12 Ta ishato, taani hintera de7iya wode ubban hinte kiitetidaysada, ha77i taani hinte matape haakinka, kaseysafe aathidi, kiitetanaw bessees. Xoossaas yashshaninne kokorsan hinte atotetha polanaw oothite. 13 Xoossay, hinte iyaw ero gidi kiitetana mela ubba wode hinte giddon oothees.

14 Ay ooso oothisheka zuuzumonna woyko palamonna oothite. 15 Geellanne nagarancho asaa giddon boretonayisata, geeshshatanne pokoy bayna Xoossaa naytada gidite. Hinte enta giddon salo xoolintoda poo7ishe,✝2:15 Zaare 32:5. 16 de7o immiya kiitaa entaw odite. He wode ta daabursaynne ta oosoy mela attiboona gisho, Kiristoosi yaa gallas ta hintenan ceeqetana.