Abrahaame Paacetetha
1 Hessafe guye, Xoossay Abrahaame paacis; iya, "Abrahaame" yaagidi xeegis.
I, "Yee" gidi koyis.
2 Xoossay, "Neeni dosiya ne issi na7a Yisaaqa ekada, Mooriya biitta ba. Yan taani nena bessiya issi dere bolla iya xuussa yarsho oothada taw yarsha" yaagis.
3 Wontetha gallas Abrahaamey guura dendidi, ba hariya caanis. Ba aylletape nam7atanne ba na7a Yisaaqa baara ekidi, xuussa yarshuwas gidiya mitha qeri ekidi, Xoossi iya bessiya bessi baanaw dendis. 4 Heedzantho gallas Abrahaamey dhoqu gidi, he bessa haahora be7is. 5 Abrahaamey ba aylleta, "Hinte hariyara haysan de7ishite. Taara ta na7aara ya bidi Xoossas goyinnidi, hinteko simmana" yaagis.
6 Abrahaamey yarshuwa mitha denthidi, ba na7a Yisaaqa toossis. I baw tamanne mashshe oykis. Enti nam7ay issife bishin; 7 Yisaaqi ba aawa Abrahaame, "Ta aawaw" yaagis.
Abrahaamey, "Yee, ta na7aw" yaagis.
Yisaaqi, "Tamaynne mithay haysish; shin xuussa yarsho urge dorsay awunee?" yaagis.
8 Yaatin Abrahaamey, "Ta na7aw, xuussa yarsho urge dorsa Xoossay baw immana" yaagis. Yaagin enti nam7ay issife bidosona.
9 Enti Xoossay iyaw odida bessa gakida wode, Abrahaamey yan yarsho bessi giigisidi, mithi hiixis. Ba na7a Yisaaqa qachidi, he mitha bolla zin7isis. 10 Abrahaamey ba na7a shukanaw ba kushiya yeddidi mashshe ekis. 11 Shin Godaa Kiitanchoy salope, "Abrahaame, Abrahaame" yaagidi xeegis. I, "Yee" yaagidi koyis.
12 Kiitanchoy, "Na7a bolla ne kushiya wothofa; iya aybibaaka oothofa. Neeni ne issi na7aa tana diggona gisho, neeni Xoossas yayyeysa taani erayis" yaagis.