16 Taani Aawa woossana; hintera merinaw daana mela minthetheysa hintew immana. 17 He Ayyaanay Xoossaa tumaa qoncisees. Ha alamiya asay iya be7onna gishonne eronna gisho iya ekanaw danda7okona. Shin I hintera de7iya gishonne hinte giddon daana gisho hinte iya ereeta.

18 "Taani hintena aayiya aawu bayna na7ada hinte xalaala aggike; simmada hinteko yaana. 19 Guutha wodepe guye alamey tana zaari be7enna, shin hinte be7ana. Taani de7on de7iya gisho hinteka de7on de7ana. 20 Taani ta Aawan, hinte tanan, qassi taani hintenan de7eysa hinte he gallas erana.

21 "Ta kiitaa ekidi naagey tana dosees. Tana doseysa ta Aawayka dosees; taanika iya dosayis; taani iyaw qoncana" yaagis.

22 Asqoroota Yihuda gidonna Yihudi Yesuusako, "Godaw, neeni waatada alamiyas gidonashin nuus nena qoncisanee?" yaagis.

23 Yesuusi zaaridi, "Tana dosiya oonika ta qaalas kiitetana. Ta Aaway iya dosana. Qassi ta Aawaynne taani iyako yidi iyara daana. 24 Tana dosonna oonika ta qaalas kiitetenna. Hinte si7iya qaalay tana kiitida Aawabape attishin, tabaa gidenna.

25 "Taani hintera ha77i de7ashe hessa hintew odas. 26 Shin Aaway ta sunthan kiittana minthethiya Geeshsha Ayyaanay, hintena ubbaba tamaarsana. Taani hintew odida ubbaa I hintena hassayisana.