1 አነ ታ ኦይቻይስ፦ ያትን፥ ፆሳይ ባ አሳ አግደዬ? አግቤና! ታኒ ታ ሁጰን እስራኤለ፤ አብራሃመ ሼሽ፤ ብንያመ ኮቸ።✝ 2 ፆሳይ ኮይሮ ዶርዳ ባ አሳታ የገና። ጌሻ ማፃፋን፥ ኤልያስ እስራኤለታ ፆሳ ስንን ዋት ሞትዳኮ፥ ህንተ ኤረከቲ? 3 ኤልያስ፥ "ጎዳዉ፥ ኤንቲ ነ ናበታ ዎዶሶና፥ ነ ያርሾ በሳካ ላልዶሶና። ታ ታርካ አታስ፤ ኤንቲ ታናካ ዎናዉ ኮዮሶና"✝ ያግስ።

4 ፆሳይ እያዉ ዎይግድ ዛርዴ? "ባኣለ ጌተትያ ኤቃስ ጎይንቦና ላፑን ሙኩሉ አሳ ታዉ አሻስ"✝ ያግስ።

5 ሄሳዳካ፥ ሀ ዎድያን ፆሳይ ባ አ ኬሀተን ዶርዳ ጉ እስራኤለት ደኦሶና። 6 እ ኤንታ ዶርዳይ ባ አ ኬሀተናፐ አትሽን፥ ኤንታ ኦሶን ግደና። ዶሮይ ኦሶን ግድኮ፥ እያ አ ኬሀተይ ቱማ አ ኬሀተ ግደና።

7 ያትን፥ ዋንዴ? እስራኤለት ባንታ ኮያባ ደምቦኮና፥ ሽን ፆሳይ ዶርዳ ጉት ደምዶሶና። አትዳይሳት ባንታ ዎዛና ሙምስዶሶና። 8 ሄስካ፥ ጌሻ ማፃፋን፥

"ኤንቲ ባንታ አይፍያን በኦናዳ

ባንታ ሀይን ስኦናዳ፥

ሀኖ ጋካናዉ ኤንታዉ

ፆሳይ አዛላ አያና እሚስ"✝

ጌተትድ ፃፈትዳይሳዳ ሀንስ። 9 ቃስ ዳዊቲ፥

"ኤንቲ ምያ ጋይታይ ኤንታ ፅሄዳ ኦይኮ፤

ኤንታ ጉፋንያ አፎ ግዶ፤

ኤንታ ኢታተይ ኤንታ ቦላ ጋኮ።✝

10 ኤንቲ ፄሎናዳ ኤንታ አይፈይ ጎዘቶ፤

ኡባ ዎደ መቶን ኤንቲ ኩንድ ደኦ" ያግስ።

11 ያትን፥ አይሁደት ዛር ደንዶና መላ ኩንድዶናዬ? ግደና! ኤንታ ኩንደይ አይሁደ ግዶና አሳይ አታና መላ ጋሶ ግድስ። ሄስካ አይሁደት ኤንታ ቦላ ቃናታናዳ ኦስ። 12 አይሁደታ ናጋራይ አላምያስ ዳሮ አንጆ ኤህስ፤ ቃስ ኤንታ ኩንደይ አይሁደ ግዶና አሳስ ዳሮ አንጆ ግድስ። ያትን፥ ዶረትዳ አይሁደት ኩመ አትያ ዎደ አንጆይ አይ መላ ዳራንዴሻ!

13 ታኒ፥ ሀእ ህንተዉ አይሁደ ግዶና አሳስ ኦዳይስ። አይሁደ ግዶና አሳስ ሀዋረ ግዳዳ ኦይሳን ታኒ ዳሮ ጬቀታይስ። 14 ታ ሄሳ ኦዳይ ታዉ አሾን ኮቸ ግድዳ እስራኤለታ ቂሮያዳ ኤንታፈ ጉታ አሻናሳ። 15 ፆሳይ ኤንታ የግዳ ዎደ፥ ሀ አላመይ ፆሳራ ስገትስ። ፆሳይ ኤንታ ሺሽ ኤክያ ዎደ ሀይቅዳ አስ ሀይቆፐ ደንድዳ መላ ግዴስ።

16 ኮይሮ መንዳ ባሶ ኡይይ ፆሳስ ያርሸትድ ጌሽ ግድኮ፥ ሙመ ኡይይካ ጌሽ። ምስ ፃጶይ ጌሽ ግድኮ፥ ታሸይካ ጌሽ። 17 ጋደን ቶክዳ ሻማሆ ታሸ ግድዳ አይሁደት ካረትን፥ ህንተ ባዞን ዶልዳ ሻማሆ ታሸ ግድዳ አይሁደ ግዶናይሳት ኤንታ በሳን ንትድ ኤንታ አንጁዋነ ዱረተ ሻከትደታ። 18 ህዛ፥ ህንተ ታሸዳ ካረትድ ዎዳ አይሁደታ ቦላ ኦቶርቶፍተ። ህንተ ኦቶርትያባ ግድኮ፥ ፃጶይ ህንተና ቶከስፐ አትሽን፥ ህንተ ፃጱዋ ቶኮናይሳ አኬክተ።

19 ኔኒ፥ "ሄ ታሸት ካረትዳይ፥ ታ ኤንታ በሳን ንታና መላሳ" ጋናዉ ዳንዳኣሳ። 20 ሄስ ቱማ። ኤንቲ አማንቦና ግሾ ካረትዶሶና። ኔኒ አማንዳ ግሾ ሄ በሳን ኤቃዳሳ። ኔኒ ያያናዉ በሴስፐ አትሽን፥ ኦቶራናዉ በሰና። 21 ፆሳይ መን ታሸ ግድዳ አይሁደታስ ቃቶና እፅኮ ህንተዉካ ቃተና።

22 ህዛ፥ ፆሳይ አይ መላ ኬሄኮነ አይ መላ ያሽያኮ በአ። እ ያሸይ ኪተቶናይሳታ፥ ቃስ እ ኬሄይ እያ አማንድ ምንድ ኤቅዳይሳታሳ። ምንድ ኤቆና እፅኮ ህንተካ ካረታና። 23 አይሁደት አማንኮ፥ ካሰ ኤንቲ ደእያ በሳ ስማና። ፆሳይ ኤንታ ዛሪድ፥ ዎናዉ ዳንዳኤስ። 24 ህንተና ባዞን ደእያ ሻማሆ ግድዳ አይሁደ ግዶናይሳታ ቃንፅድ፥ ጋደን ቶከትዳ ሻማሁዋ ቦላ ህንተና ቶክኮ፥ መን ጋደ ሻማሆ ግድዳ አይሁደታ ባንታ ኮይሮ በሳን ዛር ቶካናዉ ዋንድ ዳንዳኤተኔ?ሻማሆ ምነ እያ አይፍያ

25 ታ እሻቶ፥ ህንተ ህንተና ኤራንቾ ግድ ጬቀቶፍተ። ታ ህንተዉ ኦድያ እስ ፁር ደኤስ። ሄስካ እስራኤለታፐ ባጋይ ስኦና እፅዳይ ዉርሰ ጋካናዉ ግዶናሽን፥ አታናዉ ደእያ አይሁደ ግዶና አሳይ ኩመ ፆሳኮ ያና ጋካናሳ። 26 ሄሳዳካ፥ እስራኤለ አሳ ኡባይ አታና። ጌሻ ማፃፋን፥

"ኑና አሸይስ ፅዮነፐ ያና፤

ያይቆባ ኮቻፈ ኢታ ኡባ ድጋና።✝

27 ታኒ ኤንታ ናጋራ አቶ ግያ ዎደ

ኤንታራ ጫቃና ጫቆይ ሀይሳ"✝

ጌተትድ ፃፈትስ።

28 አይሁደት ዎንገላ ኤኮና እፅድ፥ ህንተ ግሾ ፆሳራ ሞርከ ግድዶሶና። ግዶሽን፥ ሀእካ ኤንቲ ዶረትዳይሳታ፥ ፆሳይ ኤንታ አዋታ ግሾ ኤንታ ዶሴስ። 29 ፆሳይ ባ እሙዋንነ ባ ፄሳን ቂሮተና። 30 ህንተ አይሁደ ግዶናይሳት ካሰ ፆሳስ ኪተትበከታ። ሽን ሀእ አይሁደት ኪተቶና እፅን፥ ህንተ ፆሳ ማሮተ ኤክደታ። 31 ሄሳዳካ፥ ህንተ ኤክዳ ማሮተ አይሁደት ኤካና መላ ሀእ ፆሳስ ኪተቶና እፅዶሶና። 32 ፆሳይ አሳ ኡባ ባ ማሮተ በሳናዉ ኮይድ፥ አስ ኡባይ ኪተቶና እፃና መላ ኦስ።

33 ፆሳ ዱረተ፥ ጭንጫተነ ኤራተ አኬክድ ኦዳናይ ኦኔ? እያ ፕርዳይ ፕልገተና፥ እያ ኦገይ ኤረተና።✝ 34 ጌሻ ማፃፋን፥

"ጎዳ ቆፋ ኤረይ ኦኔ?

እያ ዞራናዉ ዳንዳኤይ ኦኔ?✝

35 ፆሳስ ታልኤይነ

ታልእያ ዛሪድ ኤከይ ኦኔ?"✝

ያጌስ።

36 ኡባ እ መስ፤ ኡባይ እያን ደኤስ፤ ኡባይ እያ ቦንቾሳ። ፆሳስ መርናዉ ቦንቾይ ግዶ። አምንእ።✝