga nu suɠwɛɛ, 31 mazɔlɔɔ é ɠɛni ná-kaladopoiti kalasu. É ɠɛni ɠɛɛzu ti ma: «Nu ná-Doun Zunui ɠa ʋaazu lɔɔzu nuiti zeezu, ti paa. Kɛlɛ folo saʋagɔ saai ʋoluma, toɠa wuzeɠe, é ɠula saai ya.» 32 Kɛlɛ naati mu ti la ɠɛni naama ɓɔɛi ɠaaɠaani, tama ti ɠɛni luazu ga ti ʋa gaazaɠa.

33 Ti zeelini Kapɛɛlɛnawume. Siɛgi zu ti ɠɛni la pɛlɛi wu, Yesu ti ɠaazaɠani, é ɠɛ ma: «Leeni ɠa wo ɠɛa suɠulazu pelei zu?» 34 Kɛlɛ ti maaɠɛni kpɔ, tɔɔzei ti ɠɛai ma pelei zu, ti ɠɛni yɛpɛzu, ti ɗa ɓɔɠɔ ɠaazaɠa ga ti zaama, ɓɛ ɠa bɔɔlɔai ti pɛ ba.

35 Yesu zeini, é zɛba é keela puugɔ maazu felegɔiti (12) toli, é ɠɛ ti ma: «Zɔi nɔpɛ é pɔ ga é ɠɛ ga nu mɔungi, kɛni dɛ é ɠɛ ga nu ɠaaɓelagi, ta é ɠɛ ga ɛsɛ pɛ ná-botiɠɛ nui.»

36 Naa ʋoluma, é doungoi ta zeɠeni, é pilɛ ti zaama. É naa nɛɛnɛni, é ɠɛ ti ma: 37 «Zɔi nɔpɛ a yeezei doungoi ta wu eɠɛ nii, nɔ̀un maaʋele ma, naama nui yeezeiɗa bù, nà ɓɔɠɔi. Zɔi a yeezei bù, nà lɛi é ʋa yeezei bù, kɛlɛ nui é tèʋegai, naa ɠa é yeezeiɗai bu.»

38 Zan ɠɛni ma: «Kalamɔn, gi zunui ta ɠaaʋɛ, é ɗa inɛgiti kpɛ è-laaseigi zu. Gi ɠɛni pɔ ga gi pele leʋe tuɠɔ, mazɔlɔɔ é la ʋilɛsu ade ʋolu.» 39 Kɛlɛ Yesu ɠɛni ma: «À mina pele leʋe tuɠɔ, tɔɔzei nu nɔpɛ ge la zooga é ʋa laavɔɔ vaa ɠɛ dàaseigi zu, kpega ʋoluma nɔ feya ga woo ɲɔiti bo dàalɔɠɔma. 40 Zɔi é la ade laalɔɠɔma, naa ɠa ade ʋa. 41 Zɔi nɔpɛ é ziɛ ɠɔɠɔ ɲɛ gila feezu wo ya ga wo ɓɔɔle, tɔɔzei wa ga Kilista nɔnɔ, gè bo wo ma ga gaamai, naama nui la ʋalaga ná-kulanumai ma.»

42 «Doungoi niiti kpein ti laai nɔ̀un da, zɔi nɔpɛ a ti ɠila kpalaa toona kotoi zu, a la vizɔ naama nui ma ga kɔtu wolai ɠili kɔgi ʋa, ti pili kpoloɗɛi wu. 43 Ni è-yeei ɠa é è loozu kotoi zu, teʋe ɓɔɠɔ ʋa. Tɔɔzei fizɔgɛ è ma ga è lɔ ɠɔoɠɔ zɛnvui zu ga è maalɛɠɛfɛgai, kɛlɛ è-yee felegɔi mina yɛ è ʋa, è ʋa li undaaʋili abui zu, nii é la zaazu pɛ. 44 [Miná, koegi niiti ti nuiti miizu ná, ti la zaa pɛ, ta abui ɓalaa la zaa ná pɛ.]* 45 Ni è-ɠɔɠɔi ɠa é è loozu kotoi zu, teʋe ɓɔɠɔ ʋa. Tɔɔzei fizɔgɛ è ma ga è lɔ ɠɔoɠɔ zɛnvui zu ga è maalɛɠɛfɛgai, kɛlɛ è-ɠɔɠɔ felegɔi mina yɛ è ʋa, è ʋa ʋili undaaʋili abui zu. 46 [Miná, koegi niiti ti nuiti miizu ná, ti la zaa pɛ, ta abui ɓalaa la zaa ná pɛ.]* 47 Ni è-ɠaazuɠɛzɛi ɠa é è loozu kotoi zu, kula su. Tɔɔzei fizɔgɛ è ma ga è lɔ GALA ná-masadai zu ga è-ɠaazu ɠila kpe nɔ, è-ɠaazuɠɛzɛ felegɔiti gaavɔnigai ʋa yɛ è ya, ɗa ma è ʋili undaaʋili abui zu. 48 Miná, koegi niiti ti nuiti miizu ná, ti la zaa pɛ, ta abui ɓalaa la zaa ná pɛ. 49 Tɔɔzei abui ɠa ʋu ɛsɛ pɛ ba eɠɛ kpoloi. 50 Kpoloi ʋagɛ. Kɛlɛ ni kpoloi ná-ɲɛmigi ɠa ɠulana ba, nu ɠa leʋe ɠale, é ʋa nɛɛ ʋolu? Kpoloi maanɛɛʋɛ é ɠɛ wa ɓɔɠɔi wo-ɠɔlɔ su, naa ʋoluma ziilɛigi ɠɛ wo pɛ wo yɔɠɔzu.»