Maatosa Wongela 21

Gita Bonchon Yerusalaame Geluwa

1 Yesuusaranne iya tamaaretara Yerusalaame matidi, Shamaho zuma bolla de7iya Beetefaage geetetiya gutaa gakishe, Yesuusi ba tamaaretape nam7ata baape sinthe yaagidi kiittis: 2 "Hintefe sinthan de7iya guta biite. Yan issi harey qashon de7iyaro I maarara hinte demmana. Enta billidi haa eki yiite. 3 Oonika hintena oychiko, ‘Goday entana koyees’ yaagite. I entana iiraka yeddi aggana" yaagis.

4 Hessika nabey,

5 "Xiyoone katamaas,

‘Heko, ne kawoy ashke gididi, hare bollanne

hare mara bolla uttidi, neeko yees’ yaagite"

yaagidi xaafidaysi poletana mela hessi hanis.✝21:5 Zaka 9:9.

6 Iya tamaareti bidi Yesuusi enta kiitidaysada oothidosona. 7 Hariiwunne hare maraa ehidi bollara ma7ida banta ma7uwa enta zokon yeggidosona. Yesuusi ma7ota bolla uttis. 8 Daro asay banta ma7uwa ogiyan hiixidosona. Harati bonco tashidi oge bolla yeggidosona. 9 Yesuusape sinthara hemeteysatinne iyape guyera kaalliya daro asay,

"Hosaana!*21:9 Hosaana: Ibraawetho doonan hosaana guussay "Nuna ashsha" guussu. Qassi asay Xoossaa galatanaw go7etiya qaala. Dawita na7ay galatetto!

Godaa sunthan yeysi anjetidaysa!

Bonchoy Ubbaafe Dhoqa Saluwan Xoossaas gido!"

yaagidi waassidosona.✝21:9 Maz 118:25.

10 Yesuusi Yerusalaame katamaa gelida wode he kataman de7iya asa ubbay, "Haysi oonee?" yaagidi yarkidosona.

11 Asay, "Haysi Galilan de7iya Naazirete katamaape yida nabiya Yesuusa" yaagidosona.