Marcos 6

Ichashu Mukulu Asaa

30 Tammanne nam7u hawaareti simmi yidi enti oothidabaanne tamaarsidaba ubbaa Yesuusas odidosona. 31 Entako yaa asaynne biya asay darida gisho, Yesuusaranne iya tamaaretara, hari attoshin kathi maanawuka enta gathonna ixis. Yaanin, Yesuusi entako, "Nurka guuthi shempi ekanaw asi bayna bessi yedhite" yaagis. 32 Hessa gisho, enti bantarka wogolon gelidi asi bayna bessi bidosona.

33 Enti bishin daro asay enta be7idi eridosona. Yaatin, katama ubbaafe asay tohora woxi bidi enti biya bessaa entafe sinthe gakidosona. 34 Yesuusi wogoluwape wodhidi daro asa be7is. Asay heemmiya asi bayna dorsa mela gididaysa be7idi entaw qadhetidi enta darobaa tamaarsis.✝6:34 Taybo 27:17; 1 Kawo 22:17; Hiz 34:5; Maato 9:36.

35 Sa7ay omarsiya wode Yesuusa tamaareti iyako yidi, "Haysi bessay asi bayna bessi; ha77i sa7ika qammis. 36 Asay gutatanne katamata bidi bantaw miyaba shammana mela asa yedda" yaagidosona.

37 Shin Yesuusi zaaridi entako, "Asaas miyaba hinte immite" yaagis.

Enti, "Nuuni bidi nam7u xeetu dinaaren uythu shammidi asaa muzana mela koyay?" yaagidi oychidosona.

38 Yesuusi entako, "Hintew aapun uythi de7ii? Ane bidi be7ite" yaagis.

Enti be7idi, "Ichashu uythunne nam7u molo" yaagidosona.

39 Yesuusi ba tamaareta asa ubbaa cugan cugan shaakidi maatan utisana mela kiittis. 40 Asay xeetu cuganinne ishatamu cugan shaaketi shaaketi uttidosona. 41 Yesuusi ichashu uythaanne nam7u molota ekidi, pude salo xeellidi Xoossaa galatis. Uythaa menthidi asaas gishana mela ba tamaaretas immis. Qassi nam7u molota enta ubbaas shaakis. 42 Asa ubbay midi kallidosona. 43 Attida uytha tiifiyanne molota tiifiya, iya tamaareti tammanne nam7u gayta kumethi denthidosona. 44 Uythaa mida adde asaa tayboy ichashu mukulu.