Maatosa Wongela 24

Iitanne Lo77o Aylle Leemiso

45 "Yaatin, ba soo asaas kathaa koshshiya wodiyan immana mela iya goday doorida ammantheysinne wozanaama aylley oonee? 46 I ba goday kiittidaysa oothishin iya goday yidi demmiya aylley anjetidaysa. 47 Taani hintew tuma odayis; goday he aylliya babaa ubbaa bolla shuumana. 48 Shin he aylley iita gidiko, ‘Ta goday gam7idi yaana’ yaagidi ba wozanan qopidi, 49 ba lagge oosanchota wadho doomiko, mathoteysatara miikonne uyiko, 50 he aylliya goday I qoponna gallasinne I eronna saaten, 51 yidi iya qanxerethana. Iya qaada cubbotara oothana. He bessan iyaw yeehonne ache garcethi gidana.