1 Ɗɔun ɗa, kalagi wo, é zoloo kala pagɔ ɠitei ma. 2 Bo zunu ɓakologiti ma, ga ti ɠɛ ga sɔɓelama nuiti, unfema nuiti, kidafaawu nuiti, ti loni kpaan kidaaleʋei zu, nɛɛbɛi zu, ta ziilɔɔi zu. 3 Bo ɠana nɔ anzanu ɓakologiti ma, ga ti-ziɛ ʋelei zoloo ɲadedai ma. Ti mina nu lɔɠɔ ɠoloɠolo faa ɠɛ, ti mina ɓɔɠɔ ve dɔɔi ya. Ti maanɛɛʋɛ, ti ɗa tɛnɛ pagɔiti bo, 4 naa ɠa a kɛ ti anzalopoiti kala ga ti ti-zinigiti nɛɛ ʋɛ, ta ti-lointi, 5 ta ti ɠɛ ga kidafaawu nuiti, ti ɲade, ti ɠaaɓa ta-ʋɛlɛi ma, ti ɠɛ ga nu ʋagɔ, ti ɓɔɠɔmaayei ti ɓɔɠɔ zinigiti bɛ, naa ɠa a kɛ nu mina woo ɲɔu wo GALA daawooi laalɔɠɔma.

6 Zinipoiti tɛnɛ ɓalaa ga ti ɠɛ ga kidafaawu nuiti fai pɛ su. 7 Ɓɔɠɔ lɛ ɗa ɓɔɠɔi ga poogi, kɛɛwoti ʋagɔi pɛ faa zu. Ɗa-ɠalagi è bosu, é ɠɛ ga sɔɓelama vaa, unfemai ɠɛ su, 8 kpɔɛiti bo niiti ti zɔlegai, nu la zooga é ʋa baaɠula, naa ɠa a kɛ è zili nuiti ti unfe, tɔɔzei ti la woo ɲɔu nɔpɛ sɔlɔɔga, nii ta bo ade laalɔɠɔma.

9 Duɔiti tɛnɛ ga ti ɓɔɠɔmaayei ta-luɔ kɛɛɠɛiti bɛ, ti ti ɛnɛkɛ fai pɛ su. Ti maa la nɛɛni, ti ʋa ɗa naati maaɠaali, 10 ti mina ani nɔpɛ unma ti ya, kɛlɛ ti dɛɛ yeenɔpɛ ga ta ga nu ʋagɔ, ti ɠɛ ga wooɠɛɠila nuiti, naa ɠa a kɛ ti lɛbiyai ve ade Ɠizo Nui GALA ná-kalagi ʋɛ fai pɛ su.

11 Mazɔlɔɔ GALA ge ná-zaalai ɠulani kɛlɛma, nii é kizogi veezu nuɓusɛiti pɛ bɛ. 12 Toɠa de ɠalasu ga de ɠɛlɛ GALA gaazuluabalala vaiti ba, ta eteai ma ɠaazuɠulapɔ vaiti, de niima eteai ziɛ kidafaawui ta telebodai zu, de eteai ziɛ GALA gaazuluabai zu. 13 Pele ɠana de maanɛai de undaanɛ voloi maaɓɔun da, nii de ɠitogai ba, yeei ada-ƓALA golai nii é ga de Ɠizo Nui Yesu Kilista ná-lɛbiyai ɠulazu la kɛlɛma. 14 Yesu Kilista naa ɠa é ɓɔɠɔ veeni ada-vaa zu, é de unmɔɔ, é de ɠula tɔ koloɠolo fai pɛ zea, é de ɠɛ ga nuɓusɛiti é ti ɲadegai, ti ɠɛ ga nɔnɔiti, ti zɛbɛzeɠezu, ti ɗa kɛɛwoti ʋagɔi ɠɛ.

15 Niima vaiti ka maanɛai è kalagi wo ti zu ga zobogi pɛ, ga niiti ti woilosu è-woo ma, è ti iɲɔdɔ, ɓaa è zelilo ti ma. Mina nu nɔpɛ zɛ ná ti zaama, é ʋa è ʋɛlɛlala.