Marcos 2

3 ኦይዱ አሳት እስ ጉንዳ ኡራ ቶክድ እያኮ ኤህዶሶና። 4 አሳይ ዳርዳ ግሾ፥ ኡራ የሱሳኮ ሺሻናዉ ኤንታዉ ዳንዳኤቶና እፅን፥ የሱሲ ደእያ ግናራ ኬ ቃርድ፥ ካራ ቃዉፅድ ኡራ እ ዝንእዳ አልጋራ ዱገ የድድ የሱሳ ስንን ዎስዶሶና። 5 የሱሲ ኤንታ አማኑዋ በእድ፥ ሄ ጉንዳ ኡራ፥ "ታ ናአዉ፥ ነ ናጋራይ አቶ ጌተትስ" ያግስ።

6 ህገ አስታማረታፐ ሄ በሳን ኡትዳ እሶት እሶት ባንታ ዎዛናን፥ 7 "ላ ሀ ኡራይ ሀይሳ መላ ኢታባ ፆሳ ቦላ አይስ ኦዴቲ? ፆሳ ፃላላፐ አትሽን፥ ሀር ኦን ናጋራ አቶ ጋናዉ ዳንዳኢ?" ግድ ቆፕዶሶና።

8 ኤንቲ ባንታ ዎዛናን ሄሳዳ ቆፕዳይሳ የሱሲ ኤለስድ ባ አያናን ኤርድ፥ ኤንታኮ፥ "ህንተ ህንተ ዎዛናን አይስ ሄሳዳ ቆፔቲ? 9 ጉንዳ ኡራ፥ ‘ነ ናጋራይ አቶ ጌተትስ’ ገይስ ማተዬ? ዎይኮ፥ ‘ደንዳ ኤቃዳ ነ አልጋ ቶካዳ ባ’ ገይስ ማቴ? 10 ሽን ታዉ፥ አሳ ናኣስ፥ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላ" ግድ ሄ ጉንዳ ኡራኮ፥ 11 "ነና ጋይስ፥ ደንዳ ኤቃዳ ነ አልጋ ቶካዳ ነ ሶ ባ" ያግስ።

12 ኡራይ ኤለስ ደንድ ኤቅድ፥ ባ አልጋ ቶክድ አሳ ኡባይ በእሽን ብስ። አሳ ኡባይ ማላለትድ፥ "ኑኒ ሀይሳ መላ ማላልስያባ በእ ኤሮኮ" ያግድ ፆሳ ጋላትዶሶና።