Nuuni Kiristoosan Issino
1 Hiza, Godaa gisho qashetida taani, hinte xeegetida xeessas bessiya de7o daana mela hintena woossayis. 2 Hinte ubba wode aadatanne hayo gidite; issoy issuwa danda7itenne siiqon de7ite.4:2 Qola 3:12-13. 3 Sarotethan qashetidi Ayyaanay immiya issifetetha naaganaw minnite. 4 Xoossay hintena xeegida wode issi ufaysas xeegidaysada issi asatethinne issi Ayyaani de7ees. 5 Issi Goday, issi ammanoynne issi xinqatey de7ees. 6 Ubbaafe bolla gidida, ubbaa baggara oothiyanne ubbaa giddon de7iya issi Xoossay, ubbaa Aaway de7ees.
7 Shin Kiristoosi immanaw koydaysada nu issoy issoy dumma dumma imota ekida. 8 Hessa gisho, Xoossaa qaalay,
"I pude keyida wode
di7etida darota baara ekidi bis;
asaaska imota immis"
yaagees.4:8 Maz 68:18. 9 Yaatin, "Pude keyis" guussay woy guussee? I koyro duge, sa7aa ziqa bessaa wodhis guussu gidonna ixiko ay guussee? 10 Ha duge wodhidaysi, ubba bessan bentanaw ubbaafe dhoqa saluwa keydaysi iya.
11 I issota issota hawaareta, issota issota nabeta, issota issota Wongela sabaaketa, issota issota woosa keethi heemmeyisata, issota issota astamaareta oothidi immis. 12 I hessa oothiday Kiristoosa asatethi gidida woosa keethi dichanawunne ammaniya asaa Xoossaa oosos giigisanaasa.