1 የሱሲ ሄሳፈ ደንድድ፥ ይሁዳ ቢታ ብድ ዮርዳኖሰ ሻፋ ፕንስ። ዳሮ አሳይ ዛሪድ እያኮ ሺቅን፥ ካሰይሳዳካ ሄ አሳ ታማርስስ።

2 እስ እስ ፋርሳወት ፓጫናዉ ኮይድ የሱሳ፥ "እስ አስ ባ ማችዉ የዳና መላ ሙሰ ህገይ ኪቲ?" ያግድ እያ ኦይችዶሶና።

3 እ ዛሪድ፥ "ሙሰይ ህንተና ዎይግድ ኪትዴ?" ያግስ።

4 ኤንቲ፥ "ሙሰይ፥ ‘እስ አስ ባ ማቼስ አንጆ ዎርቃተ እምድ የዶ’ ግስ" ያግዶሶና።✝

5 የሱሲ ዛሪድ፥ ኤንታ "ህንተ ኦድን ስኦናይሳታ ግድያ ግሾ፥ ሙሰይ ሀ ኪታ ህንተዉ ፃፍስ። 6 ሽን ፆሳይ ኮይሮ መያ ዎደ፥ አደነ ማጫ ኦድ፥ ኤንታ መስ።✝ 7 ሄሳ ግሾ፥ እስ አስ ባ አዋነ ባ አይዉ አግድ፥ ባ ማቸራ እስፈ ደኤስ።✝ 8 ኤንቲ ናምአይ እስ አሰ ግዶሶና፤ ህዛፐ፥ ኤንቲ እስ አሰ ግዶሶናፐ አትሽን፥ ናምኡ አስ ግዶኮና። 9 ሄሳ ግሾ፥ ፆሳይ እስፈ ቃችዳይሳ አስ ሻኮፎ" ያግስ።

10 ኤንቲ ሶ ስምዳ ዎደ፥ እያ ታማረት ሀ ኦዳባ የሱሳ ናምአን ኦይችዶሶና። 11 የሱሲ ኤንታኮ፥ "ባ ማችዉ የድድ ሀራ ኤክያ ኦንካ ላይማቴስ።✝ 12 ቃስ ማጫስያካ ባ አዝናፐ ከያዳ ሀራ አዝና ገልኮ ላይማታዉሱ" ያግስ።

13 የሱሲ ጉ ናይታ ቦላ ባ ኩሽያ ዎና መላ፥ እስ እስ አሳይ ናይታ እያኮ ኤሆሶና፥ ሽን እያ ታማረት ሄ አሳ ሀንቀትዶሶና። 14 የሱሲ ሄሳ በእድ፥ ባ ታማረታ ሀንቀትድ፤ ኤንታኮ፥ "ጉ ናይት ታኮ የይሳ ድጎፍተ፤ ፆሳ ካዎተይ ሀይሳታ መላሳ። 15 ታኒ ህንተዉ ቱማ ኦዳይስ፤ ፆሳ ካዎተ ጉ ናአዳ ኤኮና ኡራይ ኦንካ ሄ ካዎተ ኡባራካ ገለና" ያግስ።✝ 16 ጉ ናይታ እድምድ፥ ባ ኩሽያ ኤንታ እሱዋ እሱዋ ቦላ ዎድ አንጅስ።

17 የሱሲ ባናዉ ከይዳ ዎደ፥ እስ ኡራይ ዎፅ ይድ፥ እያ ስንን ጉልባትድ፥ "ኬሀ አስታማርያዉ፥ ታኒ መርና ደኦ ላታናዉ አይ ኦ?" ያግድ ኦይችስ።

18 የሱሲ፥ "አይስ ታና ኬሀዉ ጋዳ ፄጋይ? ፆሳ ፃላላፐ አትሽን፥ ሀር ኬህ ኦንካ ባዋ። 19 ፆሳ ኪታ፥ ዎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ እንፃርሳን ጭሞፋ፤ ነ አዋነ ነ አይዉ ቦንቻ ያገይሳ ኤራሳ" ያግስ።✝

20 ኡራይ፥ "አስታማርያዉ፥ ታኒ ሄሳ ኡባ ናአተፈ ዶማዳ ሀእ ጋካናዉ ናጋይስ" ያግስ።

21 የሱሲ ኡራ ትሽ ኦ ፄልድ ዶስስ፤ "ነዉ እስባይ ፓጬስ፤ ባዳ ነዉ ደእያባ ኡባ ባይዛዳ፥ ሄ ሚሽያ ማንቆታስ እማ፤ ኔኒ ሳሎን ዱረ ግዳና። ያታ ስማዳ ታና ካላ" ያግስ። 22 ሽን ኡራይ ሄሳ ስእድ፥ እ ዳሮ ዱረ ግድያ ግሾ፥ ባ ሶምኡዋ ካሬስ፥ ኡፋይቶና አግድ ብስ።

23 የሱሲ ባ ታማረታ ዩሽ አ ፄልድ፥ "ዱረ አስ ፆሳ ካዎተ ገላናይስ ዋንድ መታንዴሻ!" ያግስ።

24 እያ ታማረት እያ ትምርትያ ስእድ ማላለትዶሶና። ሽን የሱሲ ቃስካ ኤንታኮ፥ "ናይቶ፥ ፆሳ ካዎተ ገላናይስ ዋንድ መታንዴሻ! 25 ዱረ አስ ፆሳ ካዎተ ገላናይሳፈ፥ ግማለይ ናርፐ ሉሆራ አይስ ካዉዬስ" ያግስ።

26 እያ ታማረት ማላለትድ፥ "ያትን፥ ኦን አታኔ?" ያግድ፥ እሶይ እሱዋ ኦይችዶሶና።

27 የሱሲ ኤንታ ትሽ ኦ ፄልድ፥ "ሀይስ ፆሳስ ዳንዳኤተስፐ አትሽን፥ አሳስ ዳንዳኤተና፤ ፆሳስ ኡባባይ ዳንዳኤቴስ" ያግስ።

28 ጰፅሮስ የሱሳኮ፥ "ሄኮ፤ ኑኒ ኑባ ኡባ አግድ፥ ነና ካልዳ" ያግስ።

29 የሱሲ "ታኒ ህንተዉ ቱማ ኦዳይስ፤ ታ ግሾነ ዎንገላ ግሾ፥ ኬ ዎይኮ እሻታ ዎይኮ ምቸታ ዎይኮ አዋ ዎይኮ አዮ ዎይኮ ማችዉ ዎይኮ ናይታ ዎይኮ ጋደ አግዳ ኦንካ፥ 30 ሀእ ሀ ዎድያን ፄቱ ኩሸ ኬ፥ እሻታ፥ ምቸታ፥ አየታ፥ ናይታ፥ ጋድያ፥ ጎደተራ እስፈ ኤካና። ስንፈ ያና ዎድያንካ መርና ደኡዋ ኤካና። 31 ሽን ዳሮት ሀእ ደን ስን ግድዳይሳት ጉየ ግዳና፥ ቃስ ዳሮት ሀእ ጉየ ግድዳይሳት ስን ግዳና" ያግስ።✝

32 የሱሳራነ እያ ታማረታራ የሩሳላመ ብሽን፥ የሱሲ ባ ታማረታ ስንን ሄመቴስ። ኤንቲ ማላለትዶሶና። እያ ካለይሳትካ ያይዶሶና። ናምአን፥ ታማነ ናምኡ ታማረታ ጋፃ ከስድ፥ ባና ጋካናባ ዱማ ኤንታዉ ሀይሳዳ ያግድ ኦድስ። 33 "ሄኮ፥ ኑኒ የሩሳላመ ሀእ ከዮስ። ያን አሳ ናአይ፥ ካህነ ሀላቃታስነ ህገ አስታማረታስ አድ እመታና። ኤንቲ እያ ቦላ ሀይቆ ፕርዳ ፕርዳና፤ ቃስ አይሁደ ግዶና ደርያስ እያ አድ እማና። 34 አይሁደ ግዶና ደረይ እያ ቶቻና፥ እያ ቦላ ጩታና፥ ልሶን ጋራፋናነ ዎና። እ ሄ ጋላሳፐ ጉየ፥ ሀይቆፐ ደንዳና" ያግስ።

35 ዛብድዮሳ ናይት ያይቆብነ ዮሃንስ የሱሳኮ ይድ፥ "አስታማርያዉ፥ ኑኒ ነና ዎስያ እስባ ኑስ ኦርክ" ያግዶሶና።

36 የሱሲ ኤንታኮ፥ "ታኒ ህንተዉ አይ ኦ?" ያግስ።

37 ኤንቲ፥ "ኔኒ ነ ቦንቾ ካዎተን ኡትያ ዎደ፥ ኑፐ እሱዋ ኡሻቻ ባጋራ ቃስ እሱዋ ሀድርሳ ባጋራ ኡትሳርክ" ያግዶሶና።

38 ሽን የሱሲ ኤንታኮ፥ "ህንተ አይ ዎስያኮ ኤረከታ፥ ታ ኡያናዉ ደእያ ፁኣ ኡያናዉ ዳንዳኤቲ? ቃስ ታኒ ፃማቀታናዉ ደእያ ፅንቃትያ ፃማቀታናዉ ዳንዳኤቲ?" ያግስ።✝

39 ኤንቲ ዛሪድ፥ "ኤ ዳንዳኦስ" ያግዶሶና።

የሱሲ ቃስ፥ "ቱማካ ታ ኡያናዉ ደእያ ፁኣ ህንተ ኡያና፥ ታኒ ፃማቀታናዉ ደእያ ፅንቃትያ ህንተ ፃማቀታና። 40 ሽን ታፐ ኡሻቻ ባጋራነ ሀድርሳ ባጋራ ኡታናይሳታ ዶራናዉ ታዉ ማት ባዋ፥ ሽን ሄ በሳይ ፆሳይ እማናዉ ጊግስድ ዎዳይሳታሳ" ያግስ።

41 ሀንኮ ታሙ ታማረት ሄሳ ስእዳ ዎደ፥ ያይቆባነ ዮሃንሳ ቦላ ሀንቀትዶሶና። 42 የሱሲ ኤንታ ኡባ ባኮ ፄግድ፥ "አይሁደ ግዶና አሳ ሀላቃት ደርያ ሃረይሳታ ጌተትድ ፄገተይሳነ ሃረይሳታስ ደርያ ቦላ ማት ደኤይሳ ህንተ ኤሬታ።✝ 43 ሽን ህንተ ግዶን ሄሳ መላ ግደና፤ ህንተ ግዶን ግታታናዉ ኮየይ ኦንካ ህንተዉ አይለ ግዳናዉ በሴስ። 44 ቃስ ህንተ ግዶን ኡባፈ ቦላ ግዳናዉ ኮየይ ኦንካ ህንተ ኡባስ አይለ ግዳናዉ በሴስ። 45 ሀር አቶሽን፥ አሳ ናአይካ፥ አሳስ ኦናዉነ ዳሮታ ዎዛናዉ ባ ሸምፑዋ አድ እማናዉ ይስፐ አትሽን፥ አስ እያዉ ኦና መላ ይቤና" ያግስ።

46 ኤንቲ እያርኮ ካታማ ብዶሶና። የሱሲ ባ ታማረታራነ ዳሮ አሳራ እያርኮፈ ከይሽን፥ ፅሞሳ ናአይ፥ ቆቀይ፥ ባርፅሞሳ ጌተተይስ፥ ኦገ ጋፃን ዎስሸ ኡትስ። 47 ባርፅሞስ፥ ያራ አይ ናዝረተ የሱሳ ግድዳይሳ ስእዳ ዎደ፥ ባ ቃላ ቁ ኦድ፥ "ዳዊታ ናኣ የሱሳ፥ ታና ማራርክ!" ያግድ ዋሶ ዶምስ።

48 ዳሮ አሳይ እያ፥ "ሀይዛ!" ግድ ሀንቀትዶሶና።

ሽን፥ እ ባ ቃላ ካሰይሳፈ ዳሮ ቁ ኦድ፥ "ዳዊታ ናአዉ፥ ታና ማራርክ!" ያግስ።

49 የሱሲ ኤቅድ፥ "እያ ሃ ፄግተ" ያግስ።

ኤንቲ ቆቅያኮ፥ "አይኮይ ባዋ፥ ደንዳ ኤቃ፥ ነና ፄጌስ" ያግዶሶና። 50 ቆቀይ ባ ማኡዋ ሆል የግድ፥ ጉፕ ደንድ ኤቅድ፥ የሱሳኮ ብስ።

51 የሱሲ፥ "ታኒ ነዉ አይ ኦና መላ ኮያይ?" ያግስ።

ቆቀይ፥ "አስታማርያዉ፥ ታ ፄላናዉ ኮያይስ" ያግስ።

52 የሱሲ፥ "ባ፥ ነ አማኖይ ነና ፓስ" ያግስ። ኢራካ እያ አይፈይ ፄልን፥ የሱሳ ካልስ።