Atos 16

Phawuloosinne Sillaasey Qashetidosona

16 Nuuni Xoossaa woossiya bessaa bishin iita ayyaanay I bolla de7idi marothiya issi geela7o gadhindoy nuura gahetasu. Iya kaayada daro miishe ba godatas ehawusu. 17 Phawuloosanne nuna kaallada, "Haysati Ubbaafe Bolla Xoossaa aylleta! Enti hinte attana oge odeyisata" gada waassasu.

18 Ubba gallas hessada gawusu. Shin Phawuloosi yilotidi guye simmidi, he ayyaana, "Yesuus Kiristoosa sunthan neeni iipe keya" gidi kiittis. Iiraka iita ayyaanay iipe keyi aggis.

19 Shin I godati bantaw miishe demmiya ogey dhayidaysa be7idi, Phawuloosanne Sillaase oykidi, dabaaba daynnata sinthe goochi efidosona. 20 Daynnata sinthe enta efidi, "Haysati Ayhude asi gidishe nu katamaa asaa daro waaysosona. 21 Nuuni Roome biitta asi gidishe ekanawunne oothanaw woga gidonnaba tamaarsoosona" yaagidosona.

22 Asay issi bagga gididi, Phawuloosa bollanne Sillaase bolla dendidosona. Daynnati enta ma7uwa qaaridi xam7an shocana mela kiittidosona. 23 Enta daro wadhidaape guye, qasho keethi gelsidosona. Qasho keethaa naageysika enta minthi naagana mela kiittidosona. 24 Qasho keethaa naageysi he kiita ekidi, Phawuloosanne Sillaase qasho keethas qol7a gelsis. Enta tohuwa duxis.

25 Shin giddi bilahe gidiya wode Phawuloosaranne Sillaasera woossishenne mazmure yexishe Xoossaa galatoosona. Qasho keethan de7iya hara asatika enti giyaba si7oosona. 26 Qoponna qasho keetha baasoy qaaxana gakanaw biitta qaaxoy hanis. He saatenka penge ubbay dooyetis; qashetida asa ubbaa santhalaatay birsheti wodhis. 27 Qasho keethaa naageysi dhiskofe barkida wode qasho keethaa penge ubbay dooyetidaysa be7idi qasho asay kessi eki bidaba daanin bana wodhanaw mashshe ekis. 28 Shin Phawuloosi qaala dhoqu oothidi "Nu ubbay haysan de7iya gisho neeni nena qohopa" yaagis.

29 Qasho keethaa naageysi xompe woossi ekidi ellesidi gaathi woxis. Kokorishe Phawuloosa sinthaninne Sillaase sinthan gufannis. 30 Enta kare kessidi, "Ta godato, taani attanaw ay oothanaw bessii?" yaagis.

31 Phawuloosaranne Sillaasera iyako, "Godaa Yesuus Kiristoosa ammana; neeranne ne soo asaara attana" yaagidosona. 32 Enti iyasinne iya son de7iya ubbaas Godaa qaala odidosona. 33 Qamma he saatenka qasho keetha naageysi enta efidi enta madunthaa meeccis. Ellesidi ba soo asa ubbaara xammaqetis. 34 Phawuloosanne Sillaase ba soo efidi entaw kathi aathis. I ba soo asa ubbaara Xoossa ammanida gisho ufaytis.

35 Sa7i wontin daynnati, "He asata billa" yaagidi wotaadareta halaqata iyako kiittidosona. 36 Qasho keetha naageysi, "Hinte biletana mela daynnati kiittidosona. Hiza, keyidi saro biite" yaagidi he kiita Phawuloosas odis.

37 Shin Phawuloosi, "Nuuni Roome asi*16:37 Roome asi: Phawuloosi Roome asi yaagidi bana xeegiday he wode Ayhude biitta haarey Roome kawotethaa gidida gishosa. He wode Roome biittan de7iya asay pirdi bayna garaafetokona. gidishin enti nuna pirdi bayna asaa sinthan wadhidi, qasho keethan yeggidosona. Ha77i nuna geeman keyidi boo goonna? Hanenna, enti banta huuphen yidi nuna kesso" yaagis.

38 Wotaadare halaqati daynnatas hessa odin, Phawuloosaranne Sillaasera Roome biitta ase gididaysa si7ida wode yayyidosona. 39 Hessa gisho, daynnati yidi entako, "Nuuni hintena qohida" gidoosona. Qasho keethafe kare enta kessidi, katamape keydi baana mela woossidosona. 40 Phawuloosaranne Sillaasera qasho keethafe keyidi Liidiya soo bidosona. Yan ammaneysatara gaketidi enta minthethidi keydi bidosona.