Rute 3

Lute ná-maanɛɛnɛi

1 Yeeta Lute deemɔɔn Naomi ɠɛni ma: «Dòun anzanu, nà pɔ gè è zei ʋele ɓɛtɛ, naa ɠa a kɛ è ɠɛ undaanɛɛi zu. 2 È kwɛni ga Ɓoaze nii è ɠɛa ná-botiɠɛ anzanuiti ba, naa ɠa ga da-nui ta. Tama za kpɔkɔi, toɠa liizu moloi ɠaavɛɛzu, ná-molo loɠazuʋɛ. 3 Maagba, è gulɔ maku nɛɛnɛgi ziɛ ɓɔɠɔ ma, è ɗa-zeɠe ʋagɔiti too, è yei molo loɠazuʋɛ. Mina ɓɔɠɔ lɛɛ la, eyɛsu é ɓe ga daamii wo, é ɓɔɔle. 4 Siɛgi zu é liizu la, é la, ná ʋɛtɛ, ʋɛ é laazu ná. Naa ʋolu maaɓuɠa ba, è seɠei tago wuzeɠe kɔɠɔiti ma, è la. Tɔ ɓɔɠɔgo, toɠa naa wo è ma, nii maanɛai ga è kɛ.» 5 Lute gooɠaaʋoteni, é ɠɛ ma: «Nà naa kpein kɛ, nii è boga mà.»

6 É yeini molo loɠazuʋɛ, é naa kpein kɛɛni, nii deemɔɔn deveni ma. 7 Ɓoaze laamiini, é ɓɔɔle, koozunɛɛni ziimaʋɛ. É liini, é la molo ɠiliiti poluʋɛ. Lute ʋaani naazu vaavaa, é seɠei zeɠe kɔɠɔiti ma, é la. 8 Kua zaamai, zunui naa wuunni kami, é lati, é ka ga anzanui ta ɠa laani kɔɠɔiti bu. 9 É ɠɛ ma: «Ɓɛ ɠa ga ɗe?» Naa gooɠaaʋoteni, é ɠɛ ma: «Nà ʋe, Lute ʋe, ɗa-wotiɠɛ anzanui. Ɓaa màazu, mazɔlɔɔ ʋelei è la ga gi ɓɔɠɔ nu, unmɔɔ fai ma losuʋɛ veeʋɛ è ya nɔ̀un tetema.»

10 É ɠɛni ma: «Ɠɔoɠɔ GALAGI tuya loo è ʋɛ, dòun anzanu! Faa ɠaaɓelagi nii ɠa ɗa-wooɠɛɠiladai lɛɛzu mɔnɔ, é leʋe ma mɔungi ʋa, mazɔlɔɔ è la nu niinɛiti gaiziɛni, bala nua, ɓaa kpɛtɛ nua. 11 Niizu, dòun anzanu, mina lua ɲɛgɛlɛin. Nà naa kpein kɛ è ʋɛ, nii è bosu, mazɔlɔɔ nuɓusɛ pɛ ge suɠwɛɛ ga ɗa ga anzanu zɔɓelama. 12 Gaamai ʋe ga unmɔɔ fai ma losuʋɛ ɠa zèa, kɛlɛ taɠili ka ná, nii é nɔ̀un tuɠɔ. 13 Ɲi ʋɛ. Lina, ni toɠa pɔ é unmɔɔ fai ma losuʋɛ ɠɛ è ʋɛ, é kɛ. Kɛlɛ ni é la nɛɛni bɛ ga é kɛ è ʋɛ, gè ɠona Ɠɔoɠɔ GALAGI ma, nii é vulua, nɔ̀un, nà kɛ è ʋɛ. Yɛ laani eyɛsu sobu.»

14 É yɛni laani kɔɠɔiti bu eyɛsu sobui. É wuzeɠeni ga kpidiɓidigi, nu la dɛ zooga è ʋa nu maaɓɛɛɠaga ɠa. Mazɔlɔɔ Ɓoaze ɠɛni ma: «Maa la nɛɛni ga nu ʋa suɠwɛɛ ga anzanu lɛɛʋɛ molo loɠazuʋɛ.» 15 É ɠɛni ma: «Ɗa-zeɠe wolai zuvie, è so.» É soni. Naa su lɔzita ɠɔɠɔni moloi zu, é pu su, é daalɛ bu. Naa ʋolu é lɛɛni taazu.

16 Lute ʋaani deemɔɔn ʋɔ bɛ. Naomi ɠɛni ma: «Ɗa ʋe ɓaa, dòun anzanu?» Lute naa kpein suɠulani, nii zunui naa kɛɛni bɛ. 17 É ɠɛni ma: «É su lɔzita veeʋɛ bɛ̀ moloi zu, é ɠɛ mà: ‹È la lia ga yeaɲaka è-leemɔɔn ʋɔ bɛ.› » 18 Naomi ɠɛni ma: «Yɛ ʋɛ, è yiilɛi, dòun anzanu, eyɛsu è kwɛɛ ʋelei niima vai ʋaazu ɓesu da, mazɔlɔɔ zunui nii la dooɠo nɔpɛ boga ɲɛgɛlɛin, kɛni a niima vai ɠaaɓelana za.»