1 ታማነ ኦይዱ ላይፈ ጉየ፥ ባርናባሳራ ዛራዳ የሩሳላመ ባስ። ሄ ዎደ ትቶ ታራ ኤካዳ ባስ።✝2:1 ሀዋ 11:30፤ 15:2. 2 ፆሳይ ታዉ ቆንጭስዳ ቆንጨን ያ ባዳ አይሁደ ግዶና አሳ ግዶን ታ ሳባክያ ዎንገላ ኤንታዉ ቆንጭሳስ። ካሰ ታ ዎፅዳ ዎይነ ሀእካ ታ ዎፅያ ዎይ ሀዳ ግዶና መላ ጋዳ ካለይሳታ ዱማ ሺሻዳ ኤንታዉ ኦዳስ። 3 ሀር አቶሽን፥ ታራ ደእያ ትቶይ ግርከ አስ ግድኮካ፥ ቃፃረቶ ግድ ኡንኤቦኮና። 4 ግዶሽን፥ አማንያ እሻታ ዳንድ ኑ ግዶ ገልዳ እሶት እሶት እ ቃፃረታና መላ ኮይዶሶና። ሄ አሳት ክርስቶስ የሱሳን ኑስ ደእያ ላአተ ዎችድ በአናዉ ጌማን ኑ ግዶ ገልድ ዛሪድ ኑና አይለ ኦናዉ ኮዮሶና። 5 ሽን ቱማ ዎንገላይ ህንተናን ምንድ ዳና መላ ኑኒ ሀር አቶሽን፥ ጉ ዎደስካ ኤንታዉ ኩሸ እምቦኮ።

6 ሽን ሀላቃ ዳንያ አሳታ ኦናተይ ታዉ አይኮካ ግደና። ፆሳይ አሳ ሶምኦ በእድ ፕርደና። ሀ አሳት ታ ማርካትያ ዎንገላ ቦላ ጉጅዳባይ ባዋ።✝2:6 ዛረ 10:17. 7 ሽን ጰፅሮስ፥ አይሁደታስ ዎንገላ ኦዳና መላ ፆሳይ እያዉ ሀዳራ እምዳይሳዳ ታዉካ አይሁደ ግዶና አሳስ ዎንገላ ኦድያ ሀዳራ እምዳይሳ ኤንቲ ጉየፐ በእዶሶና። 8 ህዛ፥ ጰፅሮስ አይሁደታ ሀዋረ ግዳና መላ ኦዳ ፆሳይ፥ ታካ አይሁደ ግዶና አሳስ ሀዋረ ግዳና መላ ኦስ። 9 ቃስ ቱሱ ዳንድ በንትያ ያይቆብ፥ ጰፅሮስነ ዮሃንስ፥ ታዉ እመትዳ አ ኬሀተ በእዳ ዎደ ኑራ እስፍዳይሳ ቆንጭሳናዉ ታ ኩሽያነ ባርናባሳ ኩሽያ ኦይክዶሶና። ኑኒ አይሁደ ግዶና አሳኮ፥ ቃስ ኤንቲ አይሁደ አሳኮ ባናዉ ጊግዶሶና። 10 ኤንቲ ኑና ምንድ ሀዳራ ግዳይ፥ ኑኒ ማንቆታስ ቆፓናይሳ። ካሰካ ታ ሄሳ ኦናዉ አሞታይስ።

11 ጰፅሮስ አንፆከ ካታማ ይዳ ዎደ እ ባልዳ ግሾ ታኒ እያ ሶምኦን "ኔኒ ባላዳሳ" ጋስ። 12 ያይቆብ ኪትዳ ጉ አሳይ ያናፐ ስን እ አይሁደ ግዶና አሳራ ሜስ፥ ሽን ኤንቲ ይዳፐ ጉየ፥ "አይሁደ ግዶና አሳፐ አማንዳይሳት ቃፃረታናዉ በሴስ" ግያ አሳስ ያይድ ኤንታፈ ሻከትስ። 13 ቃስ ሀንኮ አማንዳ አይሁደት ጰፅሮሳ ሀኑዋ ካልዶሶና። ሀር አቶሽን፥ ባርናባስካ እያ ቆፋን ጎሸትስ።

14 ሽን ኤንቲ ዎንገላ ቱማተን ሱረ ሄመቶናይሳ በአዳ፥ ጰፅሮሳ አሳ ኡባ ስንን፥ "ኔኒ አይሁደ ግዳሸ፥ አይሁደ ዎጋ ግዶናሽን፥ አይሁደ ግዶና አሳዳ ደኣሳ፤ ያትን፥ ዋናዳ አይሁደ ግዶናይሳታ፥ ‘አይሁደ ዎጋን ደእተ ጋዳ ዎልቃታይ?’ " ያጋስ።

15 ኑኒ የለታን አይሁደ፥ ሽን ናጋራንቾ ግድዳ አይሁደ ግዶና አሳ መላ ግዶኮ። 16 ሽን አስ የሱስ ክርስቶሳ አማንድ ፅሌስፐ አትሽን፥ ህገ ናግድ ፅሎናይሳ ኤሮስ። ኦንካ ህገ ናግድ ፅሎና ግሾ፥ ኑካ ህገ ናግድ ግዶናሽን፥ ክርስቶሳን አማንድ ፅላና መላ ክርስቶስ የሱሳ አማንዳ።✝2:16 ማዝ 143:2፤ ሮመ 3:20፥ 22.

17 ኑ አይሁደትካ ክርስቶሳ ባጋራ ፅላናዉ ኮሼስ። ሄሳ ግድኮ ኑካ ሀራ አሳዳ ናጋራንቾ ግደይሳ በኦስ። ያትን፥ ኑ ናጋራ ኦና መላ ደንይ ክርስቶሳ ጉሰዬ? ኡባካ ግደና! 18 ህዛ፥ ታ ላልዳይሳ ዛራዳ ኬፅያባ ግድኮ ታኒ ታ ሁጰን ህገ መንይሳ ግደይሳ ቆንጭሳይስ። 19 ታኒ ፆሳስ ዳና መላ ህገ ባጋራ ህገስ ሀይቃስ። 20 ታኒ ክርስቶሳራ ማስቃልያ ቦላ ካቀታስ። ታኒ ህዛፐ ታዉ ደእከ፥ ሽን ክርስቶስ ታናን ደኤስ። ታ ሀእ ደእያ ደኦይ፥ ታና ዶስድ ታ ግሾ ባና አድ እምዳ ፆሳ ናኣ አማናዳ ደአይስ። 21 ታኒ ፆሳ አ ኬሀተ ሀዳ ኦከ። ፅሎተ አሳስ ህገ ባጋራ በንትያባ ግድያኮ፥ ክርስቶስ ጮ ሀይቅስ ጉሱ።