Marcos 5

ሀይቅዳ ናእዉነ ሀርገትያ ማጫስዉ

21 የሱሲ ስሚድ፥ ዎጎሉዋን ገልድ፥ አባ ፕንዳፐ ጉየ ዳሮ አሳይ አባ ጋፃን እያ ዩሹዋን ሺቅዶሶና። 22 እያሮሳ ጌተትያ አይሁደ ዎሳ ኬ ሀላቃታፐ እሶይ፥ የሱሳ በእዳ ዎደ እያኮ ይድ እያ ቶሁዋ ቦላ 23 ኩንድድ፥ "ታ ናእያ ሀርጋዳ ሀይቃና ሀናዉሱ። እያ ፓፃዳ ደአና መላ ያዳ ነ ኩሽያ እ ቦላ ዎርክ" ያግድ የሱሳ ምንድ ዎስስ።

24 የሱሲ እያሮሳራ ብስ። እ ብሽን ዳሮ አሳይ እያ ካልድ ኡንኤዶሶና።

25 ታማነ ናምኡ ላይ እፔ ሱ ሂያ እስ ማጫስያ ደአዉሱ። 26 ዳሮ አክመት እዮ አክምዶሶና፥ ሽን እያ ፓፃ ካኤታሱ። እያ ባ ሚሽያ ኡባ ዉርስንካ እዉ ሃ ኢትስፐ አትሽን፥ አይኮካ ማድቤና። 27 ሄ ማጫስያ የሱሳባ ስአዳ፥ አሳ ካንዳ የሱሳ ጉየራ ያዳ እያ ማኡዋ ቦቻሱ። 28 እያ፥ "ታኒ ሀር አቶሽን እያ ማኡዋ ቦችያኮ ፓፃና" ጋዳ ቆፓሱ።

29 ኢፐ ጎግያ ሱይ ኢራካ ኤቅ አግስ። እያ ባ ዋያፐ ፓፅዳይሳ ባ አሳተን ኤራሱ። 30 የሱሲ ባፐ ዎልቅ ከይዳይሳ ባ ሁጰን ኤርድ፥ ኤለስድ ዳሮ አሳ ግዶን ጉየ ስሚድ፥ "ታ ማኡዋ ቦችዳይ ኦኔ?" ያግስ።

31 እያ ታማረት፥ "አሳይ ነና ሱገይሳ በአሸ፥ ‘ዎይጋዳ ታና ኦነ ቦችዳይ ያጋይ?’ " ያግዶሶና።

32 የሱሲ ሄሳ ኦን ኦዳኮ በአናዉ ዩሽ አ ፄልስ። 33 ሽን ማጫስያ ባዉ ሀንዳባ ኤራዳ፥ ያሻን ኮኮራሸ ያዳ የሱሳ ስንን ጉፋናሱ፤ ቃስ ሀንዳባ ኡባ ቱማ እያዉ ኦዳሱ። 34 ያንን፥ የሱሲ ኢኮ፥ "ታ ናተ፥ ነና ነ አማኖይ ፓስ፥ ሳሮን ባ፥ ነ ዋያፐካ ፓፃ" ያግስ።

35 የሱሲ ቡሮ ሄሳ ኦድሽን፥ አይሁደ ዎሳ ኬ ሀላቃ ሶፐ ኪተትዳ አሳት ይድ፥ "ነ ናእያ ሀይቃሱ፥ አስታማርያ አይስ ዳቡርሳይ?" ያግዶሶና።

36 ሽን የሱሲ ኤንቲ ገይሳ ስእድ፥ አይሁደ ዎሳ ኬ ሀላቃኮ፥ "አማኖ ፃላላ አማናፐ አትሽን፥ ባቦፋ" ያግስ። 37 የሱሲ ጰፅሮሳፐ፥ ያይቆባፐነ ያይቆባ እሻ ዮሃንሳፐ ሀር ኦንካ ባና ካሎና መላ ድግስ። 38 ኤንቲ አይሁደ ዎሳ ኬ ሀላቃ ሶ ጋክያ ዎደ የሱሲ አሳይ ካሀ ይድ ዬከይሳነ ዘሌለይሳ በእስ። 39 ገልድ አሳኮ፥ "አይስ ካሀ ይድ ዬከቲ? ናእያ ስካሱፐ አትሽን፥ ሀይቃቡኩ" ያግስ።

40 አሳይ እያ ቦላ ሚጭስ። ሽን አሳ ኡባ ካረ ከስድ፥ ናኤ አዋ፥ አይዉነ ሄ ታማረታ ባራ ኤክድ ናእያ ደእያሱዋ ገልስ። 41 የሱሲ ናኤ ኩሽያ ኦይክድ፥ "ፃልታ፥ ቁም" (ጉ ናተ፥ ነና ጋይስ ደንዳ) ያግስ።

42 ናእያ ኤለሳ ደንዳ ኤቃዳ ሄመታሱ። እያ ታማነ ናምኡ ላይ ናአ። ሄሳን አሳይ ዳሮ ማላለትዶሶና። 43 የሱሲ ሄሳ ኤንቲ ኦደስካ ኦዶና መላ ኤንታ ምን ኪትስ። ኤንቲ እዉ ምያባ እማና መላ ኦድስ።