Marcos 11

Gita Bonchon Yerusalaame Geluwa

1 Enti Yerusalaame matishe, Shamaho zuma matan de7iya Beetefaagenne Bitaane katamata gakidosona. Yesuusi ba tamaaretape nam7ata sinthe kiittidi, 2 "Hintefe sinthan de7iya gutaa biite; yaa gelida mela oonika toggiboonna qashon de7iya hare mari hinte demmana, iya billidi, haa eki yiite. 3 Oonika hintena, ‘Haysa ayis oothetii?’ yaagidi oychiko, ‘Goday iya koyees, ellesidi haa yeddana’ yaagite" yaagis.

4 Enti bidi, hare mari kare bolla oge matan qashetidi de7eysa demmidi billidosona. 5 He bessan eqida issi issi asati entako, "Hare maraa waatanaw billeetii?" yaagidi oychidosona. 6 Iya tamaareti Yesuusi bantana kiittidaysa odin, asati yeddi aggidosona. 7 Enti hare maraa Yesuusako ehidi, banta ma7uwa iya zokon hiixin Yesuusi he hare maraa toggis. 8 Daro asay banta ma7uwa ogiyan hiixidosona; qassi harati mitha tashe tashidi, ogen hiixidosona. 9 Yesuusape sinthara hemetiya asaynne iya kaalliya asay banta qaala dhoqu oothidi,

"Hosaana!*11:9 Hosaana: Maato 21:9 be7ite. Xoossay galatetto!

Godaa sunthan yeysi anjetidaysa.✝11:9 Maz 118:25.

10 Godaa sunthan yaa nu aawa

Dawita kawotethay anjetidaysa.

Ubbaafe Bolla Salon

de7iya Xoossay galatetto"

yaagidosona.

11 Yesuusi Yerusalaame bidi, Xoossaa Keetha gelis. Qassi ubbaba yuuyi xeellidaape guye, sa7i qammiya gisho, tammanne nam7u tamaaretara Bitaane katama bis.