1 Ne taw ta aaye dhanthi dhammida

ta isha gididaako aybe!

Ta nena ogen demmada yeeridaako,

tana oonika borennashin.

2 Taani nena kaalethada,

tana tamaarsida ta aaye soo gelsarkinashin.

Mal7iya Oromaane gum7ethaanne

lo77iya woyne ushsha ta nena yan ushsharkina.

3 Tana ne haddirsa kushey borkotisees,

ne ushacha kushey tana qoommes.

4 Hinteno, Yerusalaame geela7oto,

ta siiqoy ba wode dendana gakanaw,

koyrottidi hinte iya denthonaada hadara gayis.

5 Ba siiquwa hashen zempada,

mela biittafe yaara hanna oonee?

Beni ne aayiya nena iqetada yelida,

apile mithaa garsan ne zin7idashin,

nena ta barkisas.

6 Merina siiquwan tana ne wozanan attama;

ne qesiyan maatameda ta xalaala oyka.

Siiqoy hayqo mela mino;

qanaatey si7oole mela iita;

iya lacoy Xoossaa tama laco mela.

7 Daro haathi siiqo tama toysanaw danda7enna;

di7oyka meeccidi efanaw danda7enna.

Asi siiqo shammanaw baw de7iya ubbaa immikoka,

siiqoy miishen shametonna gisho, asi iya kadhees.

8 Dhanthi tiran uttiboona micha nuus de7awusu;

azini iyo oychiko, nu iw ay oothanee?

9 Iya gimbe dirsi gidiyako,

nuuni I bolla adussa bira gimbe gimbana;

iya dirsa penge gidiyako ziga ibithe medhana.

10 Taani dirsa gimbe;

ta dhanthay gimbe bolla de7iya shako mela;

taani ta siiquwara de7iya wode I tanan ufaytees.

11 Solomones Ba7aal-Hamoonan woyne gadey de7ees;

he woyne gadiya une ootheysatas immis.

Kera ekidaysati ayfiya gisho,

issoy issoy mukulu bira iyaw ehoosona.

12 Shin taw ta buzo woyne gadey de7ees;

Solomone, neeni mukulu bira eka;

une ekidi ootheysati nam7u xeetu bira eko.

13 Neno, atakiltiya giddon de7iya ta siiqe,

ne laggeti ne qaala si7anaw koyoosona;

ne qaala tanaka sissa.

14 Ta siiquwaw, taako elle ya!

shitto maatay doliya dereta bollara,

gupiya gen7e woyko woshi7e marada hana.