25 Heko, issi gallas Muse woga eriya issi uray dendidi Yesuusa yaagidi paace oysho oychis. "Astamaariyaw, merina de7o laattanaw taani ay ootho?" yaagis.✝10:25 Maato 22:35-40; Mar 12:28-34.

26 Yesuusi, "Muse maxaafan xaafetidaysi woygii? Ne waata nabbabay?" yaagis.

27 Addey zaaridi, " ‘Ne Godaa ne Xoossaa, ne kumetha wozanape, ne kumetha shempofe, ne kumetha wolqaafenne ne kumetha qofaape dosa. Qassi ne shooruwa ne huupheda dosa’ yaagees" yaagis.✝10:27 Leewe 19:18; Zaare 6:5.

28 Yesuusi iyako, "Neeni like zaaradasa, neka hessada ootha. Neeni merinaw de7on daana" yaagis.✝10:28 Leewe 18:5.

29 Shin uray bana xillo oothanaw koyidi, "I ta shooroy oonee?" yaagis.

30 Iya oyshaas Yesuusi yaagidi zaaro immis; "Issi ase de7eysi Yerusalaame katamape duge Iyaarko katama bishin, oge bolla pangati keyidi shocidosona. Iya ma7uwa qaari ekidi hayqopenne paxape giddon yeggidi bidosona. 31 Guyepe, Ayhude kahine issoy he ogiyara ba buussu bishe uraa be7idi deshshi gidi aadhis. 32 Qassi issi Leewe de7eysi he bessaa gakishe uraa be7idi, hara soora aadhidi bis. 33 Shin, issi Samaare biitta ase de7eysi he ogiyara yishe uraa be7idi iyaw qadhetis✝10:33 2 Taari 28:15. 34 Iyako shiiqidi, iya maduntha bolla zaytenne woyne tigidi qachis. Ba hariya bolla utisidi imathi aqiya keethe efis. He bessan iyaw koshshiyaba ubbaa oothis. 35 Wontethe nam7u dinaare kessidi imatha keetha aawas immidi, ‘Hayyana ha uraa loytha xeella. Taani new immidaysafe bollara ne kessiyaba ubbaa ta new ciggana’ yaagis.

36 "Hiza, ha heedzu asatape pangati shocida uraas shoorotey new oona daanii?"

37 Uray zaaridi, "Iyaw qadhetidaysaka" yaagis.

Yesuusi, "Neka bada hessada ootha" yaagis.