27 Yesuusi wogolope keyidi sa7an wodhishin tuna ayyaanan oyketida uray katamaape keydi iyara gahetis. Daro laythi ma7o ma7onna kallo duufon de7eesipe attishin, soo gelenna. 28 Yesuusa be7ida wode iya sinthan gufannidi, ba qaala dhoqu oothidi, "Ubbaafe Bolla Xoossaa na7aw Yesuusa neera taw aybi issifetethi de7ii? Hayyana tana ha77i un7ethofarki" yaagis. 29 Hessa I giday, tuna ayyaanay uraape keyana mela Yesuusi hanqida gishosa. Daro wode tuna ayyaanay iya haarida gisho santhalaataninne toho qachiya biratan qashetidi naagetees. Shin qashuwa duuthidi tuna ayyaanan laagetidi mela biitta gelis.
30 Yesuusi, "Ne sunthay oone" yaagidi oychis.
I, daro tuna ayyaanati iya oykida gisho bana, "Leegiyona" gis. 31 Tuna ayyaanati bantana Si7oole kiittonna mela woossidosona.
32 He bessan zooze bolla miya guduntho wudey hemetees. Hini gudunthotan gelino gidi woossidosona, ika "Gelite" gis. 33 Tuna ayyaanati uraape keyidi gudunthotan gelidosona. Wudey deriyape duge gurguxidi abban gelis.
34 Henthanchoti hanidaysa be7ida wode woxi bidi, katamaninne guta ubban odidosona. 35 Asay hanidaba be7anaw keyidi Yesuusako yidosona. Tuna ayyaanay keyida uray ma7o ma7idi, iya wozanay simmin, Yesuusa toho matan uttidaysa demmidi yayyidosona.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)