1 ያትን፥ ኑ ማይዛይ አብራሃመይ አይ ደምዴ? 2 አብራሃመይ ኦሶን ፅልዳባ ግድያኮ፥ እ ጬቀትያባይ ደኤስ፥ ግዶሽን፥ ፆሳ ስንን ጬቀታናዉ ዳንዳኤና። 3 ጌሻ ማፃፋይ፥ "አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ" ያጌስ።✝

4 ኦያ ኡራይ ኤክያ ዳሞዘይ፥ እያ ኦሶ ዎልቃስ ጭገትያ ጋተፐ አትሽን፥ እያዉ እሞታ ግደና። 5 ሽን ኦሶ ኦና ኦንካ ናጋራንቹዋ ፅልስያ ፆሳ አማንኮ፥ እያ አማኖይ እያዉ ፅሎተ ግድድ ታይበቴስ። 6 ጌሻ ማፃፋን ዳዊቲ፥ ኦሶይ ባይና ፆሳይ ፅልስያ አሳት አይ መላ አንጀትዳኮ ሀይሳዳ ያግድ ቆንጭሴስ፦

7 "ኤንታ ባላይ አቶ ጌተትዳይሳትነ

ኤንታ ናጋራይ ካመትዳይሳት አንጀትዳይሳታ።✝

8 ጎዳይ እያ ናጋራ ታይቦና አስ አንጀትዳይሳ" ያጌስ።

9 ያትን፥ ዳዊቲ ኦድዳ አንጆይ ቃፃረትዳ አሳ ፃላላሰዬ? ዎይኮ ቃፃረትቦና አሳሴ? ኑኒ፥ "ጌሻ ማፃፋይ፥ ‘አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ’ ያጌስ" ግዳ። 10 ያትን፥ ሄስ አዉደ ሀንዴ? አብራሃመይ ቃፃረትነዬ? ዎይኮ ቃፃረቶና ደእሽኔ? ቃፃረታናፐ ስን ሀንስፐ አትሽን፥ ጉየ ግደና።

11 አብራሃመይ ቃፃረታናፐ ስን እያ አማኖይ እያዉ ፅሎተ ግድድ ታይበትዳይሳ ኤርሳናዉ፥ እያ ቃፃሮይ ማላታ ግድስ። ሄሳ ግሾ፥ አብራሃመይ ቃፃረቶና አማነይሳታስነ አማኖን ፅለይሳታ ኡባስ አዋ ግድስ።✝ 12 እ ቃፃረትዳይሳታስካ አዋ። አብራሃመይ ኤንታዉ አዋ ግድዳይ ኤንቲ ቃፃረትዳ ግሾ፥ ፃላላስ ግዶናሽን፥ እ ቃፃረታናፐ ስን አማንዳ አማኑዋ ኤንቲ ካልዳ ግሾሳ።

13 አብራሃመስነ እያ ሼሻስ፥ "አላምያ ታ ህንተዉ እማና" ያግዳ ኡፋይሳይ፥ አብራሃመይ አማኖን ፅልዳ ግሾሳፈ አትሽን፥ ህገ ናግድ ፖልዳ ግሾ ግደና።✝ 14 ህገስ ኪተትዳይሳት ፆሳይ እማና ግዳ ኡፋይሳ ላተይሳታ ግድኮ፥ አሳ አማኖይ ማደና፤ ፆሳ ኡፋይሳይ ሀዳ ግድስ።✝ 15 ህገ መንይ ፆሳ ሀንቆ ኤሄስ፥ ሽን ህገይ ባይናሶን ህገ መንይ ባዋ።

16 ሄሳ ግሾ፥ ፆሳይ እምዳ ኡፋይሳይ አማኖን ኤከቴስ። ሀ ኡፋይሳይ አብራሃመ ሼሻ ኡባስ ፆሳ አ ኬሀተ ባጋራ እመትዳይሳ ቆንጭሴስ። ሄስካ ህገ ናገይሳታ ፃላላስ ግዶናሽን፥ አብራሃመዳ አማንዳ ኡባሳ። አብራሃመይ ኑ ኡባስ አዋ።✝ 17 ጌሻ ማፃፋን፥ "ታ ነና ዳሮ ካዎተታስ አዋ ኦስ" ጌተትድ አብራሃመ ግሾ፥ ፃፈትስ። ሀ ኡፋይሳይ አብራሃመስ እመትዳይ ሀይቅዳይሳታስ ደኦ እመይስነ ኦራባ ኦያ ፆሳይ እያ ግደይሳ እ አማንዳ ግሾሳ።✝

18 ፆሳይ አብራሃመስ ዳሮ ኮቸ እማናይሳ ጫቅስ። ኡፋይስ ኦናዉ አይኮካ ዳንዳኤቶና ዎደ አብራሃመይ ፆሳን አማንዳ ግሾነ ኡፋይስ ኦዳ ግሾ፥ ዳሮ ካዎተታስ አዋ ግድስ።✝ 19 አብራሃመስ ፄቱ ላይ ኩማና ሀንኮካ፥ ባ ዳቡርዳ አሳተነ ሳራ ናአ የላናዉ ዳንዳኦናይሳ ኤርሸ ባ አማኑዋን ዳቡርቤና።✝

20 ግዶሽን፥ እ ባ አማኑዋን ምንድ ፆሳስ ቦንቾ እሚስፐ አትሽን፥ ፆሳይ እምዳ ኡፋይሳ አማኖና እፅድ፥ ስቤና። 21 አብራሃመይ፥ ፆሳይ ጫቅዳ ጫቁዋ ፖላናይሳ ባ ኩመ ዎዛናን አማንስ። 22 ሄሳ ግሾ፥ ፆሳይ እያ አማኑዋ ፅሎተን ታይብስ።

23 ሽን፥ "እያዉ ፅሎተን ታይብስ" ግያ ቃላይ አብራሃመ ፃላላስ ፃፈትቤና። 24 ሄ ቃላይ ኑ ጎዳ የሱሳ ሀይቆፐ ደንዳ ፆሳ አማንያ ኑስካ ኑ አማኖይ ፅሎተን ታይበታና መላ ፃፈትስ። 25 ፆሳይ እያ ኑ ናጋራ ግሾ፥ ሀይቆስ አድ እሚስ፤ እ ኑና ፅልሳናዉ ሀይቆፐ ደንድስ።✝