አሰ ሻኮፋ
1 ታ እሻቶ፥ ህንተ ኑ ቦንቾ ጎዳ የሱስ ክርስቶሳ አማንያባ ግድኮ፥ አሳ ሶምኦ ፄልድ አሰ ቦንቾፍተ። 2 ሌምሶስ፥ ዎርቃ ምግዶ አድ፥ ሎኦ ማኦ ማእዳ ዱረ አስ ህንተ ሺቁዋ ይስ። ቃስ ጩርቃ ማኦ ማእዳ ማንቆ አስካ ይስ። 3 ሎኦ ማኦ ማእዳ አድያ ህንተ አድ ቦንችድ፥ "ነ ሀይሳን ሎእያ ኦይድያን ኡታ" ግድ፥ ቃስ ማንቆ አድያ፥ "ነ ያን ኤቃ ዎይኮ ሀይሳን ታ ቶሁዋ ማታን ሳአን ኡታ" ጌታ። 4 ያትን፥ ህንተ፥ ህንተ ግዶን ሻከተ መይሳታነ ኢታ ቆፋራ ደእያ ዳይናታ መላ ግደከትዬ?
5 ታ ሲቆ እሻቶ፥ ስእተ። አማኖን ዱረ ግዳና መላነ ባና ሲቀይሳታስ እማና ግዳ ሳሎ ካዎተ ላታና መላ ሀ ሳአን ደእያ ማንቆታ ፆሳይ ዶርበነዬ? 6 ሽን ህንተ ማንቆታ ቶቸታ። ህንተና ኡንኤይሳት ዱረታ ግዶኮናዬ? ህንተና ዳይና ስን ጎቸይሳት ኤንታ ግዶኮናዬ? 7 ህንተ ፄገትዳ ሎኦ ጎዳ ሱን ጫየይሳት ኤንታ ግዶኮናዬ?
8 ሽን ጌሻ ማፃፋን፥ "አሰ ኡባ ነና ነ ዶሰይሳዳ ዶሳ" ጌተትድ ፃፈትዳ ፆሳ ካዎተ ህግያ ህንተ ፖልኮ ሎኦ ኦታ።2:8 ሌወ 19:18. 9 ሽን ህንተ አሳ ሶምኦ ፄልድ ቦንችኮ፥ ናጋራ ኦታ ቃስ ህገይ ህንተና ህገ መንዳ አሳዳ ፕርዳና። 10 ኦንካ ህገ ኡባፈ እሱዋ መንድ፥ አትዳ ኡባ ናግኮ ኡባ መንዳዳ ታይበቴስ። 11 "ላሞፋ" ግዳ ጎዳይ፥ ቃስ "ዎፓ" ግስ። ሽን ኔኒ ላሞና አጋዳ ዎዳባ ግድኮ፥ ህግያ መንዳሳ።2:11 ከሳ 20:13-14፤ ዛረ 5:17-18. 12 አይለተፈ ከስያ ህግያ ስንን ፕርዳ ኤካናዉ ደእያ አሳዳ ኦደትተነ ኦተ። 13 አሰ ማሮና ኦናካ ፆሳይ ማሮና ፕርዳና። ሽን ማሮተይ ፕርዳ ፆኔስ።
አማኖነ ኦሶ
14 ታ እሻቶ፥ ህንተፈ እስ አስ ታዉ አማኖይ ደኤስ ግድ፥ ባ አማኑዋ ኦሶን በሶና እፅኮ እያ አይ ማዳኔ? እያ አማኖይ እያ አሻናዉ ዳንዳኢ? 15 ሌምሶስ እስ እሻይ ዎይኮ እስ ምችያ ካሎትኮነ ኤንታዉ ምያባይ ይኮ፥ 16 ህንተፈ እስ አስ ኤንታኮ፥ "ሳሮ ቢተ! ታማ ካይተ! ካልድ ሚተ!" ግድ፥ ኮሽያባ ኤንታዉ እሞና እፅኮ ኤንታ አይ ማዲ? 17 ሄሳ ግሾ፥ ኦሶይ ባይና አማኖይ ባርካ ሀይቅዳይሳ።
18 ሽን እስ አስ፥ "ነዉ አማኖይ ደኤስ፤ ቃስ ታዉ ኦሶይ ደኤስ። ኔኒ ነ አማኑዋ ነ ኦሱዋፐ ሻካዳ ታና በሳ፤ ታካ ታ አማኑዋ ታ ኦሱዋን ነና በሳና" ጋና። 19 ኔኒ፥ እስ ፆሳይ ደኤይሳ አማናሳ፤ ሄስ ሎኦ። ቱና አያናትካ አማኖሶና፤ ያሻን ኮኮሮሶና። 20 ነኖ ኤያዉ! አማኖይ ኦሶፐ ሻከትድ ማዶናይሳ ኤራናዉ ኮያይ? 21 ኑ አዋ አብራሃመይ፥ ባ ናኣ ይሳቃ ያርሾ በሳ ቦላ ዎዳ ዎደ ባ ኦሱዋን ፅልቤኔ?2:21 መ 22:1-14. 22 እያ አማኖይነ እያ ኦሶይ እስፈ ኦዳይሳ በእኪ? እያ አማኖይ እያ ኦሱዋን ፖለትስ። 23 ጌሻ ማፃፋይ፥ "አብራሃመይ ፆሳ አማንስ። ፆሳይ ሄሳ እያዉ ፅሎተ ኦድ ታይብስ" ግዳይስ ፖለትስ። ቃስ እ ፆሳ ዳቦ ጌተትድ ፄገትስ።2:23 መ 15:6፤ 2 ታር 20:7፤ እሳ 41:8. 24 አስ አማኖ ፃላላን ግዶናሽን፥ ኦሶን ፅለይሳ በኣሳ።
25 ሄሳዳካ፥ ላይምያ ራኣባ እስራኤለፐ ኪተትዳይሳታ ሞካዳ ሀራ ኦገራ ኤንታ ሞይዝዳ ዎደ ባ ኦሱዋን ፅላቤኬ?2:25 እያ 2:1-21.
26 ሸምፖይ ሻከትዳ አሳተይ ሀይቆ ግደይሳዳ፥ ኦሶይ ሻከትዳ አማኖይካ ሀይቅዳይሳ።