Mateus 26

Yesuusa Bolla Maqetidosona

1 Yesuusi ha timirtiya ubbaa wursida wode ba tamaaretako, 2 "Nam7u gallasape guye, Paasika Ba7aale bonchiya gallas gideysa ereeta. He gallas Asa Na7i masqale bolla kaqetanaw asa kushen aadhidi imetana" yaagis.✝26:2 Kessa 12:1.

3 He wode kahine halaqatinne cimati, Qayyaafa geetetiya kahine halaqaa keethan shiiqidi, 4 asi eronna Yesuusa oykidi, wodhanaw maqetidosona. 5 Shin enti, "Asay ooshshi kessonna mela gidi, Paasika bonchiya gallas hessa oothoko" yaagidosona.

Yesuusa Shitto Tiyida Maccasiw

6 Yesuusi Bitaane kataman baro hargida Simoona son de7ees. 7 Yesuusi imatuwa bolla de7ishin issi maccasiya albasxiroosa philqaaxe kumetha daro al7o shitto eka yada Yesuusa huuphen tigasu.✝26:7 Luqa 7:37. 8 Shin Yesuusa tamaareti hessa be7idi hanqetidi, "Ha shittoy coo iitey aybisee? 9 Ha shittoy al7o gaten bayzetidi, miishey manqotas imetanaw danda7etees" yaagidosona.

10 Yesuusi enti geysa eridi, entako, "Ha maccasiw ayis waaysetii? Iya taw lo77oba oothasu. 11 Manqoti ubba wode hintera daana. Shin taani hintera ubba wode de7ike.✝26:11 Zaare 15:11. 12 Iya ha shittuwa ta bolla tigidaysi tana mooganaw giigisanaasa. 13 Taani hintew tuma odayis; biitta ubban ha Wongelay sabbaketiya bessan awunka, asay iyo hassayana mela iya oothidaysi odetana" yaagis.

Yihudi Yesuusa Aathidi Imuwa

14 He wode tammanne nam7u Yesuusa tamaaretape issoy, Asqoroota Yihuda geeteteysi kahine halaqatako, 15 bidi, "Taani hintew Yesuusa aatha immiko, hinte taw ay immanee?" yaagidi enta oychis.✝26:15 Zaka 11:12. Enti zoretidi hastamu bira santime*26:15 Bira santime: Aykoyka guzhetiboona geeshsha bira santime guussu.*26:15 Hastamu bira santime: Hastamu bira santimey Isra7eele biittan aylley shametiyanne bayzetiya gate. immidosona. 16 Hessafe guye, Yihudi Yesuusa aathidi immanaw injetiya wode wochees.

Godaa Kahuwa

17 Uytha Ba7aale bonchiya koyro gallas, Yesuusa tamaareti iyako yidi, "Paasika bonchiya gallas neeni maana kathi nuuni awun giigisino?" yaagidosona.

18 Yesuusi entako, "Kataman de7iya addiyako bidi, ‘Astamaarey, taw wodey gakida gisho, ta tamaaretara Paasika bonchiya gallasa ne son aathana yaagees’ yaagite" yaagis.

19 Iya tamaareti Yesuusi bantana kiitidaysada oothidi, Paasika Ba7aale gallas maana kathaa giigisidosona.

20 Sa7ay omarsiya wode, Yesuusi tammanne nam7u hawaaretara kathi maanaw uttis. 21 Enti mishin, Yesuusi entako, "Taani hintew tuma odayis; hintefe issi uray tana aathidi immana" yaagis.

22 Enti daro dagammidi, issoy issoy, "Godaw, tuma taneshsha?" gidi iya oychidosona.

23 Yesuusi zaaridi, "Ba kushiya taara issife shaatiyan yeddeysi I tana aathidi immana.✝26:23 Maz 41:9. 24 Asa Na7ay, Xoossaa qaalan iyaw xaafetidaysada hayqana. Shin Asa Na7aa aathidi immiya uraa ayye! He uray yeletonna attidaako iyaw lo77oshin" yaagis.

25 Iya aathidi immanaw de7iya Yihudi zaaridi, "Astamaariyaw, neeni gey taneyee?" yaagis.

Yesuusi zaaridi, "Neeni ne huuphen gadasa" yaagis.

26 Enti mishin, Yesuusi uythaa ekidi Xoossaa galatis. He uythaa menthidi ba tamaaretas immidi, "He7ite, miite, haysi ta ashuwa" yaagis.

27 Xuu7aa ekidi, Xoossaa galatis. Entaw immidi, "Ubbay haysafe uyite. 28 Haysi daro asa nagara atotethas mela gukiya ta suuthaa. Ha suuthay Xoossay hintera geliya caaquwa mintheysa.✝26:28 Kessa 24:8; Ermi 31:31.