1 ታ እሻቶ፥ ህንተፈ ዳሮት አስታማረ ግዶፖ። ኑ፥ አስታማረት ሀራታፐ አያ ፕርዳ ኤካናይሳ ህንተ ኤሬታ። 2 ኑ ኡባይ ዳሮባን ባለቶስ። ባ ኦዳን ባለቶና ኦንካ ባናተ ናጋናዉ ዳንዳእያ ፖሎ አስ። 3 ፓራት ኑስ ኪተታና መላ ብፃላ ባርስድ ኑኒ ኮይያ በሲ ኡባ ኤፎስ። 4 ማርካበይ ሄሳ መላ ግታ ግድሸ ዎልቃማ ጫርኩዋን ሱገትኮካ፥ ኤንታ ላገይስ ባ ኮይያ በሲ ዛሪድ ላግያ ጉ ምን ላገትድ ቤስ። 5 ሄሳዳ እንፃርስ አሳተ ግዶን ጉ ግድኮካ ዳሮ ግታባን ጬቀቴስ።

ጉ ታም ዳሮ ግታ ዎራ ፁጌስ። 6 እንፃርስ ታማ መላ። እንፃርስ ኑ አሳተ ግዶን ኢታን ኩምዳ አላመ፤ አሳተ ኡባ ቱንሴስ። ጋናመፐ ከይያ ታማዳ ኑ ደኡዋ ዎ ኡባ ፁጌስ። 7 ዶአታነ ካፎታ፥ ኡሎራ ጎሸተይሳታነ አባን ደእያ መተታ ኡባ አስ ሃሬስ፤ ኤንትካ ሃረትዶሶና። 8 ሽን ኦንካ እንፃርስ ሃራናዉ ዳንዳእቤና። እንፃርስ ዎያ ማርዘይ ኩምዳ ሃረቶና ኢታ መተ። 9 ኑ እንፃርሳን፥ ኑ፥ ጎዳነ ፆሳ ጋላቶስ። ቃስ እያራ ፆሳ ሌምሶን መትዳ አሳ ባዶስ። 10 እስ ዶናፐ ጋላትነ ባደ ከዬስ። ታ እሻቶ፥ ሄሳዳ ሀናናዉ በሰና።✝ 11 ፑልቶይ እስ ኦላፈ ማልእያ ሃነ ጫምያ ሃ ፑልታናዉ ዳንዳኢ? 12 ታ እሻቶ፥ ባላሰ ም ሻማሆ አይፋናዉ ዳንዳኢ? ዎይኮ ዎይነ ም ባላሰ ም አይፈ አይፋናዉ ዳንዳኢ? ጫሞ ሃፈ ማልኦ ሃ ከያናዉ ዳንዳኤና።

13 ህንተ ግዶን ጭንጭነ አኬካንቾይ ኦኔ? ባ ሎኦ ደኡዋ፥ አሽከተንነ ጭንጫተን ኦሰትዳ ኦሶን በሶ። 14 ሽን ህንተ ዎዛናን ጫምያ ቅናተይነ ባና ዶሶይ ደእኮ ጬቀቶፍተ፤ ቱማ ቦላ ዎርዶቶፕተ። 15 ሄሳ መላ ጭንጫተይ ሳሎፐ ይዳባ ግዶናሽን፥ ሄስ አሳባ፥ አላመባ፥ ፃላሄባ። 16 ቅናተይነ ባና ዶሶይ ደእያ ሶን ኦሽነ ኢታ ኦሶ ኡባይ ደኦሶና። 17 ሽን ቦላፈ ያ ጭንጫተይ ኡባፈ ስን ጌሽ። ቃስ ሳሮተ፥ አዳተ፥ ስእድ ኤከይሳ፥ ቃተይሳ፥ ሎኦ አይፈይ ኩምዳይሳ፥ አሰ ሻኮናይሳነ ጩቦተ ባይናይሳ። 18 ሳሮተ ዶሰይሳት ሳሮተ ዘርድ ፅሎተ ቡጮሶና።