23 Wotaaddareti masqaliya bolla iya kaqidaape guye, iya ma7uwa ekidi, oyddu bessan shaakidi, isso isso ekidosona. Yeda ma7etiya iya adussa ma7uwa ekidosona. 24 Wotaaddareti, "Oona gakaneeko, saama yegganaape attishin, ma7uwa peedhoko" yaagidosona. Hessi haniday Geeshsha Maxaafan,

"Ta ma7uwa shaaki ekidosona;

ta adussa ma7uwa bollaka saama yeggidosona"

geetetidaysi poletana melasa.✝19:24 Maz 22:18. Hessa gisho, wotaadareti hessa oothidosona.

25 Shin Yesuusa masqaliya matan iya aayiya, iya aaye michiya, Qeliyoophe machiya Mayraamanne Magdela Mayraama eqidosona. 26 Yesuusi ba aayiwunne I dosiya tamaarey yan eqidaysata be7idi, ba aayeko, "Ta aaye, ne na7aa haysa be7a" yaagis.

27 Hessafe guye, he tamaariyako, "Ne aayiw hanno be7a" yaagis. He tamaarey iyo he wodepe doomidi baara daana mela soo efis.