1 Salomɔn é ɠɛni ga Davide ná-doun zunui, ta Izilayɛle masagi, naa ná-tɛnɛ faalaaliiti:*1:1 Faalaali laaseigi, ta Salomɔn laaseigi ma vaa zu, wɛlɛ sɛʋɛi lɔɔzeizuʋɛ.

2 Ti ɠɛ ungi ɠa ga ti nu ɠala ga ɠimalai, ti nu ɠɛʋele ɓɛtɛ,

é kpɔɛiti gaaɠa, niiti ti woni ga keleɠelegi.

3 Ti nui ɠala ga siɛ ʋelei ná-eteai zu, keleɠelegi ʋɔ,

é lelebo, é zɔle, é zoloo su.

4 Ti ɠi pagɔi ve naati zea, niiti ti la dɛ faa mɔinmɔin kwɛni,

ti faaɠwɛgi ta kidafaawui ve zunu loungoiti zea.

5 Ɠima nui woilo, toɠa ta ɓɔ ná-soofaalai ʋa,

zɔi keleɠelegai, naa ɠa ziɛ ʋele ʋagɔi zɔlɔɔ.

6 Ta zoo ti tɛnɛ faalaalii ma lɔɔɠuzu vai tanigaani kwɛɛ,

ta ɠima nuiti daawooiti ma lɔɔɠuzu vaiti poluʋɛti.

7 Ɠɔoɠɔ GALAGI ɠaazuluabai ɠa é ga faaɠwɛgi lɔɔzeizuʋɛ,

faaɠaaɠalala nui ɠa ɗa ɠimalai ʋɛlɛʋɛlɛ ta kalagi.