36 Yaatidi, Yesuusi ba tamaaretara Geetasemaane geetetiya bessaa bidi, entako, "Taani hini bada Xoossaa woossashana, hinte haysan uttite" yaagis. 37 Phexroosanne Zabdiyoosa nayta nam7ata baara eki bidi daro azzanonne un7etethi doomis. 38 Qassika entako, "Taani hayqos gathiya un7a un7etas. Haysan taara gam7itenne minnidi naagite" yaagis.

39 Guuthi sinthe bidi biittan gufannidi, "Ta Aawaw, danda7etiyaba gidiko ha waaye xuu7aa taape digga. Shin ne sheney hanope attishin, ta sheney hanopo" yaagidi Xoossaa woossis.

40 Yesuusi ba tamaaretako simmi yidi enti dhiskidashin demmis. Phexroosako, "Hinte issi saatekoka dhiskonna taara minnanaw danda7ibeeketii? 41 Paacen hinte gelonna mela barkidi naagitenne Xoossaa woossite. Hintew lo77o amoy de7ees, shin hinte daaburancho asi" yaagis.

42 Yesuusi qassi nam7antho bidi, "Ta Aawaw, taani ha waaye xuu7ape uyonna de7ishe aadhanaw danda7etonnaba gidiko ne sheney hano" yaagidi Xoossaa woossis. 43 Qassika simmi yaa wode iya tamaareta ayfiya dhiskoy goozin, zin7idashin demmis.

44 Qassika enta aggidi, bidi kase qaala zaari heedzantho woossis. 45 Hessafe guye, ba tamaaretako yidi, "Ha77i gakanaw dhisketinne shempetii? Heko, Asa Na7i, nagaranchota kushen aadhidi imetiya saatey gakis. 46 Dendidi yedhite, tana aathidi immeysi haysish gakis" yaagis.