1 ፆሳ ሸነ ግዶናሽን ማት እመቶና ግሾነ ሀእ ደእያ ሹማትካ ፆሳ ሸነን ሹመትዳ ግሾ አስ ኡባይ ደርያ አይሰይሳታስ ኪተታናዉ በሴስ። 2 ሄሳ ግሾ፥ ማታራ ደኤይሳታስ ኪተቶና እፅያ ኦንካ ፆሳ ኪታ እፄስ። ኪተቶና እፅያ ኦንካ ባ ቦላ ፕርዳ ኤሄስ። 3 አይሰይሳት ኢታ ኦይሳታፐ አትሽን፥ ሎኦ ኦይሳታ ያሾኮና። አይሰይሳታስ ያዮና አጋናዉ ኮያይ? ያኮ ሎኦ ኦ፤ ኤንቲ ነና ጋላታና። 4 ኤንቲ ነዉ ሎኦባ ኦናዉ ሹመትዳ ፆሳ አይለ። ሽን ኔኒ ኢታባ ኦኮ፥ ኤንቲ ኢታባ ኦዳይሳ ሴርያ ግሾ እያዉ ያያ። ኤንቲ ኢታ ኦይሳታ ሴርድ፥ ፆሳ ሀንቁዋ ቆንጭስያ ፆሳ አይለ። 5 ሄሳ ግሾ፥ ፆሳ ሀንቁዋ ፃላላስ ግዶናሽን፥ ህንተ ካሀይ ማርካትያ ግሾ ደርያ አይሰይሳታስ ኪተታናዉ በሴስ።

6 ህንተ ጊራ ጊረይካ ሄሳሳ። ደርያ አይሰይሳት ሄ ኦሱዋ ኦይ፥ ኤንቲ ፆሳ አይለታ ግድዳ ግሾሳ።✝ 7 እሱዋስ እሱዋስ በሰይሳ እምተ። ጊራ ጊራናዉ በሰይሳስ ጊርተ፤ ቃራፃ ቃንፃናዉ በሰይሳስ ቃራፃ ቃንፅተ፤ ያያናዉ በሰይሳስ ያይተ፤ ቦንቾይ በሰይሳ ቦንችተ።

8 እሶይ እሱዋራ ሲቀትተ። ሲቆ አጮፐ አትሽን፥ ህንተ ቦላ ሀራ አጮይ ዶፖ። አሰ ሲቅያ ኦንካ ህገይ ገይሳ ፖልስ። 9 "ላሞፋ፤ ዎፓ፤ ካይሶቶፓ፤ አሞቶፋ" ግያ ኪታይነ ሀራ ኪታ ኡባይ፥ "አሰ ነ ሁጰዳ ዶሳ" ግያ ኪታን ቃሸትስ።✝ 10 አሰ ሲቅያ ኦንካ እያ ቦላ ኢታባ ኦና። ሄሳ ግሾ፥ አሰ ሲቀይስ ህገ ኪታ ፖልስ።

11 ስኮፈ ህንተ ባርክያ ዎደይ ሀእ ግደይሳ አኬክድ ሄሳ ኦተ። ኑ አታና ዎደይ ኮይሮ ኑ አማንዳ ዎድያፐ ሀእ ኑኮ ማትስ። 12 ማ ዎደይ አናዉ ሀኔስ፤ ዎንታይ ማትስ። ህዛ፥ ኑኒ ማ ኦሶ አግድ ፖኦ ኦላ ሚሸ ኦይኮስ። 13 አነ ጋላስ ፖኦን ደእያ አሳዳ ማራን ደኦስ። ማንነ ላይማተራ ጋሄትያ ዱማ ዱማ ቱና ኦሶታን፥* ፓላማንነ ቃናተን ግዶፖ። 14 ጎዳ የሱስ ክርስቶሳ ካንዱዋ ማእተ፤ ህንተ ናጋራንቾ አሳተይ ባ አሙዋ ፖላና መላ እያዉ ቆፖፍተ።