Rute 4

ቦኤዝ ኡሩቶ ዎዝስ

1 ቦኤዝ ፑደ ካታማ ፐንግያ ማታን ደእያ ዳባባን ከይድ ኡትስ። እ ያን ኡትዳሽን ካሰ እ ኦድዳ ማታ ዳቦይ ሄ በሳ ይን፥ ቦኤዝ እያኮ፥ "ላ፥ ሀ ሺቃዳ ሀይሳን ኡታ" ያግስ። እካ፥ ሺቅድ ኡትስ።

2 ቦኤዝ ሄ ካታማ ጭማታፐ ታሙ አሳታ ዶርድ፥ "ሀይሳን ኡትተ" ያግስ። ኤንትካ ኡትዶሶና። 3 ቦኤዝ ባ ማታ ዳቡዋኮ "ሞአበ ቢታፈ ስማዳ ይዳ ኑሃማ፥ ኑ እሻ አበመለከ ጋድያ ባይዛና ጋዉሱ። 4 ሄሳ ግሾ፥ ሀይሳን ኡትዳ አሳ ስንንነ ታ ካታማ ጭማታ ስንን፥ ዎዛ ጋዳ ታ ነዉ ኦዳናዉ ቆፓስ። ኔፐ ሀር ማት ባይና ግሾ ኔኒ ዎዛናዉ ኮይኮ ዎዛ፤ እፅኮ፥ ኔፐ ካልያ ማታ ዳቦይ ታና ግድያ ግሾ ታና ኤርሳ" ያግስ።

እ "ታኒ ዎዛና" ያግስ።

5 ቦኤዝ፥ "ኑሃምፐነ ሞአበ ኡሩትፐ ጋድያ ነ ሻምያ ጋላስ አምእዉ ኡሩቶካ ዎዛ፤ ያትኮ ሀይቅዳይሳ ሱንይ እያ ላታ ጋድያን ፄገታና" ያግስ።

6 ሀ ማታ ዳቦይ፥ "ሄሳ ግድኮ፥ ታኒ ዎዛናዉ ዳንዳእከ፤ አይስ ጊኮ፥ ሄስ ታ ቡዞ ላታ ቆሄስ። ሄሳ ግሾ፥ ኔኒ ዎዛ፥ ታኒ ዳንዳእከ" ያግስ።

7 በን ዎደ እስራኤለ ቢታን ዎዙዋነ ላታ ዱናዉ ባይዝያ ዎይኮ ላትስያ ባጋይ ባ ጫማ ቶሁዋፐ ከስድ፥ ሀንኮ ሻምያ ዎይኮ ላትያ ባጋስ እሜስ። እስራኤለ ቢታን ዛልኤስነ ላታስ ማራይ ሀይሳ።

8 ሄሳ ግሾ፥ ሄ ማታ ዳቦይ ቦኤዛኮ፥ "ኔኒ ዎዛ" ግድ፥ ባ ጫማ ቶሁዋፐ ከስድ እሚስ።

9 ያትን፥ ቦኤዝ ጭማታነ አሳ ኡባ፥ "ታኒ አበመለከስ፥ ከልዎናስነ ማህሎናስ ደእያባ ኡባ ኑሃምፐ ሻምዳይሳስ ሀች ህንተ ማርካ። 10 ቃስ ሀይቅዳይሳ ሱንይ ኤንታ ሶ አሳ ሱን ግዶፈ ዎይኮ ካታማ አሳ ታይቡዋፐ ዮናዳ እያ ሱን እያ ላታ ጋድያን ፄግሳናዉ ካሰ ማህሎና ማችዉ ኡሩቶካ ታኒ ዎዘይሳስ ሀች ህንተ ኡባይ ማርካ" ያግስ።

11 ካታማ ፐንግያ ዳባባን ደእያ ጭማትነ አሳ ኡባይ፥ "ኤ፥ ሀይሳስ ኑኒ ማርካ! ጎዳይ ሀኖ ነ ኤክያ ማጫስዉ፥ እስራኤለ አሳ ማይዛ አየታ ግድዳ ራሄልዳነ ልያዳ ኦ። ኔንካ ኤፍራታን ዱረ ግዳ፥ ነ ሱንይ ቤተለመን ኤረቶ። 12 ነ ኬይ፥ ጎዳይ፥ ሀ ናአተ ማጫሴፐ ነዉ እምያ ዘረን ትማራ ይሁዳስ የልዳ ፋረሳ ኬዳ ኦ" ያግስ።

ቦኤዛ ሼሻ

13 ሄሳዳካ ኦድ፥ ቦኤዝ ኡሩቶ ኤክስ እያካ እያዉ ማቾ ግዳሱ። ጎዳይ እዮ ቃንታና መላ ኦን አደ ናአ የላሱ። 14 ማጫሳት ኑሃሞ፥ "ሀች ነና ሄማና አስ ይስቦና ጎዳይ ጋላተቶ! እያ ሱንይ እስራኤለን ቁ ጎ! 15 እያን ነዉ ሳኢ ስማና፥ ነ ጭምያ ዎደ እ ነና ሄማና። አይስ ጊኮ፥ ላፑን አደ ናይታፐካ አዳ ነና ሲቅያራነ ነዉ ኬህያራ፥ ነ ናአ ማችያ ነዉ ናአ የላሱ" ያግዶሶና።

16 ኑሃማ ናኣ እድማሱ፤ ሎይ ድቻሱ። 17 እ ሾሮ ማጫሳት፥ "ኑሃምስ አደ ናእ የለትስ" ያግድ እያ ሱንካ ዮበዳ ግዶሶና። ዮበድ ዳዊታ አዋ እሰየ የልዳይሳ።

18 ፋረሳ የለተይ ሀይሳፈ ካልድ ፃፈትዳይሳ፤

ፋረስ ሄስሮና የልስ፤

19 ሄስሮን ራመ የልስ፤

ራመይ አምናዳበ የልስ፤

20 አምናዳበይ ናአሶና የልስ፤

ናአሶን ሳልሞና የልስ፤

21 ሳልሞን ቦኤዛ የልስ፤

ቦኤዝ ዮበዳ የልስ፤

22 ዮበድ እሰየ የልስ፤

እሰየይ ዳዊታ የልስ።