ፆሳ ኬይ ኬፀታና መላ እመትዳ ኪታ
1 ካዎይ ዳርዮስ ካዎትዳ ናምአን ላይን፥ ኡሱፑን አጌናን ኮይሮ ጋላሳን፥ ጎዳ ቃላይ ናብያ ሀገ ባጋራ ይሁዳ ቢታ ሃርያ ሳላትያላ ናኣ፥ ዛሩባበላኮነ ካህነ ሀላቃ ግድዳ እዮሳደቃ ናኣ፥ እያሱኮ ሀይሳዳ ያግድ ይስ። 2 ኡባፈ ዎልቃማ ጎዳይ፥ "ሀ አሳይ ጎዳ ኬ ዛሪድ ኬፅያ ዎደይ ቡሮ ጋክቤና" ያጌስ።
3 ያትን፥ ጎዳ ቃላይ ናብያ ሀገ ባጋራ ሀይሳዳ ያግስ: 4 "ታ አሳዉ፥ ታ ኬይ ላለትድ ኡትን፥ ህንተ፥ ህንተ አሌቀትዳ ኬታን ዳናዉ ሀይስ ህንተዉ ዎዴ?" ያግስ።
5 ሄሳ ግሾ፥ ኡባፈ ዎልቃማ ጎዳይ፥ "አነ ህንተ ህንተና ጋክሸ ደእያባ ቆፕተ። 6 ህንተ ዳሮ ዘርደታ፥ ሽን ጉ ሺሽደታ። ሜታ፥ ሽን ካለከታ፤ ኡዬታ፥ ሽን አለከታ። ማኤታ፥ ሽን ህንተና ሆኤና። ዳሞዘ ኤኬታ፥ ሽን ፔ ኪሰን የግያዳ ጮ ዬስ" ያጌስ።
7 ኡባፈ ዎልቃማ ጎዳይ፥ "አነ ህንተ ህንተና ጋክሸ ደእያባ ቆፕተ። 8 ህዛ ደርያ ቦላ ከይድ፥ ም ቃንፅድ ኤህተ፤ ታኒ እያን ኡፋይታና መላነ ቦንቸታና መላ ፆሳ ኬ ዛሪድ ኬፅተ። 9 ህንተ ዳሮ ካ ሺሻናዉ ቆፕደታ፥ ሽን ጉ ግድስ። እያ ህንተ ሶ ገልስያ ዎደ ታ ፑንን ይ አግስ። ሀይስ አይብስ ሀንዴ? ታኒ ሀይሳ ኦዳይ ህንተ ኡባይ ህንተ ኬ ኬ ኬፅሽን፥ ታ ኬይ ላለትድ አትዳ ግሾሳ። 10 ሄሳ ግሾ፥ ሳሎይ እራ ድግስ፥ ሳእ ካ እሞና እፅስ። 11 ታኒ ቢታነ ዙማ ቦላ፥ ካ ቦላ፥ ዎይንያነ ዛይትያ ቦላ፥ ቢት ዶልስያባ ኡባ ቦላ፥ አሳነ መህያ ቦላነ ህንተ ዳቡራ ኡባ ቦላ ኮሻ ፄጋስ" ያጌስ። 12 ሀይሳፈ ጉየ፥ ሳላትያላ ናአይ ዛሩባበል፥ ካህነ ሀላቃ ግድዳ እዮሳደቃ ናአይ፥ እያሱይነ ድኤተፈ ስምዳ አሳ ኡባይ፥ ጎዳ ባንታ ፆሳ ቃላስነ ጎዳይ ኤንታ ፆሳይ ኪትዳ ናብያ ሀገ ቃላስ፥ ኪተትዶሶና፤ አሳይ ጎዳ ያይዶሶና። 13 ያትን፥ ጎዳይ ኪትዳ ሀገይ አሳኮ፥ " ‘ታኒ ህንተራ ደአይስ’ ያጌስ" ያግድ ጎዳ ኪታ አሳስ ኦድስ። 14 ያትን፥ ጎዳይ፥ ይሁዳ ቢታ ሃርያ ሳላትያላ ናኣ፥ ዛሩባበላ፥ ካህነ ሀላቃ ግድዳ እዮሳደቃ ናኣ፥ እያሱነ ድኤተፈ ስምዳ አሳ ኡባ ደንስ። ኤንቲ ኡባፈ ዎልቃማ ጎዳ፥ ባንታ ፆሳ ኬ ኬፆ ዶምዶሶና። 15 ሀይስ ሀንዳይ ካዎይ ዳርዮስ ካዎትዳ ናምአን ላይን፥ ኡሱፑን አጌናን ላታማነ ኦይዳን ጋላሳና።