1 የሱሲ ኤንታኮ፥ "ታኒ ህንተዉ ቱማ ኦዳይስ፤ ፆሳ ካዎተይ ዎልቃራ የይሳ በኦና ሀይቆና እስ እስ አሳት ሀይሳን ደኦሶና" ያግስ።

2 የሱሲ ኡሱፑን ጋላሳፐ ጉየ፥ ባራ ጰፅሮሳ፥ ያይቆባነ ዮሃንሳ ኤክድ፥ ኤንታ ፃላላ ግታ ዙማ ቦላ ከስድ ኤንታ ስንን ላመትስ።✝ 3 እያ ማኦይካ ጶልስ፤ ሳአን ማኦ ሜጭያ ኦንካ ጌሻናዉ ዳንዳኦናይሳ መላ ዳሮ ቦፅስ። 4 ሄ ሄ ታማረት፥ ኤልያስነ ሙሰይ የሱሳራ ኦደትሽን በእዶሶና።

5 ጰፅሮስ የሱሳ፥ "አስታማርያዉ፥ ኑኒ ሀይሳን ደኤይስ ኑስ ሎኦ፤ ኑ ሄ ሻቃራታ እሱዋ ነዉ፥ እሱዋ ሙሰስ፥ ቃስ እሱዋ ኤልያሳስ ሻቃራና" ያግስ። 6 እያራነ ሀንኮታራ ዳሮ ያይዳ ግሾ እ አይ ግያኮካ ኤርቤና።

7 ሄሳፈ ጉየ፥ ሻራይ ይድ ኤንታ ካምን ሻራፐ፥ "ሀይስ ታ ዶስያ፥ ታ ናኣ፥ እ ገይሳ ስእተ" ግያ ቃላይ ይስ። 8 ኤለስድ ኤንቲ ዩሽ አድ ፄልያ ዎደ፥ የሱሳፐ አትሽን፥ ሀራ ኦናካ ባንታ ማታን በእቦኮና።✝

9 ኤንቲ ዙማ ቦላፈ ዎሽን፥ የሱሲ ኤንታኮ፥ "አሳ ናአይ፥ ሀይቆፐ ደንዳና ጋካናዉ፥ ህንተ በእዳባ ኦደስካ ኦዶፕተ" ያግድ ኪትስ።

10 እ ኪትዳይሳ ኤንቲ፥ "ኤሮ" ግድ፥ "ሀ ሀይቆፐ ደንዶ ጉሳይ ዎይጉሰ" ግድ፥ ባንታ ግዶን ኦደትዶሶና።

11 ኤንቲ ዛሪድ፥ "ህገ አስታማረት፥ ‘ኤልያስ ኮይሮትድ ያናዉ በሴስ’ አይስ ጎና?" ያግድ ኦይችዶሶና።✝

12 የሱሲ ዛሪድ "ኤልያስ ኮይሮትድ ይድ፥ ኡባባ ጊግሴስ፤ ያትን፥ ጌሻ ማፃፋን፥ ‘አሳ ናእ ዳሮ ዋየታና፤ እፀታና’ ያግድ አይብስ ፃፈትዴ? 13 ሽን ታኒ ህንተዉ ኦዳይስ፤ ኤልያስ ይስ፤ ቃስ እያባይ ጌሻ ማፃፋን ፃፈትዳይሳዳ፥ አሳይ እያ ቦላ ባንታ ኮይዳባ ኦዶሶና" ያግስ።

14 የሱሲ፥ ጰፅሮስ፥ ያይቆብነ ዮሃንስ ሀንኮ እያ ታማረታኮ ስሚድ ያ ዎደ፥ ዳሮ አሳይ ኤንታ ዩሹዋን ኤቅዳይሳታነ ህገ አስታማረ ግድዳ ጉ አሳት ኤንታራ ፓላመይሳ በእዶሶና። 15 ሄ ዳሮ አሳይ የሱሳ በእዳ ዎደ ማላለትድ፥ ኤለስድ እያኮ ዎፅ ይድ፥ እያ ሳሮዶሶና። 16 የሱሲ ባ ታማረታኮ፥ "ኤንታራ አይ ፓላሜቲ?" ያግድ ኦይችስ።

17 ሄ ዳሮ አሳ ግዶፈ እስ ኡራይ ዛሪድ፥ "አስታማርያዉ፥ ታ ናኣ ቦላ ኦደተ ድግያ ቱና አያናይ ደእያ ግሾ፥ እያ ኔኮ ኤካዳ ያስ። 18 ሀ ቱና አያናይ እያ ኦይክያ ዎደ ኡባን፥ እያ ሾጭ የጌስ፤ እያ ዶናራ ጎፖንቶይ ዬስ፤ ቃስ አቸ ጋርጭሴስ፤ አሳተይካ ምኔስ። እያፐ ሀ ቱና አያና ከሳና መላ፥ ነ ታማረታስ ኦዳስ፥ ሽን ከሳናዉ ዳንዳእቦኮና" ያግስ።

19 የሱሲ ዛሪድ ኤንታኮ፥ "አማኖና ሀ ዎድያ አሳዉ! ታኒ ህንተራ አዉደ ጋካናዉ ዳኔ? ቃስ ህንተና አዉደ ጋካናዉ ዳንዳአኔ? ናኣ ታኮ ሃ ኤክ ዪተ" ያግስ። 20 ኤንቲ ናኣ እያኮ ኤህዶሶና፤ ሄ ቱና አያናይ የሱሳ በእዳ መላ ናኣ ኮኮርስስ፤ ናአይ ሳአን ኩንድድ፥ ዶናራ ጎፖንቶይ ቶፉ ግሽን ጎንዶረትስ። 21 የሱሲ ሄ ናኣ አዋኮ፥ "ሀይስ ነ ናኣ ኦይኮሳፐ አይ መላ ዎደ ግዳኔ?" ያግድ ኦይችስ።

ናኣ አዋይ፥ "እ ጉን ደእሽን ኦይክስ። 22 እያ ዎናዉ ዳሮ ዎደ ታማንነ ሃን የጌስ፥ ሽን ነ ዳንዳእኮ፥ ኑስ ቃታርክ፥ ኑና ማዳርክ" ያግስ።

23 የሱሲ እያ፥ " ‘ኔኒ ዳንዳእኮ ጋይ?’ አማንያ ኦደስካ ኡባባይ ዳንዳኤቴስ" ያግስ።

24 ኤለስድ ናኣ አዋይ ባ ቃላ ቁ ኦድ፥ "ታኒ አማናይስ፥ ሽን ጉጃ አማናናዳ ታና ማዳርክ" ያግስ።

25 የሱሲ አሳይ ዳር ዳር በይሳ በእድ፥ ቱና አያና፥ "ሀ ቱለነ ሙመ አያናዉ፥ ሀ ናኣፐ ከያ ጋዳ ነና ታ ኪታይስ፤ ቃስ ናምአን እያን ገሎፓ" ያግስ።

26 ሄ ቱና አያናይ ዋስድ፥ ናኣ ዳሮ ኮኮርስድ፥ እያፐ ከይስ። ናአይ ሀይቅዳ ዳንን፥ ዳሮ አሳይ፥ "ናአይ ሀይቅስ" ያግዶሶና። 27 ሽን የሱሲ ናኣ ኩሽያ ኦይክድ ደንን፥ ናአይ ደንድ ኤቅስ።

28 የሱሲ ሶ ገልዳይሳፈ ጉየ፥ እያ ታማረት፥ "ኑኒ ሄ ቱና አያና ከሳናዉ አይስ ዳንዳእቦኮ?" ያግድ የሱሳ ዱማ ኦይችዶሶና።

29 የሱሲ ዛሪድ፥ "ሄሳ መላይ ዎሳፐነ ፆማፐ አትሽን፥ ሀራባን ከያናዉ ዳንዳኤና" ያግስ።

30 ኤንቲ ሄ በሳፈ ደንድድ፥ ጋልላራ አድ ብዶሶና፤ የሱሲ ባ ደእያሱዋ ኦንካ ኤራና መላ ኮይቤና። 31 እ ባ ታማረታኮ፥ "አሳ ናኣ፥ አስ አሳስ አድ እማናነ ዎና፤ እ ሄ ጋላሳፐ ጉየ፥ ሀይቆፐ ደንዳና" ያግድ ታማርሴስ።

32 ሽን ኤንታዉ እ ገይስ ገልቤና፤ ቃስ እያ ኦይቻናዉካ ያይዶሶና።

33 ኤንቲ ቅፍርናሆማ ካታማ ብድ ሶ ገልዳይሳፈ ጉየ፥ የሱሲ ኤንታኮ፥ "ኦገን አይ ኦደቴቲ?" ያግድ ኦይችስ። 34 ሽን ኤንቲ፥ "ኑ ግዶን ኡባፈ አናይ ኦኔ?" ያግድ ፓላምዳ ግሾ፥ ስእ ግዶሶና።✝ 35 የሱሲ ኡትድ፥ ታማነ ናምኡ ታማረታ ፄግድ፥ "ኦንካ ስን አናዉ ኮይኮ፥ ኡባፈ ጉየ አድ፥ ኡባስ አይለ ግዳናዉ በሴስ" ያግስ።✝

36 እስ ጉ ናኣ ኤክድ፥ ኤንታ ግዶን ኤስስ፤ ሄ ጉ ናኣ እድምድ ኤንታኮ፥ 37 "ሀይሳ መላ ጉ ናይታፐ እሱዋ ታ ሱንን ሞክያ ኦንካ ታና ሞኬስ፤ ቃስ ታና ሞክያ ኦንካ ታና ኪትዳይሳካ ሞኬስፐ አትሽን፥ ታ ፃላላ ሞከና" ያግስ።✝

38 ዮሃንስ፥ "አስታማርያዉ፥ እስ አስ ነ ሱንን ቱና አያናታ ከስሽን ኑኒ በእድ፥ ኑ ባጋ ግዶና ግሾ፥ እያ ድግዳ" ያግስ።

39 ሽን የሱሲ፥ "ኦንካ ታ ሱንን ፆሳይ ኦያ ማላታታ ኦድ፥ ኤለስድ ታ ቦላ ኢታባ ኦደታናዉ ዳንዳኤይ ባይና ግሾ ድጎፍተ። 40 ኑባ እፆና ኡራይ ኑ ባጋ።✝ 41 ታኒ ህንተዉ ቱማ ኦዳይስ፤ ህንተ ታባ ግድያ ግሾ፥ ኦንካ ህንተዉ ታ ሱንን ሀሎ ሃ ኡያናዉ እምኮካ፥ ባ ዎይቱዋ ኤካና።✝

42 "ታና አማንያ ሀ ጉታፐ እሱዋ ባለያ ኦንካ፥ ጋቻ ዎጋ ዎፃ ባ ቆን ቃችድ፥ አባን ዉልያኮ እያዉ ሎኦ። 43,44 ነ ኩሸይ ነና ባለኮ፥ ቃንፃ ሆላ። ኔኒ ናምኡ ኩሸራ ቶኦና ጋናመ ታማን የገተይሳፈ፥ ዱፃ ኩሸራ ደኡዋ ገሎይ ነዉ ሎኦ።✝ 45,46 ነ ቶሆይ ነና ባለኮ፥ ቃንፃ ሆላ። ኔኒ ናምኡ ቶሁዋራ ጋናመ ታማን የገተይሳፈ፥ ዎበ ግዳዳ ደኡዋ ገለይስ ነዉ ሎኦ። 47 ነ አይፈይ ነና ባለኮ፥ ዎጫ ከሳ ሆላ። ኔኒ ናምኡ አይፍያራ ጋናመ ታማን የገተይሳፈ፥ እስ አይፍያራ ፆሳ ካዎተ ገለይስ ነዉ ሎኦ።✝ 48 ያን ኤንታ ምያ ጉፁነይ ሀይቀና፥ ታማይካ ቶኤና።✝

49 "ያርሾይ ማፅነን ጌየይሳ መላ አስ ኡባይ ታማን ሀርቀታና። 50 ማፅነይ ሎኦ፥ ሽን እ ማልኦና እፅኮ፥ ዛሪድ ዋት ማልኤኔ? ህንተናን ማፅነይ ደኦ። ያንድ፥ እሶይ እሱዋራ ሳሮተን ደእተ" ያግስ።✝