Yohaanisa Wongela 20

Yesuusi Magdela Mayraamis Qoncis

11 Shin Mayraama he duufuwa doonan eqada yeekashe hokada duufuwa giddo xeellasu. 12 Bootha ma7o ma7ida nam7u kiitanchoti Yesuusa ahay zin7ida bessan issoy huuphesoora hankoy tohosoora uttidashin be7asu. 13 Enti iiko, "Maccasete, ayis yeekay?" yaagidi oychidosona.

Iya, "Enti ta Godaa efidosona; enti awun wothidaako taani erike" yaagasu.

14 Hessa gidaape guye, iya guye simma xeelliya wode, Yesuusi yan eqidaysa be7asu. Shin I Yesuusa gididaysa erabuku. 15 Yesuusi iiko, "Maccasete, ayis yeekay? Oona koyay?" yaagidi oychis.

Mayraama atakilte oosanchuwa daanin, "Godaw, ne ekidaba gidiko, iya awun wothidaako taw odarkii. Taani iya ekana" yaagasu.

16 Yesuusi iiko, "Mayraame" yaagis.

Iya iyako simmada, Ibraawetho doonan "Rebuuni" yaagasu. Hessas birshethay "Astamaariyaw" guussu.

17 Yesuusi iiko, "Taani buroo ta Aawako boonna gisho, tana oykofa. Shin ta ishatako bada, ‘Taani ta Aawakonne hinte Aawako, ta Xoossaakonne hinte Xoossaako, simmana gis’ gada entaw oda" yaagis.

18 Magdela Mayraama Godaa be7idaysanne iw hessa I odidaysa bada iya tamaaretas odasu.