Mateus 21

Yesu lɛɛ vai Zeluzalɛme

1 Siɛgi zu ti maaɓuɠani la Zeluzalɛme ʋa, ti zeelini Ɓɛtefazé taa goi ɠobaʋɛ, Wolive wulu ɓelei ma ɠizei ɠobaʋɛ. Yesu ná-kaladopo felegɔ leʋeni, 2 é ɠɛ ti ma: «À li taa goi nii zu, é wo luɠɔ. Wa lɛɛna nɔ feya, wa soovale saai ta ɠaazu, giliai, ma yiʋoi loni koba. À ti vie, wo ʋa ga tiye pɔ̀. 3 Ni nu a faa wona wo ma, à ɠɛ ma nɔ: ‹Màliɠii ɓɛdɛi ɠa ti ʋa.› Gaamanɔ toɠa ti yɛna, ti li.»

4 Nii ɠɛɛni, naa ɠa a kɛ, nii GALA goo wo nui boni ma yeeluɠɔ, naa laazeeli ga:

5 «À ɠɛ Siyɔn nuɓusɛi ma:

Wɛlɛ ɗa-masagi ʋa, é ʋaazu è ʋɔ,

é ga ɓɔɠɔmaayei nu, é zeini soovale saai ɠɔma,

soovale saai ma yiʋoi ɠɔma.»*21:5 Eza 62:11; Zkl 9:9.

6 Kaladopoiti ti liini, ti ziɛ ga naa nɔ, nii Yesu boni ti ma. 7 Ti ʋaani ga soovale saai ta ná-ziʋoi, ti ta-zeɠe wolaiti pɛɛni ti ɠɔma, Yesu lɛ, é zei kɔma. 8 Bɛbɛi zaama nu mɔinmɔin ge ɠɛni ta-zeɠe wolaiti pɛɛzu pelei zu, tanigaa ti ɗa gulu ɓekegiti teʋe, ti ɗa ti ʋɛɛ pelei zu. 9 Bɛbɛi nii pɛ é ɠɛni ziɛzu Yesu luɠɔʋelei, ta poluʋelei, ti ɠɛni wooɠulazu, ti ɗa ɠɛ ma:

«Ozana*21:9 Ozana: Maamusɛ wooi nii poluʋɛ ga «kizo fai ve». Davide ná-Doun Zunui ʋɛ!

Maliɠii tuya loo naama nui ʋɛ, nii é ʋaazu daaseigi zu!

Ozana GALA bɛ geeɠɔlɔgi ungaʋɛ!»

10 Siɛgi zu Yesu lɛɛni la Zeluzalɛme, taa nuiti pɛ ti ɠɛni wuulee, ti ɗa ɠɛ ma: «Ɓɛ ɠa ga nii?» 11 Bɛbɛi nii é ɠɛni polu, naati ti ɠɛni ti wooɠaaʋotesu, ti ɗa ɠɛ ma: «Galilé yooi zu Nazalɛte ƓALA goo wo nui Yesu ʋe.»