1 ጭማ አደታ ነ አዋዳ ቦንቻፈ አትሽን፥ ሀንቀቶፋ። ያላጋ አደታ ነ እሻዳ ኦዳ ፄላ። 2 ጭማ ማጫሳታ ነ አይዳ፥ ያላጋ ማጫሳታ ነ ምችዳ፥ ፖሎ ጌሻተን ኦይካ።

3 አዝን ሀይቅዳ ቱማ አምኤታ ቦንቻ። 4 ሽን አምኤስ ናይት ዎይኮ ናይታ ናይት ደእኮ፥ ሄ ናይት ቱማ አያና ደኦን ደኤይሳ በሳናዉ ባንታና የልዳይሳታነ፥ ባንታ ዎጋ አይዉነ ዎጋ አዋ ማድድ ኩሸ ዛሮ ታማሮ። ሄስ ፆሳ ኡፋይስያባ።

5 ባርካ ደእያ ቱማ አምእያ ፆሳፈ ማደ ደማናዉ ኡፋይሳን ናጋሱ። ጋላስነ ቃማ ፆሳይ ባና ማዳና መላ ዎሳዉሱነ ኦይቻዉሱ። 6 ሽን ሀ አላምያን ሎኦ ዱሳ ፃላላ ኮይያ አምእያ ፓፃ ደአሸ ሀይቅዳሮ። 7 ኦንካ ኤንታ ቦሮና መላ ሀ ኪታ ኤንታዉ እማ። 8 ሽን ባ ዳቦታስ፥ ኡባፈ አድ ባ ሶ አሳስ ቆፖና ኦንካ ባ አማኑዋ ካድዳይሳ፤ አማኖና አሳፐካ አዳ ኢታ።

9 ላይ ኡሱፑን ታሙ ኩምቦና አምኤ ሱን ማዝጋበን ፃፎፓ። ቃስ ሄሳ ቦላ እያ ባ አዝናስ አማነትዳሮ ግዳናዉ ኮሼስ። 10 ናይታ ድሾን፥ እማ ሞኮን፥ ጌሻታ ቶሁዋ ሜቻን፥ መቶትያ አሳ ማደን፥ ሎኦ ኦሶ ኡባስ ባና አ እምዳሮነ ሎኦ ኦሶን ኤረትዳሮ ግዳናዉ በሴስ።

11 ሽን ያላጋ አምኤታ ሱን ማዝጋበን ፃፎፓ። ኤንታና አዝና ገሎ ገሎ ግያ አሾ አሞይ ኦይክያ ዎደ ክርስቶሳ አጋና። 12 ኤንቲ ኮይሮ ገልዳ ቃላ መንዳ ግሾ ፕርደታና። 13 ሄሳ ቦላ ኤንቲ ኦሶ ይድ ኬፈ ኬ ዩያና። ዩሻ ፃላላ ግዶናሽን፥ ዝግርሳንነ ባንታና ጋናባን ገልድ በሶናባ ኦደቶሶና። 14 ሄሳ ግሾ፥ ኑ ሞርከት ኑ ቦላ ኦደትያ ኢታባ ደሞና መላ ያላጋ አምኤት አዝና ገልድ፥ ናአ የልድ፥ ባንታ ኬ አይሳና መላ ዞራይስ። 15 ሀይሳፈ ካሰ ጉ አምኤት ፃላሄ ካላናዉ ጉየ ስምዶሶና።

16 እስ አማንያ ማጫሴስ ሶ አሳ ግዶን አምኤት ደእኮ፥ እያ ኤንታ ማዳናዉ በሴስ። ሄሳዳ ኦኮ፥ ዎሳ ኬስ ቶሆይ ካዉዬስ። ሄ ዎደ ዎሳ ኬይ ማደ በሲያ ቱማ አምኤታ ማዳናዉ ዳንዳኤስ።

17 ዎሳ ኬ ሎይ ሄምያ ጭማት፥ ኡባፈ አድ፥ ቃላ ሳባኮንነ ታማርሶን ዳቡረይሳት ዳኮ ቦንቾ ኤካናዉ በሴስ። 18 ጌሻ ማፃፋይ፥ "ዉዱማን ካ የያ ቦራ ዶና ቃቾፋ" ሄሳዳካ፥ "ኦሳንቾይ ባ ዳሞዝያ ኤካናዉ በሴስ"✝ ያጌስ።

19 ናምኡ ዎይኮ ሄ ማርክ ባይና፥ ዎሳ ኬ ጭማ ሞትያባ ስኦፓ።✝ 20 ሀራት ያያና መላ ናጋራ ኦያ ኦናካ አሳ ኡባ ስንን ሀንቀታ።

21 ኔኒ አሳ ሶምኦ በኦና፥ እሱዋ እሱዋፈ ዱማዮና ሀ ኪታ ናጋና መላ ፆሳ፥ ጎዳ የሱስ ክርስቶሳነ ዶረትዳ ኪታንቾታ ስንን ታ ነና ዞራይስ። 22 ኦደ ቦላካ ነ ኩሽያ ዎዳ ሹማናዉ ኤለሶፓ። ሀራታ ናጋራን ገሎፓ፤ ነና ጌሻተን ናጋ።

23 ኔኒ ኡባ ዎደ ሀርገትያ ግሾነ ነ ኡሎ ሀርግያ ግሾ ሃ ፃላላ ኡዮፓ፤ ጉ ዎይነ ኡያ።

24 እስ እስ አሳታ ናጋራይ ቆንጨ፤ ኤንታ ናጋራይ ኤንታ ፕርዳናዉ ኤንታፈ ስን አስ፥ ሽን ሀራታ ናጋራይ ጉየፐ ጋምእድ ቆንጬስ። 25 ሄሳዳ፥ ሎኦ ኦሶይካ ቆንጨ፤ ቆንጮና እፅኮካ ጌማናዉ ዳንዳኤና።