Roome Kiita 13

Deriya Ayseysatas Kiitetethi

1 Xoossaa shene gidonashin maati imetonna gishonne ha77i de7iya shuumatika Xoossaa shenen shuumetida gisho asi ubbay deriya ayseysatas kiitetanaw bessees. 2 Hessa gisho, maatara de7eysatas kiitetonna ixiya oonika Xoossaa kiitaa ixees. Kiitetonna ixiya oonika ba bolla pirdaa ehees. 3 Ayseysati iita ootheysatape attishin, lo77o ootheyisata yashshokona. Ayseysatas yayyonna agganaw koyay? Yaako lo77o ootha; enti nena galatana. 4 Enti new lo77oba oothanaw shuumetida Xoossaa aylle. Shin neeni iitabaa oothiko, enti iitabaa oothidaysa seeriya gisho iyaw yayya. Enti iita ootheyisata seeridi, Xoossaa hanquwa qoncisiya Xoossaa aylle. 5 Hessa gisho, Xoossaa hanquwa xalaalas gidonashin, hinte kahay markatiya gisho deriya ayseysatas kiitetanaw bessees.

6 Hinte giira giireyka hessasa. Deriya ayseysati he oosuwa oothey, enti Xoossaa aylleta gidida gishosa.✝13:6 Maato 22:21; Mar 12:17; Luqa 20:25. 7 Issuwas issuwas besseysa immite. Giira giiranaw besseysas giirite; qaraxa qanxanaw besseysas qaraxa qanxite; yayyanaw besseysas yayyite; bonchoy besseysa bonchite.