Yesuusi Woosaba Tamaarsis
1 Issi gallas Yesuusi issi bessan woossees. Woosaa wursida wode iya tamaaretape issoy, "Godaw, Yohaanisi ba tamaareta woosa tamaarsida mela neka nuna woosa tamaarsa" yaagis.
2 Yesuusi, "Haysada yaagidi woossite:
" ‘Salon de7iya nu aawaw
ne geeshsha sunthay anjeto;
ne kawotethay yo.
3 Nu gallasa kathaa hachi hachi nuus imma.
4 Nuna qoheyisata nuuni atto geysada,
nu nagara atto ga;
paacen nuna gelsofa’ yaagite" yaagis.
5 Kaallidika, Yesuusi ba tamaaretako yaagis: "Leemisos hintefe issuwas laggey de7ees. I giddi bilahe ba laggiya soo bidi, ‘Ta laggiyaw, miyabay de7iko taw immarki. 6 Taw lagge gidida issi asi ogepe yin, iyaw aathiyaba dhayas’ yaagiko,
7 "Iya laggey keetha giddon gididi, ‘Hayyana tana waaysopa, pengey gordetis. Ta naytika taara arsa bolla zin7idosona. Yaaniya gisho, dendada ne koyaba immanaw danda7ike’ yaagiyee? 8 Ta hintew odayis; laggetetha gisho dendidi immanaw koyonna ixikoka woosan salethida gisho, dendidi koshshiyaba ubba immees.
9 "Hessa gisho, taani hintew odayis; woossite hintew imetana; koyite hinte demmana; kare yidi xeegite hintew dooyetana. 10 Gaasoyka, woossiya ubbay ekees; koyey demmees; kare yidi xeegeysas dooyetees.
11 "Hinteno, aawato hinte giddofe na7i uythi woossin, shuchu immey oonee? Molo woossin shooshi immey oonee? 12 Woyko phuuphulle woossiko korne immii? 13 Hinte iitata gidishe hinte naytas lo77oba immo eriko, salon de7iya hinte aaway woosseysatas Geeshsha Ayyaana waatidi aathidi immennee?" yaagis.