17 He daro asa giddofe issi uray zaaridi, "Astamaariyaw, ta na7aa bolla odetethi diggiya tuna ayyaanay de7iya gisho, iya neeko ekada yas. 18 Ha tuna ayyaanay iya oykiya wode ubban, iya shoci yeggees; iya doonara gopontoy yees; qassi ache garcisees; asatethayka minnees. Iyape ha tuna ayyaana kessana mela, ne tamaaretas odas, shin kessanaw danda7ibookona" yaagis.
19 Yesuusi zaaridi entako, "Ammanonna ha wodiya asaw! Taani hintera awude gakanaw daanee? Qassi hintena awude gakanaw danda7anee? Na7aa taako haa eki yiite" yaagis. 20 Enti na7aa iyako ehidosona; he tuna ayyaanay Yesuusa be7ida mela na7aa kokorsis; na7ay sa7an kundidi, doonara gopontoy toofu gishin gondoretis. 21 Yesuusi he na7aa aawako, "Haysi ne na7aa oykoosape ay mela wode gidanee?" yaagidi oychis.
Na7aa aaway, "I guuthan de7ishin oykis. 22 Iya wodhanaw daro wode tamaninne haathan yeggees, shin ne danda7iko, nuus qadhetarki, nuna maaddarki" yaagis.
23 Yesuusi iya, " ‘Neeni danda7iko gay?’ Ammaniya oodeska ubbabay danda7etees" yaagis.
24 Ellesidi na7aa aaway ba qaala dhoqu oothidi, "Taani ammanayis, shin guja ammananada tana maaddarki" yaagis.
25 Yesuusi asay dari dari beysa be7idi, tuna ayyaana, "Ha tullenne muume ayyaanaw, ha na7aape keya gada nena ta kiittayis; qassi nam7antho iyan gelopa" yaagis.
26 He tuna ayyaanay waassidi, na7aa daro kokorsidi, iyape keyis. Na7ay hayqida daanin, daro asay, "Na7ay hayqis" yaagidosona. 27 Shin Yesuusi na7aa kushiya oykidi denthin, na7ay dendi eqis.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)